Խաթարված է պետական գերատեսչությունների հասարակական խորհուրդների և ՀԿ-ների համագործակցությունը. «Փաստ»

«Փաստ» օրաթերթը գրում է

Դեռևս 2015 թ.-ին ՀՀ կառավարությունը հավանություն է տվել «ՀՀ նախարարին կից հասարակական խորհրդի օրինակելի աշխատակարգին»:Հասարակական այս խորհուրդները խորհրդակցական մարմիններ են, որոնց կազմում կարող են ընդգրկվել հասարակական կազմակերպություններ, զանգվածային լրատվության միջոցներ, ազգային փոքրամասնություններ ներկայացնող կազմակերպություններ, ինչպես նաև այլ շահագրգիռ անձինք, որոնց ներկայացվում են կոնկրետ պահանջներ: Հասարակական խորհուրդներ ունեն նաև պետական մյուս գերատեսչությունները:

Վերջին շրջանում տարբեր ոլորտների փորձագետների հետ զրույցներում «Փաստը» հետաքրքիր արձանագրումներ էր կատարել, մասնավորապես, որ հասարակական այս խորհուրդները դադարում են կատարել իրենց հիմնական գործառույթները, փորձագետներին մասնակից չեն դարձնում կարևոր հարցերի քննարկումներին, իսկ երբեմն էլ այդ խորհուրդների աշխատանքները սկսում են այն աստիճանի ձևական բնույթ կրել, որ փորձագետներն իրենք են լքում խորհուրդը, քանի որ նրանց բարձրացրած խնդիրներին լուծում չի տրվում:

«Սպառողների ասոցիացիա» ՀԿ-ի իրավաբան Սյուզաննա Չիլինգարյանը ևս նշում է՝ որոշ գերատեսչությունների հասարակական խորհուրդների հետ համագործակցությունը չի ստացվում, նրանց հետ կապը «կորել է», մինչդեռ այս խորհուրդներում պետք է բարձրացվեն քաղաքացիներին հուզող հարցեր, քննարկումներ լինեն՝ լուծումներ գտնելու ակնկալիքով:

«Հասարակական խորհուրդը ապաքաղաքական, հասարակության և իշխանության միջև երկխոսության ու վստահելի գործընկերային հարաբերությունների ձևավորման, հասարակական վերահսկողության իրականացման, ինչպես նաև մարդու և քաղաքացու հիմնարար իրավունքների ու ազատությունների ապահովման համար հրամանով ձևավորվող նախարարություններին և տեսչական մարմիններին կից խորհուրդ է, որի գործունեությունը հիմնված է կամավորության սկզբունքի վրա, իսկ նպատակը հասարակության տարբեր շերտերի շահերը ներկայացնելն է»,-«Փաստի» հետ զրույցում ասում է Չիլինգարյանը:

Նշում է՝ հասարակական խորհրդի ձևավորումը պետք է ապահովվի քաղաքացիական հասարակության մասնակցությունը պետական կառավարման գործընթացներին՝ այդ կերպ էլ ավելի ամրապնդելով փոխադարձ վստահության, երկխոսության և գործընկերային հարաբերությունների ձևավորումը:

«Վերջին տարիներին, սակայն, խաթարվել է այդ հանդիպումների պարբերականությունը և արդյունավետ համագործակցության ընթացակարգը: Սա «նպաստում է» մի շարք ոլորտներում լուրջ խնդիրների խորացմանը, քանի որ հանրային նշանակություն ունեցող օրհասական հարցերի վերաբերյալ հասարակական կարծիքը մնում է չբարձրաձայնված, ինչն էլ հանգեցնում է բողոքների ոչ լիարժեք լուծման: Մեր հասարակական կազմակերպությունը մի շարք նախարարությունների և տեսչական մարմինների հանրային խորհրդի կազմի անդամ էր, սակայն վերջին երեք տարվա ընթացքում խորհրդի նիստեր չեն հրավիրվում ու չեն քննարկվում սպառողների կողմից բարձրացված մի շարք ոլորտային խնդիրներ: Այս հարցի հետ կապված օգոստոսի 18-ին պաշտոնական գրությամբ դիմել եմ Շուկայի վերահսկողության տեսչական մարմնին, Սննդամթերքի անվտանգության տեսչական մարմնին և Մրցակցության պաշտպանության հանձնաժողովին՝ մեզ հետ աշխատանքներն ու հանդիպում-քննարկումները վերսկսելու առաջարկով:

Մասնավորապես՝ նշել եմ, որ «Սպառողների ասոցիացիա» ՀԿ-ն շատ է կարևորում պետական կառույցների հետ սերտ համագործակցությունը և պարբերաբար հասարակական խորհրդի հետ հանդիպումները, քանի որ նման կերպ հնարավոր է դառնում ոչ միայն քննարկել շուկայում առկա խնդիրներն ու սպառողների խախտված իրավունքները, այլև ոլորտային բացերն ու դժվարությունները: Ցավոք, վերջին երեք տարվա ընթացքում հասարակական կազմակերպությունների հետ հանդիպումներ և համագործակցություն չի եղել, ինչպես նաև չի քննարկվել, թե կոնկրետ որ ոլորտում ինչ խնդիրների ու դժվարությունների են բախվում ՀԿ-ները, ինչն անընդունելի է: Ուստի առաջարկել եմ վերսկսել ՀԿ-ների հետ հանդիպումներն ու համագործակցությունը, ինչպես նաև ներգրավել մեզ օրենսդրական բարեփոխումների քննարկմանը, որոնց համար կարող ենք առաջարկություններով հանդես գալ»,-նշում է մեր զրուցակիցը:

Նյութը հրապարակման ներկայացնելու ժամանակահատվածում Չիլինգարյանի նամակին արձագանքել էին Սննդամթերքի անվտանգության տեսչական մարմնից՝ նշելով, որ իրենք «մշտապես համագործակցում են ՀԿ-ների հետ, մասնավորապես կազմակերպում ոլորտային տարբեր քննարկումներ՝ շուկայում առկա խնդիրների, իրավական բացերի, օրենսդրական փոփոխությունների հետ կապված: Տեսչական մարմինը հայտնել է իր պատրաստակամությունը «Սպառողների ասոցիացիա» ՀԿ-ի հետ հետագա համագործակցության համար», ինչպես նաև Մրցակցության պաշտպանության հանձնաժողովից՝ նշելով, որ կարևորում են համատեղ աշխատանքների իրականացումը քաղհասարակության ներկայացուցիչների հետ:«Հայտնում ենք մեր պատրաստակամությունը քննարկելու Ձեր կողմից բարձրացվելիք՝ ՄՊՀ-ի լիազորությունների շրջանակում սպառողների շահերի պաշտպանությանն առնչվող հարցերը»:

Չիլինգարյանն ընդգծում է՝ պետական կառույցների ղեկավարները չպետք է մոռանան, որ հասարակական խորհրդի անդամներն ունեն լիազորությունների լայն շրջանակ և առավել ծանոթ են քաղաքացիների խնդիրներին, որոնք անհապաղ լուծումներ են պահանջում: «Խորհրդի նիստերը նպաստում են, որպեսզի խնդրահարույց ոլորտներին և հանրային հնչեղություն ունեցող հարցերին տրվեն մասնագիտական և ճիշտ լուծումներ, իսկ դրա համար խորհրդի կազմը պետք է համալրված լինի պրոֆեսիոնալ և աշխատող մասնագետներով, որոնք իրապես պատրաստ կլինեն ներդնել իրենց ներուժը՝ հանդես գալով ոլորտային բարեփոխումների առաջարկներով»,-ընդգծում է իրավաբանը:

Խոսելով պետական մի շարք կառույցների հետ համագործակցության պակասի մասին՝ մյուս կողմից հավելում է, որ կա ստացված համագործակցության վառ օրինակ: Խոսքը Հանրային ծառայությունները կարգավորող հանձնաժողովի մասին է: «Մեր կազմակերպությունը մասնակցում է բոլոր նիստերին և քննարկումներին, իսկ մեր կողմից բարձրացված ցանկացած խնդիր հետևողականորեն, սահմանված ժամկետում լուծում է ստանում, առաջարկությունները դրվում են քննարկման, որոնց մասնակից են դառնում նաև ոլորտի մի շարք մասնագետներ»,-եզրափակում է Սյուզաննա Չիլինգարյանը:

ԼՈՒՍԻՆԵ ԱՌԱՔԵԼՅԱՆ 

Մանրամասները՝ «Փաստ» օրաթերթի այսօրվա համարում