«Այս իշխանության դեպքում լուրջ ու մեծ փոփոխությունների սպասել չի կարելի». «Փաստ»

«Փաստ» օրաթերթը գրում է

2021 թվականի հունվար-մայիս ամիսներին նախորդ տարվա նույն ժամանակահատվածի համեմատ տնտեսական ակտիվության ցուցանիշն աճել է 4,3 %-ով: Ոլորտի պատասխանատուները պնդում են, որ այս ցուցանիշը փաստում է տնտեսության վերականգնման մասին:

«Անգամ պետք չէ տնտեսագետ լինել, որպեսզի թվերն իրար կողք դնել ու տեսնել, թե նման աճ կամ տնտեսության նման զարգացում արդյո՞ք գոյություն ունի: Ընդհանրապես, կան տնտեսական աճ, վերականգնողական աճ, տնտեսության զարգացում և մարդկային զարգացում եզրույթները, որոնք մեկը մյուսից բավականին տարբեր են: Այս դեպքում խոսքը վերականգնման մասին է: Վերցնենք անցած տարվա տնտեսության տարեկան մոտ 7,8 տոկոս անկումը և այս տարվա առաջին ամիսների 4,3 տոկոս տնտեսական ակտիվության ցուցանիշը: Լավ կլինի, որ այս տարվա կտրվածքով ավելի մեծ ակտիվության ցուցանիշ լինի և բարձրանա 7,8 տոկոս անկման ցուցանիշից: Եթե բարձրանա, նոր միայն կասենք, որ վերականգնման որոշակի մակարդակ կա: Առայժմ չենք հասել տնտեսության վերականգնման մակարդակին: Այնպես որ, պետք չէ այդ թվերը թմբկահարել: Առավել ևս, որ ցուցանիշները բացարձակապես որևէ առնչություն չունեն կառավարության հետ: Չենք կարող ասել, որ մասնավորապես 4,3 տոկոս ցուցանիշը կառավարության վարած տնտեսական քաղաքականության արդյունքում է գրանցվել»,- «Փաստի» հետ զրույցում ասաց տնտեսագետ Թաթուլ Մանասերյանը՝ նշելով, որ պետք է ձեռնպահ մնալ այդպիսի արտահայտություններից:

«Ինքնահոսի մատնված տնտեսության արդյունք է այս ցուցանիշը: Ուրիշ հարց, եթե կառավարությունից որևէ մեկը մատնանշի, թե ինչ են արել այդ ուղղությամբ, ըստ որի, 4,3 տոկոսանոց ցուցանիշ է գրանցվել: Բայց նման բան չեն կարող անել, որովհետև նման արդյունք գրանցվել է հիմնականում գյուղատնտեսության ոլորտի, առևտրի շրջանառության, որոշակի սպառման, նաև էլեկտրաէներգիայի արտադրության շնորհիվ: Այսինքն, ցուցանիշները ևս վկայում են այն մասին, որ գործ ունենք հատկապես մասնավոր հատվածի համառության շնորհիվ ձեռքբերված որոշակի արդյունքների հետ, սակայն դրա տակ չկան հիմքեր, որոնք վերաբերում են տնտեսական քաղաքականությանը»,-ասաց Մանասերյանը:

Անդրադառնալով գնաճի 5,5 տոկոս ցուցանիշին՝ Թաթուլ Մանասերյանը նշեց. «Ուզում եմ հիշեցնել, որ գնաճի ցուցանիշը մոտ 500 ապրանքատեսակների միջինացված գինն է և ոչ, օրինակ` առաջին անհրաժեշտության ապրանքների: Դա ընդհանուր մակրոտնտեսական ցուցանիշ է, և կառավարությունը պետք է մտահոգվի առաջին անհրաժեշտության 1011 ապրանքախմբերի գնաճով: Իրականում գնաճը շատ ավելին է՝ երկնիշ թվերով: Այդ իրողությունը խանութներում գնումներ կատարելիս մենք ինքներս տեսնում ենք, և այստեղ, իհարկե, անելիքները շատ-շատ են»:

Այդուհանդերձ, տնտեսագետը վերարտադրված իշխանության պարագայում տնտեսության վերականգնման ու զարգացման առումով սպասելիքներ չունի: «Այս իշխանության դեպքում և այս իշխանության կադրային քաղաքականության պարագայում պետք է սպասել նույն իրավիճակի շարունակությանը: Նույն միտումները կարող են շարունակվել: Ես, իհարկե, լավատեսության հիմքեր, ամեն դեպքում, ունեմ, բայց այդ հիմքերը կարելի է իրացնել միայն պրոֆեսիոնալ, ազգային մտածելակերպ ունեցող կառավարություն ունենալու դեպքում: Այս պարագայում մենք դա չունենք: Մենք չունենք գյուղատնտեսության նախարարություն, երբ երկրի բնակչության կեսից ավելին հենց այդ ոլորտում է գործունեություն ծավալում:

Այս հանգամանքն անտեսվում է, չկա հեռանկարային քաղաքականություն, չկա տնտեսական որևէ ռազմավարություն: Չկա նաև լրջմիտ քաղաքականություն, գործիքակազմ, հատկապես մարդկային կապիտալ կառավարման ոլորտում: Այս իրողությունների պարագայում լուրջ ու մեծ փոփոխությունների սպասել չի կարելի: Իհարկե, միկրոմակարդակում մասնավոր ձեռնակատիրությունը որոշակի համառության շնորհիվ կարող է արդյունքների հասնել ու հասնում է, բայց մինչև երկրում ընդհանուր միջավայրը չփոխվի, վերականգնում չի լինի: Այս պայմաններում որևէ լուրջ կանխատեսում չեմ կարող անել, այն, ինչ կունենանք, դա կլինի միայն այս իրավիճակի շարունակությունը»,-ասաց տնտեսագետը՝ շեշտելով նաև կառավարման ոլորտում պատասխանատվության իսպառ բացակայութան մասին:

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում