«Բրեյն ռինգ»՝ ժամանակի հետ մոռացվող ինտելեկտուալ հեռուստախաղ. «Փաստ»

«Փաստ» օրաթերթը գրում է

«Բրեյն ռինգ» ինտելեկտուալ խաղն ի սկզբանե հորինել են Օդեսայի բնակիչները: Դրանք եղել են էրուդիտների ակումբի խաղացողները: «Բրեյն ռինգը» հեռուստատեսությամբ իրականացնելու գաղափարը ծագել է «Ի՞նչ: Որտե՞ղ: Ե՞րբ» հեռուստախաղի ստեղծող Վլադիմիր Վորոշիլովի մոտ դեռ 1980 թվականին: Այնուամենայնիվ, այն հնարավոր է եղել կյանքի կոչել միայն 1990 թվականի մայիսին, երբ դրա առաջին թողարկումը ցուցադրվել է հեռուստատեսությամբ: Խաղի հեռուստատեսային տարբերակի հաղորդավար դարձել է Վորոշիլովը: Սակայն ապագայում նա չի կարողացել դա շարունակել ազատ ժամանակի սղության պատճառով: Մրցույթի արդյունքում հաղորդավար է դարձել Կոզլովը: Խաղի մեկ թողարկում ներառում է մի քանի մենամարտ:

Մենամարտը տեղի է ունենում երկու թիմերի միջև, որոնք ունեն 6-ական անդամ: Պայքարը տևում է այնքան ժամանակ, քանի դեռ թիմերից մեկը, ըստ կանոնների, չի հավաքում անհրաժեշտ քանակի միավորներ: Թիմերը նստում են առանձին՝ կարմիր և կանաչ սեղանների շուրջ: Յուրաքանչյուր սեղան ունի ազդարարման կոճակ: Խաղը սկսվում է վարողի հարցով, որին պատասխանում է կոճակը առաջինը սեղմած թիմը: Հարցին սխալ պատասխանելու դեպքում հակառակորդ թիմը լրացուցիչ ժամանակ է ստանում, ապա պատասխանում:

Տրվող ժամանակը մի քանի անգամ փոփոխվել է: Սկզբում մնացած վայրկյաններն են տրվել թիմին, հետո տրվել է 60 լրացուցիչ վայրկյան, իսկ 1996 թվականից դրանք կրճատվել են մինչև 10 վայրկյան, իսկ հետո էլ կրկնակի ավելացվել մինչև 20 վայրկյան: Մեկ ճիշտ պատասխանի համար տրվել է 1 միավոր: 1990 թվականին խաղը բաղկացած է եղել մեկ մենամարտից և տևել է մինչև 6 միավոր հավաքելը: Սակայն շատ հաճախ թիմերը փորձել են կոճակը սեղմել խաղի մեկնարկի ազդանշանի հետ միասին, որպեսզի իրավունք ստանան առաջինը պատասխանել հարցին: Արդյունքում բավականին հաճախ պատասխանները սխալ են եղել: Այդ պատճառով հայտնվել է նոր կանոն, համաձայն որի, թիմի պատասխանող խաղացողը, որն 1-ին վայրկյանին է սեղմել կոճակը և սխալ պատասխան տվել, լքում է խաղասեղանը:

Եթե 3 անգամ անընդմեջ թիմը կեղծ մեկնարկ է տվել կամ սխալ պատասխանել՝ որակազրկվում է, գրանցվում է տեխնիկական պարտություն: Երբեմն օգտագործվում է մեկ խաղացողի կանոնը: Այս դեպքում սեղանին մնում է միայն մեկ խաղացող, որը ճիշտ պատասխանով կրկնապատիկ միավորներ է հավաքում: 1991-1993 թվականներին թիմերը բաժանվել են 3 լիգայի՝ ամենացածր, ամենաբարձր և չեմպիոն թիմեր: Սկզբում ցածր լիգայի երկու թիմեր են պայքարում: Հաղթող է դարձել 3 միավոր վաստակած թիմը և իրավունք է ստացել պայքարել ավելի բարձր լիգայի թիմի հետ: Նրա մրցակիցը այդ լիգայի գործող չեմպիոն թիմն է եղել: Չեմպիոն թիմերի «Ոսկե բրեյնի» համար խաղը եղել է մինչև 6 միավոր: Իսկ վեց ամիսը մեկ բարձրագույն լիգայում տեղեր զբաղեցրած թիմերի միջև պայքար էր ընթացել բացարձակ չեմպիոնի կոչման համար:

1997 և 1998 թվականներին փոխվել են անվիճելի չեմպիոնի կոչման կանոնները: Ցավոք, 1999 թվականի վերջին տեղի են ունեցել «Բրեյն ռինգի» վերջին նկարահանումները: Խաղը փակվել է ֆինանսական միջոցների սղության պատճառով: Բարձրագույն մրցանակի ՝ «Ոսկե բրեյնիի» վերջին դափնեկիրը եղել է Օդեսայի թիմը, նրանք նաև դարձել են վերջին բացարձակ չեմպիոնները: 2009 թվականին «ИграТВ»- ն որոշել է վերսկսել «Բրեյն ռինգ» հեռուստախաղը: Նոյեմբերին նկարահանվել են առաջին հաղորդումները: 2010 թվականի փետրվարին այն ցուցադրվել է СТС հեռուստաալիքով: Խաղին մասնակցել է 24 թիմ:

2013 թվականի հոկտեմբեր-դեկտեմբեր ամիսներին «Բրեյն ռինգ» է խաղացվել «Звезда» հեռուստաալիքով, իսկ խաղի մասնակիցները եղել են ռազմական դպրոցների և համալսարանների կուրսանտները: Ներկայումս էլ որոշակիորեն մոռացված «Բրեյն ռինգ» ժամանակ առ ժամանակ խաղում են հետխորհրդային երկրների տարբեր երկրներում տարբեր միջոցառումների շրջանակում, քանի որ դա շատ հետաքրքիր և կլանող խաղ է:

Մանրամասները՝ «Փաստ» օրաթերթի այսօրվա համարում