Պետության հզորության առաջնահերթ ցուցանիշը տնտեսությունն է. ԲՀԿ-ն լավ գիտի, թե ինչպես այն արդյունավետ կառավարել. «Փաստ»

«Փաստ» օրաթերթը գրում է

Պետության հզորությունը չափելի ցուցանիշ է։ Տնտեսության վիճակը դրա կարևոր ցուցիչներից մեկն է։ Կարևոր այլ բաղադրիչներ են բնակչության կենսամակարդակը, գործազրկության ու աղքատության աստիճանը, քաղաքացիների եկամուտների աստիճանը և այլն։ Ակնհայտ է, որ առանց հզոր ու զարգացած տնտեսության պետությունը չի կարող լինել ուժեղ, կենսունակ, պաշտպանված։ Առանց տնտեսության բանակն ու զինված ուժերը ունակ չեն բարձր մակարդակով պետության անվտանգության խնդիրներ լուծել։ Դա նորություն չէ, այլ աքսիոմատիկ ճշմարտություն։ Հենց ելակետային այս սկզբունքի հիմքով է նաև իր գաղափարական մոտեցումները ձևակերպում «Բարգավաճ Հայաստան» կուսակցությունը, որի ծրագրային դրույթներն իրենց հիմքում ունեն երեք հիմնական թեզ՝ իրատեսականություն, գործնականություն ու ջանք։

ԲՀԿ-ն ու նրա առաջնորդ Գագիկ Ծառուկյանը, երբ խոսում են անվտանգ հայրենիքից ու հզոր պետությունից, առաջնահերթ նկատի են առնում նյութական հզորությունը, որը չափելի է։ 20 տարուց ավելի գործարար կենսագրություն ունեցող և 30 հազարից ավելի մարդկանց սոցիալական խնդիր լուծող անձն ինչպես անհատական փորձառության, այնպես էլ մասնագիտական հմտությունների ներքո լավ գիտի՝ ինչ է տնտեսությունը, գործարարությունը, վարկերը, գործարարին ու գյուղացուն աջակցելը։ Նա դա լավ գիտի ոչ թե բարձր ամբիոններից ելույթներ ունենալու զորու, այլ իրական կյանքում՝ տեղերում, բիզնես շփումներում, արտի ու դաշտի մեջ գյուղացու հետ գործնական քննարկումներում, գործարանում ու ֆաբրիկայում՝ բիզնեսմենի, շինհրապարակում՝ շինարարի հետ շփվելիս։ Իրական տնտեսությունը թվեր են, ոչ թե ելույթներ, երկար-բարակ քննարկումներ։

Ու երբ Ծառուկյանը նշում է, որ ժամանակն է մեր վարկառու հայրենակիցներին «ազատել» վարկերի այդ անարդար բեռից, որպեսզի նրանք չկորցնեն իրենց ունեցվածքը, նա դա ասում է կանխավ հստակ հաշվարկ անելով: Այսպես՝ մինչև 3 մլն դրամի չափով վարկերը պետք է զրոյացնել: Արդյունքում՝ շուրջ 2,2 մլն վարկառուներից մոտ 2 մլն վարկառուների վարկերն ամբողջությամբ կմարվեն: Սա ասելով՝ նա ոչ թե այդ խնդիրները դնում է բանկերի ու ֆինանսական խմբերի ուսերին, այլ նշում, որ պետությունը այդ պարտավորությունը իր վրա պետք է վերցնի։ Դա անգնահատելի աջակցություն կլինի մեր քաղաքացուն. պետության գործառույթը այս արտակարգ իրավիճակում հենց դա պետք է լինի։ Հանրապետությունում կա շուրջ 2,2 միլիոն վարկառու, որոնց վարկային պարտավորությունների ընդհանուր չափը 4 տրիլիոն դրամ է, որից մոտ 1 տրիլիոնը սպառողական վարկեր են:

Ահռելի գումար են կազմում նաև գյուղատնտեսական վարկերը: Հետևաբար, պետությունը ռեալ քայլեր պետք է անի ներդրում ներգրավելով, դրա շահույթով փակելով մարդկանց վարկերը, որ տնտեսությունը շնչի, զարգանա։ Այընտրանքային ուղի այս պարագայում ուղղակի չկա։ Հենց նման թեզերի է անդրադարձել ԲՀԿ առաջնորդ Գագիկ Ծառուկյանը նախօրեին Աշտարակ քաղաքում ՀՀ ընտրողների հետ հանդիպման ժամանակ։ Խոսելով տնտեսության հզորության ու Հայաստանի համար այս ողջ ընթացքում գործադրած ջանքերի մասին՝ Գ. Ծառուկյանը անգամ հստակ ուղիները մատնանշեց, թե ինչ ճանապարհով է հնարավոր դրսից ներդրումներ բերել հատկապես գյուղատնտեսության ոլորտ. խոսքը ոչ թե հարյուր հազարավոր, այլ միլիոնավոր ու միլիարդավոր դոլարների մասին է։

Նա միաժամանակ նշեց, որ գյուղմթերքի անհրաժեշտությունը միշտ առկա է, ուստի Արագածոտնի մարզի ու մեր մյուս գյուղական համայնքներում առհասարակ զարգանալու մեծ ներուժ կա, միայն թե պետությունը այդ քայլերը պետք է հենց ինքը ձեռնարկի։ Հանդիպման ժամանակ խոսելով պետության ֆինանսատնտեսական քաղաքականության մասին՝ ԲՀԿ առաջնորդը նշեց, որ այստեղ անձնական կապերը առաջնային են՝ հիշեցնելով, որ ինքը վերջին 3 տարվա մեջ անձամբ 20 մլրդ դոլարի վարկային փաթեթ է բերել Հայաստան, սակայն պետության քաղաքականությունը այնպիսին էր, որ չկարողացան օգտվել այդ արտոնյալ միջոցներից։

Կյանքը ցույց է տալիս, որ պետական կառավարման մեջ ամենից կարևոր երկու ոլորտները՝ տնտեսությունը և անվտանգությունը առաջնահերթ են ու փոխկապակցված, ուստի ճիշտ անվտանգային քաղաքականություն վարողը պարտավոր է լավ տնտեսություն ու կառավարում իմանալ, հակառակ դեպքում պետությունը կարող է ձախողել: Քարոզարշավը հստակ ցույց տվեց, որ ԲՀԿ-ն անվտանգային և տնտեսական մարտահրավերները հաղթահարելու հստակ ճանապարհային քարտեզ ունի:

ԱՐՍԵՆ ՍԱՀԱԿՅԱՆ

Մանրամասները՝ «Փաստ» օրաթերթի այսօրվա համարում