Հայտնի է «Ամենախելացին» հեռուստանախագծի երկրորդ եթերաշրջանի հաղթողի անունը

ԼԱՅՖ 19 Դեկտեմբեր, 2015 20:03

Blognews.am-ը գրում է.

«Արմենիա» հեռուստաընկերությամբ հեռարձակվող «Ամենախելացին» նախագիծն ամփոփեց երկրորդ եթերաշրջանը: BlogNews.am-ը հետևել է խաղի ընթացքին, բայց մինչ հաղթողի անունը նշելը կներկայացնենք մեր զրույցը ստեղծագործական կազմի հետ:

Հաղորդավարուհի Նազենի Հովհաննիսյանի համար երկրորդ եթերաշրջանն ավելի հասուն էր, քանի որ մասնակիցներն ավելի բարձր տարիքային խմբից էին։ «Եթերաշրջանը շատ կարևոր էր նրանով, որ ԼՂՀ-ից ունեինք մասնակիցներ, ինչի համար շատ ուրախ եմ,-նշում է Նազենին,- քանզի երբ մենք ասում ենք Հայաստան, հասկանում ենք ամբողջական Հայաստան՝ մեր երկու սրտերը միասին: Կարևոր է այն, որ շատ դեպքերում մեզ մեղադրում են, որ մենք գուցե տրավմատիկ իրավիճակ ենք ստեղծում երեխաների համար, բայց ես ուզում եմ նշել մի կարևոր փաստ. երեխաները սովորում են ոչ թե հաղթել, այլ արժանի կերպով նաև պարտվել, սա ևս կարևոր է: Նրանք իրենց մրցակցին, ընկերոջը, շարունակում են ինչ-որ կերպ ոգևորել՝ անկախ նրանից, որ իրենք դուրս են մնացել խաղից. սա շատ կարևոր մշակույթ է, որը գուցե մեր ազգի մեջ բացակայում է»:

Հաղորդավարուհին հաղորդման մասին միայն դրական արձագանքներ է լսում, իսկ երբ քննադատում են, ապա դա միայն հարցի ձևակերպմանն է վերաբերում։ «Ես շատ նորմալ եմ դրան վերաբերվում, քանի որ Հայոց լեզվում ամեն ինչ երկակի է, ու շատ երկձևություններ կարող են լինել: Պատմությունը հարյուր տոկոս աքսիոմատիկ չի լինում, մեր խմբագիրները փորձում են աշխատել հնարավորինս հստակ, բայց կան բաներ, որոնք ունեն մի քանի տարբերակներ»,-եզրափակեց Նազենին:

Խաղի գլխավոր խմբագիր Կարեն Քոչարյանն էլ ավելացրեց, որ երկրորդ եթերաշրջանի մոտեցումը չի փոխվել, միայն երեխաների տարիքային սահմանն է փոխվել. «Փորձը ցույց տվեց, որ երեխաները մեծ պոտենցիալ ունեն, պարզապես նրանց նկատմամբ պետք է ավելի ուշադիր լինենք: Երբեմն ասում են՝ սա ինչ սերունդ է, բայց նրանք իրականում շատ ավելի ուժեղ են: Ես ուրախ եմ, որ այս երեխաներն արդեն «աստղ» են ոչ թե թռվռալու համար, այլ իրենց գիտելիքների շնորհիվ, ինչն արդեն մեծ առավելություն է: Բացի այդ, սա նրանց համար կյանքի փորձ է, որն ամբողջ կյանքում պետք կգա նրանց»:

Կրթության և գիտության նախարարությունն արդեն երկրորդ եթերաշրջանն է, ինչ նախագծի կողքին է։ Կրթության և գիտության նախարարի մամուլի քարտուղար Զոհրապ Եգանյանը խոստացավ, որ այս տարի էլ հաղթողին կպարգևատրեն և կուղարկեն եվրոպական որևէ երկրի ամառային դպրոց։ «Նախորդ հաղթողը բավականին ոգևորված էր այդ նվերով, որն արվեց ԿԳՆ-ի կողմից, խոսել ենք նրա հետ այն ժամանակ, երբ հետ էր եկել»,-պատմում է Զոհրապը և ավելացնում, որ ցանկացած միջոցառում, հաղորդում, որը կապված է կրթության հետ, կողջունվի ԿԳՆ-ի կողմից:

Երկրորդ եթերաշրջանում ավելացել է կրոնական ուղղվածությունը, իսկ Արարատյան հայրապետական թեմը սահմանել էր մրցանակ այն երեխայի համար, ով ավելի ակտիվ կլինի կրոնի թեման ընտրելիս։ «Հայ առաքելական եկեղեցին միշտ էլ կարևորել է կրթական ծրագրերը, հոգևոր դաստիարակությունն ու կրթությունը: Պատկերացումներին ու այս մոտեցումներին ընդառաջ Արարատյան թեմի առաջնորդ արքեպիսկոպոս Նավասարդ Կճոյանը սահմանել է մրցանակ,- նշեց Տեր Եսային, ով էլ մրցանակ հանձնեց Էդուարդ Քեշիշյանին՝ կրոնական ուղղվածության հարցերին ամենից շատ պատասխանած մասնակցին,- մրցանակն ուխտագնացություն է դեպի Երուսաղեմ՝ քայլելու Քրիստոսի հետքերով, Երուսաղեմը նաև երեք կրոնների մայրաքաղաքն է համարվում, վստահ եմ, որ Էդուարդը շատ պետք է սովորի կրոնների մասին նաև այնտեղ: Հավանաբար գարնանը կկարողանա մեկնել»:

«Ռոսգոսստրախ Արմենիա» ընկերության մարկետինգային հաղորդակցումների դեպարտամենտի ղեկավար Էմմա Մոժարովան նշեց, որ հաղթողին տրամադրելու են 1 մլն դրամ. «Շատ կարևոր ենք համարում այն գաղափարը, որ երեխաները պետք է իմանան՝ գիտելիքներով կարող են գումար վաստակել Հայաստանում: Դա կնպաստի նրան, որ մյուս երիտասարդները կսկսեն ձգտել խորը գիտելիքներ ձեռք բերել: Վստահ եմ` նման նախագծերը շատ կարևոր են, հատկապես՝ հեռուստատեսային, քանի որ լայն լսարան ունեն, և երեխաների մեջ էլ մրցակցություն է առաջանում՝ տեսնելով, որ իրենց ընկերները միայն իրենց գիտելիքների շնորհիվ եկել, հասել են հեռուստատեսություն: Այս երեխաները, վստահ եմ, իրենց դպրոցում դառնում են հայտնի, դառնում են հերոս, և մյուսները, կարծում եմ, ևս կձգտեն դրան, ու այս նախագծի շնորհիվ Հայաստանում խելացի երիտասարդները կշատանան»:

Երկրորդ եթերաշրջանի հաղթող ճանաչվեց Արման Բայրամյանը, ով բավականին ոգևորված էր ստացած նվերներից և ընկերների շնորհավորանքից. «Դեռ չեմ որոշել, թե գումարն ինչի վրա եմ ծախսելու, դա արդեն ծնողների հետ որոշելու հարց է: Միգուցե հաջողվի արտասահմանում սովորել, ուզում եմ ծրագրավորող դառնալ»: Արմանը հենց սկզբից էլ մտածել է, որ կհաղթի և շատ է աշխատել հաղթանակի համար։ «Այսօր ամեն ինչ ինձ համար հեշտ ստացվեց, դրա համար շատ ուրախ եմ։ Նախորդ խաղերն ավելի դժվար էին ինձ համար, բայց ես ուժ գործադրեցի, որ հաղթահարեմ: Պետք է շատ ժամանակ ծախսել պարապմունքների վրա, այլապես հնարավոր չի լինի հաղթել, կցանկանամ, որ բոլորն էլ լավ աշխատեն ու հաղթեն»,- մաղթեց Արմանը:

Նյութը` Սիրանուշ Գրիգորյանի

Լուսանկարները` Կարեն Հովհաննիսյանի