ԿԽՄԿ ներկայացուցիչներն Ստեփանակերտում այցելել են կալանավորված ադրբեջանցի զինծառայողին. Ամատունի. «Փաստինֆո»
ՀԱՍԱՐԱԿՈՒԹՅՈՒՆԿարմիր խաչի միջազգային կոմիտեի ներկայացուցիչներն այցելել են Արցախում ձերբակալված ադրբեջանցի զինծառայող Ջամիլ Բաբաևին։ Տեղեկությունը «Փաստինֆո»-ի հետ զրույցում հայտնեց «Կարմիր խաչի» միջազգային կոմիտեի հայաստանյան գրասենյակի հաղորդակցության ծրագրերի պատասխանատու Զառա Ամատունին։
«Սեպտեմբերի սկզբին ԿԽՄԿ ներկայացուցիչները հանդիպել են ադրբեջանցի կալանավորված քաղաքացուն»,- հաստատեց Ամատունին։
Նշենք, որ Կարմիր խաչի ներկայացուցիչները ծանոթացել են Բաբաևի պահման պայմաններին, հնարավորություն տվել մտերիմների հետ կապ հաստատելու։
«Ինքը ունեցել է առանձնազրույց ներկայացուցիչների հետ, հնարավորություն ստացել ընտանիքի հետ փոխանակվել տեղեկությամբ»։
Նշենք, որ միջազգային կազմակերպությունը գրասենյակներ ունի եւ Երևանում, եւ Ստեփանակերտում։
Հիշեցնենք, որ օգոստոսի 25 -ին ադրբեջանցի զինվոր Ջամիլ Բաբաևը մտել էր Մարտակերտի տներից մեկը, որտեղ երկու դեռահաս երեխաներն են եղել, սպառնալով ուտելիք և ծխախոտ էր պահանջել։
Օգոստոսի 28-ին զինծառայող Ջամիլ Բաբաևին մեղադրանք է առաջադրվել ԱՀ քրեական օրենսգրքի 350-րդ հոդվածի 1-ին մասով, 316-րդ հոդվածով, 145-րդ հոդվածի 1-ին մասով, 135-րդ հոդվածի 1-ին մասով և 133-րդ հոդվածի 2-րդ մասի 2-րդ, 3-րդ, 4-րդ և 6-րդ կետերով (սահմանն ապօրինի հատելու, անչափահասների նկատմամբ սպանության սպառնալիքի և լրտեսության ակնհայտ հատկանիշներով):
Նրա նկատմամբ որպես խափանման միջոց է ընտրվել կալանավորումը։