Ճապոնիան Թայվանի շուրջ իրավիճակի խաղաղ կարգավորման հույս է հայտնել

Ճապոնիայի կառավարությունը Թայվանի շուրջ հարցերի խաղաղ լուծում է ակնկալում, ասել է Ճապոնիայի արտաքին գործերի նախարար Տոշիմիցու Մոտեգին նոր կաբինետի հաստատումից հետո իր առաջին մամուլի ասուլիսի ժամանակ, հաղորդում է «ՌԻԱ Նովոստի»-ն:

Մեկնաբանելով լրագրողի հարցը Թայվանի պաշտպանության նախարարության՝ կղզու ՀՕՊ-ի նույնականացման գոտի Չինաստանի Ժողովրդա-ազատագրական բանակի (ՉԺԱԲ) ինքնաթիռների հայտնվելու կապակցությամբ Թայվանի պաշտպանության նախարարության հայտարարության վերաբերյալ դիրքորոշման մասին` Մոտեգին ընդգծել է, որ Ճապոնիայի իշխանությունները տեղյակ են իրավիճակից»:

«Ճապոնիան այն կարծիքին է, որ Թայվանի շուրջ խաղաղությունն ու կայունությունը կարեւոր ասպեկտ է եւ հարցերի խաղաղ կարգավորում է ակնկալում: Միեւնույն ժամանակ, այս տարածաշրջանում իրավիճակի զարգացմանը հետեւելուն զուգահեռ, մենք կցանկանայինք լրջորեն քննարկել մեր հետագա գործողությունների եւ անհրաժեշտ նախապատրաստման հարցը»,- հավելել է նա:

Թայվանի պաշտպանության նախարարությունը նախօրեին հայտարարել էր, որ ՉԺԱԲ-ի 52 ինքնաթիռ (այդ թվում` 34 Shenyang J-16 բազմաֆունկցիոնալ կործանիչ, 12 Xian H-6 ռազմավարական ռմբակոծիչ, երկու Su-30 կործանիչ, երկու Y-8 հակասուզանավային ինքնաթիռ եւ երկու KJ -500) մտել են կղզու ՀՕՊ նույնականացման գոտի: Թայվանի զինվորականները պարեկային ինքնաթիռ էին բարձրացրել դիտարկման համար եւ ռադիո ահազանգեր էին արձակել` պահանջելով լքել տարածքը:

Շաբաթ օրը գերատեսչությունը հայտնել էր, որ հոկտեմբերի 2-ին Թայվանի հակաօդային պաշտպանության նույնականացման գոտի է մտել ՉԺԱԲ ՌՕՈւ-ի ընդհանուր 39 ինքնաթիռ: Նախորդ ռեկորդը` 38 ինքնաթիռ, գրանցվել էր հոկտեմբերի 1-ին, երբ ՉԺՀ-ում նշում էին երկրի հիմնադրման 72-ամյակը, իսկ մինչ այդ` հունիսի 15-ին, 28 ինքնաթիռ: