Հայաստանում մեկնարկեց Buissup գլոբալ ֆորումը

Դիլիջանում սեպտեմբերի 7-ին սկսվեց Buissup գլոբալ ֆորումը։ Կրթական և քննարկումային այս հարթակի նպատակը Հայաստանում երիտասարդական ձեռնարկատիրությունը զարգացնելն է: Միջոցառումը սեպտեմբերի 20-ին Երևանում կայանալիք Հայկական բիզնես ֆորում 2021-ի (Armenian Business Forum 2021) ավարտական փուլն է: Գործարար ֆորումների շարքը կազմակերպում է Հայ գործարարների ասոցիացիան՝ «Տաշիր» ընկերությունների խմբի աջակցությամբ: Աշխարհի տարբեր անկյուններից հրավիրված ավելի քան երկու հարյուր մասնակիցներ նոր հմտություններ ձեռք բերելու, սեփական նախագծերը ներկայացնելու բացառիկ հնարավորություն կունենան, կկարողանան իրենց նախագծերի իրականացման համար գործընկերներ գտնել։

Ֆորումի բոլոր մասնակիցներին հաջողություն և արդյունավետ աշխատանք է մաղթել Հայ գործարարների ասոցիացիայի հիմնադիր նախագահ, «Տաշիր» ընկերությունների խմբի նախագահ Սամվել Կարապետյանը: Նա իր ողջույնի խոսքում նշել է․ «Երիտասարդական ձեռնարկատիրության զարգացումը երկրի տնտեսության զարգացման հենակետն է, փոքր ու միջին բիզնեսի գերակա ուղղություններից մեկը։ Մենք այսօր տեսնում ենք, թե ինչպիսի հսկայական ներուժ ունի ժամանակակից երիտասարդությունը, որքան շատ են տաղանդավոր երիտասարդները, որոնք պատրաստ են սեփական բիզնես գաղափարները կյանքի կոչել։ Այդ պատճառով կարևոր է համակողմանի կոնսոլիդացնել բոլոր ռեսուրսները, խթանել գործարար ակտիվության զարգացումը երիտասարդների շրջանում, նման նախագծերի զարգացման համար պայմաններ ստեղծել»։

Buissup գլոբալ ֆորումի շրջանակում կանցկացվեն մեկշաբաթյա կրթական և գործարար միջոցառումներ, դասախոսություններ և տարբեր ձևաչափերի քննարկումներ: Ելույթների թեմաներն են՝ ֆինանսների կառավարում, մարքեթինգ և վաճառքներ, գործարար հաղորդակցում. այն ամենը, ինչը կօգնի ապահովել սեփական ստարտափ բիզնեսի հաջող մեկնարկը և զարգացումը:

Խոսնակների մեջ խոշոր ընկերությունների, միջազգային կազմակերպությունների ղեկավարներ, հաջողած ստարտափ նախագծերի, ձեռնարկատիրության զարգացմանը նպաստող հիմնադրամների ներկայացուցիչներ և բարձր որակավորում ունեցող բիզնես թրեյներներ են, որոնք կփոխանցեն իրենց փորձը և կբացեն հաջողակ ընկերություն հիմնելու գաղտնիքները:

Buissup գլոբալ ֆորումի ծրագրով նախատեսված «Առաքելություն 2030. Հայաստանի տեխնոլոգիական ապագան և բիզնեսի զարգացումը» թեմայով պանելային քննարկմանը կմասնակցեն «Սինոփսիս Արմենիա» ընկերության տնօրեն Հովիկ Մուսայելյանը, Հայաստանի գիտության և տեխնոլոգիաների հիմնադրամի (FAST) գլխավոր տնօրեն Արմեն Օրուջյանը, «Ստարտափ Արմենիա» հիմնադրամի հիմնադիր Հակոբ Հակոբյանը, «Քրաուդֆանդինգ ֆորմուլա» ընկերության հիմնադիր Գևորգ Պողոսյանը:

Երիտասարդ ձեռնարկատերերը միջոցառման շնորհիվ հնարավորություն կունենան պրոֆեսիոնալ ժյուրիին ներկայացնել իրենց նախագծերը: Եզրափակիչ փուլ անցած մասնակիցները կկարողանան սեփական բիզնես գաղափարները սեպտեմբերի 20-ին ներկայացնել Հայկական բիզնես ֆորում 2021-ում, որին կմասնակցեն սեփական բիզնեսի դիվերսիֆիկացիայով հետաքրքրված խոշոր ընկերությունների ներկայացուցիչներ և ներդրողներ:

Հայ գործարարների ասոցիացիա

Հայ գործարարների ասոցիացիան ոչ առևտրային կազմակերպություն է, որը Ռուսաստանի և Հայաստանի միջև առևտրատնտեսական կապեր ստեղծելու և դրանք ամրապնդելու նպատակով միավորել է հայկական ծագումով հաջողակ գործարարներին: Ասոցիացիայի հիմնական առաքելությունը Ռուսաստանում նոր հայ գործարար համայնքի ստեղծումն է, որը ձեռնարկատերերի շրջանում փոխշահավետ գործընկերություններ և վստահության մշակույթ կձևավորի: Ասոցիացիայի հիմնադիրները տարիներ շարունակ Հայաստանում և Ռուսաստանում իրենց գործունեության ընթացքում զգալի ներդրում են ունեցել խոշոր բիզնեսը զարգացնելու գործում, նպաստել են երկու երկրների առևտրատնտեսական կապերի ամրապնդմանը և ռուս-հայկական ձեռնարկատիրության ոլորտում գործընկերային փոխհարաբերությունների զարգացմանը․ «Տաշիր» ընկերությունների խմբի նախագահ Սամվել Կարապետյանը, «Ավիլոն» ընկերությունների խմբի տնօրենների խորհրդի նախագահ Կամո Ավագումյանը, Comedy Club Production-ի հիմնադիր Արթուր Ջանիբեկյանը, «Տաշիր» ընկերությունների խմբի առաջին փոխնախագահ Վարուժան Արտենյանը, ՖՈՐԱ-ԲԱՆԿ ԲԱԲ տնօրենների խորհրդի նախագահ և «ՌԱՆԴ ՏՐԱՆՍ» ընկերությունների խմբի տնօրենների խորհրդի նախագահ Հայկ Իգնաթյանը, NEBO.digital ԸԽ տնօրենների խորհրդի նախագահ Կարեն Ավագումյանը, «Լուդինգ» ընկերության գլխավոր տնօրեն Արմեն Շահազիզյանը: Ասոցիացիայի ռեզիդենտներ են ոչ միայն գործող և հաջողակ, այլև ապագա ձեռնարկատերերը, որոնց զարգացման համար Ասոցիացիան կրթական միջոցառումներ է պատրաստել:

«Տաշիր» ընկերությունների խումբ

Արդյունաբերաշինարարական ընկերությունների դիվերսիֆիկացված խոշոր ռուսական խմբի կազմում ՌԴ տնտեսության տարբեր ոլորտներում գործող մոտ 200 ընկերություն և ձեռնարկություն կա: «Տաշիր» ընկերությունների խումբը 1999 թ. հիմնադրման պահից շարունակաբար ընդլայնում է ակտիվները շինարարության և կառուցապատման ռուսական շուկայում։ Այն ավելի քան 20 տարվա գործունեության ընթացքում հաջողությամբ մեծացրել է բիզնեսի ծավալները ֆինանսների, էներգետիկայի, արդյունաբերության, անշարժ գույքի, ռեստորանային բիզնեսի, ժամանցային և այլ ոլորտներում: Խումբը ՌԴ հարյուր խոշոր մասնավոր ընկերությունների շարքում է․ ավելի քան 45 հազար աշխատակիցներ՝ ՌԴ և հարևան երկրների 51 քաղաքներում: Գլխամասային գրասենյակը Մոսկվայում է։ Ընկերության հիմնադիրը և նախագահը Սամվել Կարապետյանն է: