Գլխավոր «շահը» ֆուտբոլային մթնոլորտի ապահովումն է ու «Հրազդան» մարզադաշտին նոր շունչ հաղորդելը. «Փաստ»

«Փաստ» օրաթերթը գրում է

«Առաջին հայկական ճակատը» (ՖԱՖ) հետաքրքիր գաղափար է կյանքի կոչում: Սեպտեմբերի 2-ին և 5-ին Մակեդոնիայի և Գերմանիայի հավաքականների դեմ Հայաստանի ազգային հավաքականի խաղերը ֆուտբոլասերները հնարավորություն կունենան դիտել «Հրազդան» մարզադաշտում՝ մեծ էկրաններին և ամենակարևորը՝ իսկական ֆուտբոլային մթնոլորտում։ ՖԱՖ-ը կոչ է անում հագնել հավաքականի շապիկները, վերցնել շարֆերը և սեպտեմբերի 2-ին և 5-ին «Հրազդան» մարզադաշտում աջակցել ազգային հավաքականին: Գաղափարի մանրամասները «Փաստ» թերթի խնդրանքով ներկայացնում է ՖԱՖ անդամ Վահե Գասպարյանը: Նշում է՝ վերջին մեկ շաբաթվա ընթացքում մասնագետների օգնությամբ նորօրյա ստանդարտներով նախ՝ «վերակենդանացրել» են «Հրազդան» մարզադաշտի երկու էկրանները՝ ամեն մեկը 140 քմ ծավալով:

«Դրանք երկար ժամանակ չէին օգտագործվել, տեխնիկական խնդիրներ կային, որոնք լուծվեցին: Մեր նպատակն այն է, որ ոչ միայն ուղղակի ֆուտբոլային դիտում լինի, այլ նաև «Հրազդան» մարզադաշտին ինչ-որ օգուտ տանք, մեր լեգենդար ստադիոնին, որտեղ ֆուտբոլային մեր հիմնական հաջողություններն ենք կերտել»,«Փաստի» հետ զրույցում ասում է Վահեն: Հիշեցնում է՝ ՖԱՖ-ը տասնչորս տարի Ազգային հավաքականի կողքին է: «Մենք սովորական երկրպագուներ չենք: 14 տարի անսպառ հավատով, անմնացորդ նվիրումով հավաքականի կողքին ենք թե՛ Հայաստանում, թե՛ երկրի սահմաններից դուրս: Ամեն կերպ փորձում ենք աջակցել: Քանի որ հիմա մեր Ազգային հավաքականի մոտ կրկին զարթոնք է, ֆուտբոլային հետաքրքրությունը շատ է, ու կարևորագույն փուլ է սկսվում, որոշեցինք երկրպագուներով հավաքվել այնտեղ, որտեղ կերտվել են մեր հաղթանակները, և միասին վայելել մեր գալիք հաջողությունները: Որքան շատ ֆուտբոլասեր-երկրպագուներ լինեն այդ օրերին մարզադաշտում, այնքան ավելի հետաքրքիր ֆուտբոլային միջավայր կստեղծվի»,-նշում է մեր զրուցակիցը:

 

Արդյո՞ք այս գաղափարը կդառնա ավանդույթ՝ հավաքվել «Հրազդանում» և դիտել հավաքականի հանդիպումները: «Չնայած նախկինում ֆուտբոլային դիտումներ կազմակերպվել են, բայց իր մասշտաբայնությամբ ու կարևորությամբ սա աննախադեպ է և մեր առաջին փորձը: Մեր այս գաղափարը կյանքի կոչելով՝ փորձում ենք նպաստել նրան, որ ակտիվ աշխատանքներ սկսվեն «Հրազդան» մարզադաշտի վերականգնման շուրջ: Հուսով ենք՝ մեր այս փոքր գործողությունները կնպաստեն դրան, ինչու չէ՝ նաև հետագայում ևս նման միջոցառումների կազմակերպման համար»,-ասում է ՖԱՖ-ի անդամը: Տեղեկացնում է՝ ամբողջը կազմակերպված է ՖԱՖ-ի միջոցով, բայց, իհարկե, մասշտաբայնության առումով հնարավոր չէ ամեն ինչ ինքնուրույն անել, և գաղափարը կյանքի կոչելու հարցում օգնել են գործընկերները:

« ՖԱՖ-ի գլխավոր «շահն» այս ամեն ինչում ֆուտբոլային մթնոլորտի ապահովումն է, հավաքականի խաղերը նվիրված երկրպագուների հետ վայելելը: Մեր գլխավոր նպատակն այս ամենի կազմակերպումն է, ոչ մի այլ տեսակի շահ չունենք»,-ասում է Վահեն: Ծանր, կորուստներով լի տարի ունեցանք, բայց սպորտային հաջողությունները, եռագույնի լինելիությունը տարբեր հարթակներում շնչելու, ապրելու հույս փոխանցեցին բոլորիս: Համախմբումն Ազգային հավաքականի շուրջ և հավատը նրա հաղթանակի նկատմամբ՝ նաև նման նպատակ ունի այս միջոցառումը:

«Մենք տեսանք, որ հավաքականի հաջողությունները երկրի համար ծանր շրջանում կարողանում էին միավորել բոլորին, ուրախացնել՝ անկախ ամեն ինչից: Այս տխուր, ճնշող ժամանակահատվածում դա այն լուսավոր կետերից էր, որ համախմբում էր մարդկանց: Ասեմ, որ միայն սրանով չեն սահմանափակվելու մեր նախաձեռնությունները: ՖԱՖ-ն առաջիկա խաղերին շատ ավելի մեծ նախագծերով ու ջանքերով է պատրաստվել:

Շուտով արդեն կներկայացնենք առաջիկա խաղերի հետ կապված մեր նախաձեռնությունները, բավականին մեծ աշխատանք է տարվել, բայց այն արդյունքը, որ ունենալու ենք, արժեր այն քրտնաջան աշխատանքը, որ կատարել ենք: Մեր հանրությունը կտեսնի նաև ստադիոնից դուրս ՖԱՖ-ի կատարած աշխատանքը: Ցանկացած նախաձեռնություն նպատակ ունի ոգևորության ու հույսի ալիք փոխանցել մեր հանրությանը»,-եզրափակում է ՖԱՖ անդամ Վահե Գասպարյանը:

Մանրամասները՝ «Փաստ» օրաթերթի այսօրվա համարում