Նախատեսվում է վերանայել անհատական բնակելի տներից խաղահրապարակների հեռավորությունը. «Փաստ»

«Փաստ» օրաթերթը գրում է

Քաղաքաշինության կոմիտեն հանրային քննարկման է ներկայացրել նախագիծ՝ հիմք ընդունելով քաղաքացիների բողոքները, մասնավորապես՝ առաջարկվում է փոփոխություններ կատարել քաղաքաշինության նախարարի 2014 թ.-ի հոկտեմբերի 14-ի N 263-ն հրամանում: Կոմիտեն նշում է, որ իրենց են դիմում Հայաստանի մարզերի գյուղական և քաղաքային համայնքները՝ ավտոտեխսպասարկման կետեր (կայանքներ) կառուցելու և լիազոր մարմնից համապատասխան դիրքորոշում ստանալու ակնկալիքով: Քաղաքաշինության նախարարի 2014 թ.-ի հոկտեմբերի 14-ի «ՀՀՇՆ 30-01-2014 «Քաղաքաշինություն. Քաղաքային և գյուղական բնակավայրերի հատակագծում և կառուցապատում» շինարարական նորմերը հաստատելու մասին» N 263-Ն հրամանով Հայաստանի տարածքում ավտոմոբիլների տեխնիկական սպասարկման համար սահմանված են նորմեր, որոնք նախատեսում են 1 տեխսպասարկման կետի մասով առնվազն երկու հարյուր ավտոմոբիլների տեղակայում և այդ գործընթացի ապահովման համար հողամասի հատկացման մեծ մակերեսներ:

Բայց նշված չափորոշիչը գրեթե կիրառելի չէ Հայաստանի Հանրապետության տարածքի որևէ քաղաքային և առավել ևս գյուղական բնակավայրի համար, որտեղ նմանատիպ սպասարկման կետի հզորությունը անմիջականորեն պայմանավորված է բնակավայրերի (շատ դեպքերում սակավաթիվ) բնակիչների քանակով: Հաշվի առնելով սա և այն հանգամանքը, որ խնդրի կարգավորումը ենթադրում է նաև որոշակի քանակով աշխատատեղերի և ՀՀ մարզերի բնակչության զբաղվածության ապահովում՝ առաջարկվել է նշված նորմերի 305-րդ կետում կատարել փոփոխություն և ավտոտեխսպասարկման կայանքների համար սահմանել իրատեսական չափորոշիչ՝ ըստ եռաստիճան դասակարգման՝ մինչև 10, 11-30 և 30-ից ավելի ավտոմոբիլների համար: Հաջորդիվ առաջարկվում է փոփոխություն կատարել անհատական բնակելի տներից խաղահրապարակների հեռավորության վերաբերյալ:

Քաղաքաշինության նախարարի նույն հրամանով բնակելի միկրոշրջաններում երեխաների խաղահրապարակների, մեծահասակների հանգստի վայրերի և մարզահրապարակների տեղակայումը և հեռավորությունները դասակարգված չեն ըստ բազմաբնակարան և անհատական բնակելի տների: Կոմիտեն նշում է, որ բազմաթիվ են քաղաքացիների՝ անհատական բնակելի տների սեփականատերերի բողոքները նմանատիպ՝ հանրային նշանակության խաղահրապարակների և մարզահրապարակների տեղակայման վայրերի վերաբերյալ, որտեղ խաղահրապարակներից արձագանքվող աղմուկը խաթարում է նշված տների բնակիչների անդորրը: Բացի այդ, առավոտից մինչև ուշ երեկո այդ հրապարակներում իրենց հանգիստը կազմակերպող՝ հարակից շենքերի քաղաքացիների կողմից աղտոտվում է ողջ միջավայրը, այդ թվում անհատական բնակելի տների հողամասի սահմանագիծը՝ ցանկապատի ամբողջ երկայնքով: Սրա հետ կապված քաղաքաշինության կոմիտեն 2020 թ.-ի դեկտեմբերի 10-ին համապատասխան գրությամբ դիմել է Երևանի քաղաքապետարան ու ՀՀ քաղաքաշինության, տեխնիկական և հրդեհային անվտանգության տեսչական մարմին՝ առկա նորմերում փոփոխություն կատարելու նպատակահարմարության վերաբերյալ:

Երևանի քաղաքապետարանի պատասխան գրության համաձայն՝ շինարարական նորմերում փոփոխություն կատարելու վերաբերյալ առարկություններ չեն ներկայացվել: Ակնհայտ է, որ անհատական բնակելի տների մասով նոր նորմերի մշակման գործընթացը բավականաչափ ծավալուն է և ժամանակատար, ուստի խնդիրը առավել սեղմ ժամկետում կարգավորելու համար նպատակահարմար է համարվել փոփոխությունն առաջնահերթ դիտարկել գոյություն ունեցող «ՀՀՇՆ 30-01-2014 «Քաղաքաշինություն. Քաղաքային և գյուղական բնակավայրերի հատակագծում և կառուցապատում» շինարարական նորմերում: Քաղաքաշինության կոմիտեն նշում է, որ այս փոփոխությունները պետբյուջեում հավել յալ ծախսեր չեն նախատեսում, միտված են քաղաքաշինական ընթացիկ խնդիրների կարգավորման ապահովմանը, քաղաքացիների բողոքների բավարարմանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում