«Այս ծրագիրը երթևեկությանը ոչինչ չի տալու, հակառակը՝ վթարների պատճառ կարող է դառնալ»․ «Փաստ»

«Փաստ» օրաթերթը գրում է

Ինչպես հայտնի է, հուլիսի 1-ից Հայաստանում գործում է բջջային հեռախոսով ճանապարհային երթևեկության կանոնների խախտում արձանագրելու կարգը: Դեռ որոշումն ուժի մեջ չմտած՝ քաղաքացիները նշում էին, որ կարծես խտրականություն է դրվում իրենց միջև: Այսպես՝ activesociety. am կայքում գրանցվել հնարավոր է միայն eID կամ MOBILEID համակարգերի միջոցով։ Սա անելու համար քաղաքացին պետք է ունենա էլեկտրոնային նույնականացման քարտ կարդալու սարք կամ բջջային նույնականացման քարտ, որը տրամադրող կազմակերպությունը սպասարկում է միայն «Բիլայն» ընկերության համարներ, այն էլ՝ հատուկ քարտերով, այսինքն՝ քաղաքացին պետք է պարտադիր նոր քարտ գնի:

Ոստիկանությունն, ի պատասխան մեր հարցման, նշել էր, որ այսկերպ նպատակ են ունեցել բացառել երրորդ անձի կողմից որևէ մեկ այլ քաղաքացու անձնական տվյալներով բջջային հավելվածի օգտատեր դառնալը, «քանի որ հակառակի դեպքում՝ օրինակ ֆինանսավարկային, ապահովագրական, ոստիկանության և այլ կազմակերպությունների և պետական մարմինների աշխատակիցները, ունենալով հասանելիություն որևէ անձի անձնական այս կամ այն տվյալներին, կկարողանային այլ անձի անունից գրանցվել որպես բջջային հավելվածի օգտատեր»։ Հաջորդիվ՝ լուսանկարահանելիս, տեսանկարահանելիս երթևեկության մեջ գտնվող վարորդն իր հեռախոսով որոշակի գործողություններ է կատարելու, ինչն ինքնին իրավախախտում է:Դա փաստել է նաև ոստիկանությունը:

«Տրանսպորտային միջոցների վարորդների (բացառությամբ ծառայողական առաջադրանքներ կատարող, օպերատիվ ծառայությունների տրանսպորտային միջոցների վարորդների) կողմից թեկուզ մեկ ձեռքի օգտագործմամբ ընթացքի ժամանակ ռադիոկապից և (կամ) հեռախոսակապից օգտվելն ինքնին իրավախախտում է և անընդունելի է որևէ ենթադրյալ իրավախախտում արձանագրելու համար թույլ տալ մեկ այլ իրավախախտում»: «Վարորդի ընկեր» ՀԿ-ի նախագահ Տիգրան Քեյանն ասում է՝ օրինագծի կողմնակիցը չի, գրեթե չի հետևել նաև դրա ընդունման ընթացքին: «Այն պետության կողմից մշակված ինչ-որ ծրագիր է: Թե ինչպես կշահագործեն այն, արդեն ռիսկերի գնահատման հարց է և պետության խնդիրն է: Այստեղ կարևոր է մեկ այլ հարց՝ այս ծրագիրը երթևեկությանը ոչինչ չի տալու:

Մինչ օրս էլ քաղաքացիները հնարավորություն ունեին իրենց բջջային հեռախոսներով նկարելու իրավախախտումները և դրանք ոստիկանությանն ուղարկելու, որն էլ պատշաճ արձագանքում էր դրանց: Իհարկե, այնտեղ որոշ խնդիրներ էին առաջանում` կապված վարչարարության հետ: Փորձ արվեց դրանք լուծել այս օրենքով ու նման հավելվածի ստեղծմամբ: Եթե ոստիկանությունը, հանձինս նոր ներդրված պարեկային ծառայության, իր հսկողությունն ուժեղացնի և պատշաճ ծառայություն մատուցի, այդ հավելվածի կարիքը, կարծում եմ, էլ չի լինի»,-«Փաստի» հետ զրույցում ասում է Քեյանը:

Ինչ վերաբերում է երկրորդ դիտարկմանը, մեր զրուցակիցը նշում է. «Իրականում անթույլատրելի է իրավախախտում արձանագրելու համար նորը թույլ տալը: Որքանով ես եմ տեղյակ, չպետք է թույլ տային երթևեկության ընթացքում իրավախախտումներ արձանագրել: Այս ամբողջի համատեքստում պետք է շեշտել, որ իրավախախտումների արձանագրման այս կարգն ավելի շատ խոչընդոտ կհանդիսանա և վթարների պատճառ կդառնա, քան ինչ-որ օգուտ կտա»,-եզրափակում է ՀԿ-ի նախագահը:

Մանրամասները՝ «Փաստ» օրաթերթի այսօրվա համարում