Վար ենք անում, որ ցորենը ցանենք․ Վերին Շորժայում հնչած կրակոցները չեն անհանգստացնում գյուղացիներին
ՀԱՍԱՐԱԿՈՒԹՅՈՒՆԳյուղում կրակոցի ձայներ չենք լսել, զբաղված ենք գյուղատնտեսական աշխատանքներով հողն ենք մշակում՝ ցորեն ցանելու համար։ Այս մասին ԼՈՒՐԵՐ.com-ի հետ զրույցում ասաց Վերին Շորժա համայնքի ղեկավար Արտյոմ Երանոսյանը՝ անդրադառնալով Վերին Շորժայում հայ և ադրբեջանցի զինվորականների միջև փոխհրաձգությանը:
Համայնքապետը նշեց, որ սահմանային հատվածում իրավիճակը մնում է անփոփոխ՝ ադրբեջանական զինված ուժերը նույն կերպ տեղակայված են սահմանին։ Ըստ Երանոսյանի՝ անկախ սահմանին տիրող իրավիճակից, նրանք շարունակում են զբաղվել իրենց գյուղատնտեսությամբ. «Ոնց գիտեք, նույն ձև իրենք նստած են, մենք էլ իրենցից 500 մ հեռավորության վրա ենք, բայց դա մեզ չի խանգարում զբաղվել մեր առօրյա գործերով: Այս պահին մենք վար ենք անում, որ ցորենը ցանենք։ ժողովուրդը դաշտում աշխատում է»,- ընդգծեց Արտյոմ Երանոսյանը։
Մեր այն հարցին, թե արդյոք ադրբեջանական կողմը փորձում է խոչընդոտել իրենց աշխատանքներին, համայնքի ղեկավարը պատասխանեց՝ այս պահին դեռ խնդիրներ չեն ունեցել. «Մինչև հիմա մենք նման խնդիր չունենք։ Հետագայում չեմ կարող ասել ինչ կլինի։ Տրակտորն աշխատում է իրենցից մոտ 500 մետր հեռավորության վրա»,- ասաց Երանոսյանը՝ հավելելով, որ գյուղացիներ այժմ մեկ խնդիր ունեն. «Մի շարք գյուղացիներ այս պահին անասնապահությամբ չեն կարողանում զբաղվել, քանի որ կորցրել են արոտները։ Անասուններն արածեցնելու տեղը սպառվում է, գյուղացիները նստած են, չեն կարողանում արածեցնեն կենդանիներին, այս պահին դա է մեր խնդիրը»,- ասաց համայնքապետը։
Հիշեցնենք՝ այսօր Վերին Շորժայում հայ և ադրբեջանցի զինվորականների միջև փոխհրաձգություն է տեղի ունեցել, որի հետեւանքով մեկ զինծառայող վիրավորվել է։
Զվարթ Պետրոսյան