«Իշխանություններն արդար և ազնիվ չգտնվեցին բնակչության հետ». ո՞վ է հանդուգն ստում․ «Փաստ»

«Փաստ» օրաթերթը գրում է

Պետպատվերի ծրագիրը կասեցված է մինչև 2022 թ.-ը, քաղաքացիները չեն կարողանում օգտվել անվճար բուժօգնությունից: Մյուս կողմից՝ ներկայացվում է նախագիծ, որով առաջարկվում է պետբյուջեի միջոցների հաշվին ապահովել ՀՀ նախագահի, վարչապետի և ԱԺ նախագահի ընտանիքների անդամների բժշկական օգնությունն ու սպասարկումը։ Բժիշկ-ուռոլոգ, առողջապահության կազմակերպիչ Գևորգ Գրիգորյանը նշում է՝ նախագիծը չի հակասում բնական և տրամաբանական օրենքների:

«Օրինակ՝ որ երկրի ղեկավարությունն ունենա անձնական բժիշկ, իսկ քաղաքացիները չունենան, ընդունելի տարբերակ է, որովհետև երկրի ղեկավարն ունի անձնական ինքնաթիռ, սպասարկող անձնակազմ, անվտանգության ծառայություն և այլն, և այլն: Դա օրինաչափ է, դրա վրա զարմանալ պետք չէ: Առավել ևս՝ երեք անձի և նրանց ընտանիքների համար նախատեսված անվճար բուժօգնությունը ոչ մի բանի մասին է: Դա պետպատվերը չէ, դրանք միլիարդներ չեն: Թող առողջ լինեն, ընդ որում՝ արդեն երեք տարի է՝ ասում ենք, որ երկրի վարչապետը պետք է ունենա անձնական բժիշկ, կոնկրետ մասնագիտությամբ, որ դեղերը հասցնի: Դրան միայն կողմ ենք, բայց խնդիրն այլ հարցն է:

Կառավարում են՝ չիմանալով էլեմենտար հաշվարկներ և չիմանալով իրենց խոսքի արժեքը: Տեսեք՝ պետպատվերը վերջին անգամ նման կերպ վերջացել է երևի տասը տարի առաջ, հնարավոր է՝ նույնիսկ ավելի շուտ: Այսինքն, մարդիկ հաշվարկել են, բաշխել, պլանավորել՝ ինչպես դա պետք է ծախսեն, որպեսզի բնակչությունը նման խնդրի առջև չկանգնի: Իսկ իրենք քանի որ անուս են, չեն կարողանում հաշվարկներ անել: Այլ օրինակ բերեմ. այդ ինչպե՞ս է ստացվում, որ առողջապահության ոլորտին, մեր բնակչության առողջությանը հատկացված բյուջեն սպառվում է, բայց էկոնոմիկայի նախարարն ասում է, որ երկնիշ տնտեսական աճ ենք ունենալու, ներդրումները հորդում են, «ականջներից ծորում, լողում ենք ներդրումների մեջ»:

Ինչպե՞ս է այդպես ստացվում: Եթե ներդրումներ կան, տնտեսական աճ կա, հետևաբար, բյուջե կա: Հիմա՝ կա՛մ ներդրումներ չկան, էկոնոմիկայի նախարարն է հանդուգն ստում, կա՛մ ներդրումներ կան, բյուջե էլ կա, առողջապահության նախարարն է հանդուգն ստում: Իրենք մոլորեցնում են մեր բնակչությանը, որը չի հասկանում, թե ինչ անի: Խոսում են, որ 30 տոկոսով ավելացնում են բյուջեն և այլն, բայց, ախր, դա իրականությանը չի համապատասխանում: Մեր զինվորները գնում են բուժվելու, բայց չեն կարողանում, քանի որ պետությունը չի վճարում իրենց բուժման գումարը: Պետությունը չի կատարում օրենքով նախատեսված իր պարտականությունը բնակչության առջև:

Եթե մեր բնակչությունը պատրաստ է դա ընդունել, ես էլ եմ պատրաստ: Կարող եմ ինձ թույլ տալ վճարովի բուժօգնություն ստանալ, իմ ընտանիքին վճարովի բուժօգնություն ապահովել: Մարդիկ, որոնք ընտրել են «Քաղաքացիական պայմանագիր» կուսակցությանը, ընտրել են այդ անուսներին, որոնք այսօր իրենց կառավարում են, չեն կարող իրենց թույլ տալ վճարովի բուժօգնություն, իրենք են խնդրի առջև կանգնած: Ո՞վ պետք է իրենց մասին մտածի, արդյո՞ք այն իշխանությունը չպետք է մտածի, ում իրենք ընտրել են: Այդ իշխանությունը պետք է մտածի, բայց չի մտածում»,«Փաստի» հետ զրույցում ասում է առողջապահության կազմակերպիչը:

Հոկտեմբերի 1-ից քաղաքացիները կանգնած են երկընտրանքի առջև՝ պատվաստում կամ 14 օրը մեկ ՊՇՌ թեստի հանձնում: Ժամանակին ի՞նչ չարվեց, որ հիմա պետությունն անցավ պարտադրանքի մեթոդին: «Չտարվեց նորմալ ադեկվատ պայքար կորոնավիրուսի դեմ, չարվեցին իրական հակահամաճարակային միջոցառումներ, չկիրառվեցին առողջապահական կոնկրետ գործիքներ: Հասանք այն կետին, որ պետք է պատվաստանյութեր կիրառենք: Չկարողացան ճիշտ կերպով մատուցել պատվաստանյութի արդյունավետությունը, իշխանություններն արդար և ազնիվ չգտնվեցին բնակչության հետ, որպեսզի իրեն ճշմարտությունն ասեն:

Քանի որ ինֆորմացիայի բացակայություն եղավ և առաջացավ ինֆորմացիոն վակուում, քաղաքացիները սկսեցին դավադրությունների տեսություններով առաջնորդվել, և բնական է, որ հիմա այս իրավիճակն է: Համոզված եմ, որ այս նախագիծը չի աշխատելու, սակայն եթե ժողովրդի համար ընդունելի է այս տարբերակը, ինձ համար էլ է ընդունելի: Կարող եմ ամսական վճարել և անցնել ՊՇՌ թեստի ստուգում, մեր բնակչության մեծամասնությունը չի կարող: Ունենք 40 տոկոս և ավելի աղքատություն, և հենց այդ կոնտինգենտը, երազելով ավելի լավ կյանքի մասին, ընտրել է այս իշխանություններին: Իրենք տվել են այդ լծակը իշխանություններին, որպեսզի նրանք այս ամենն անեն: Այս իրավիճակում երկու տարբերակ կա՝ համակերպվել կամ հեռացնել այս իշխանություններին, երրորդ տարբերակը, ավաղ, դեռևս չկա»,-եզրափակում է Գևորգ Գրիգորյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում