Հայոց ցեղասպանությանը նվիրված ժողովածուի շնորհանդես Բուխարեստում

 Դեկտեմբերի 17-ին Հրեական հետազոտությունների Գոլդշտայն Գորեն/Goldstein Goren կենտրոնը և Բուխարեստի համալսարանը կազմակերպեցին «Հայոց ցեղասպանությունից մինչև Շոահ. 20-րդ դարի ցեղասպանությունների տիպաբանությունը»/sDu Genocide des Armeniens a la Shoah. Typologie des Massacres du XXe siecle հոդվածների ժողովածուի շնորհանդեսը: Շնորհանդեսը տեղի ունեցավ Բուխարեստի համալսարաի քաղաքագիտության ֆակուլտետում: Գիրքը լույս է տեսել ֆրանսերեն լեզվով և խմբագրվել է Մոնպելիեյի Պոլ Վալերիի համալսարանի դասախոս, Հայաստանի Գիտությունների Ազգային Ակադեմիայի անդամ ու Կոլեժ դը Ֆրանսի թղթակից անդամ Ժերար Դեդեյանի/Gerard Dedeyan  և նույն համալսարանի դասախոս հրեական ծագումով ռումինացի Կարոլ Յանկուի/Carol Iancu կողմից: Ժողովածուն լույս է տեսել այս տարի Թուլուզում: 

Ինչպես տեղեկացնում է «Արմենպրես»-ը, գիրքը ներկայացրեցին խմբագիր Կարոլ Յանկուն, Բուխարեստի համալսարանի դասախոս Ֆելիչիա Վալդմանը/Felicia Waldman և Յաշի Ա. Դ. Քսենոպոլի անվան պատմության ինստիտուտի հետազոտող Ադրիան Չիոֆլանկան/Adrian Cioflanca, որոնք իրենց ներդրումն են ունեցել գրքում ներառված հետազոտությունների մեջ: Շնորհանդեսին ներկա էին պատմաբաններ, ցեղասպանության հարցերով մասնագետներ, հայ եւ հրեա համայնքների ներկայացուցիչներ, ուսանողներ: Միջոցառմանը հակիրճ կերպով ներկայացվեց գրքի բովանդակությունը, կառուցվաքը, ապա` հարց-պատասխան անցկացվեց լսարանի հետ: 

Գրքի խմբագիրը նշեց, որ լույս տեսնելով հենց այս տարի, գիրքը ևս մեկ անգամ հիշատակում է Հայոց ցեղասպանության 100-ամյակը: «Հայոց ցեղասպանությունից մինչև Շոահ. 20-րդ դարի ցեղասպանությունների տիպաբանություն» ժողովածուն իր մեջ ներառում է աշխարհի տարբեր երկրների մասնագետների կողմից գրված 37 հոդված, որոնց մեջ նյութը քննարկվում է տարբեր տեսանկյուններից, զուգահեռներ անցկացվում հայոց եւ հրեից ցեղասպանությունների միջև, տալիս 20-րդ դարի մարդկության դեմ գործված այդ երկու ամենամեծ հանցագործությունների համընդգրկուն պատկերը: Հետագայում գիրքը լո ւյս կտեսնի նաև անգլերեն լեզվով: