Ռուսաստանը բացում է գրպանը. գտնվել են «անհրաժեշտ միջոցներ» ՀԷՑ-ը առողջացնելու համար

Երեկ նախագահական նստավայրը հաղորդագրություն է տարածել՝ տեղեկացնելով, որ նախագահ Սերժ Սարգսյանը ընդունել է ՀՀ և ՌԴ միջև տնտեսական համագործակցության հանձնաժողովի ռուսական կողմի նախագահ, ՌԴ տրանսպորտի նախարար Մաքսիմ Սոկոլովի գլխավորած պատվիրակությանը:

Հանդիպման ժամանակ Սերժ Սարգսյանն անդրադարձել է ռուսական կողմի հետ ձեռք բերված մի շարք պայմանավորվածությունների, որոնք, ըստ էության, բավական դրական կարելի է դիտարկել Հայաստանի համար: Մասնավորապես նախագահ Սերժ Սարգսյանը ներկայացրել է հայկական կողմի չորս ձեռքբերումները՝ Հայաստանին մատակարարվող բնական գազի համար Հայաստանը հունվարի 1-ից վճարում է 165 դոլար, նախկին 189 դոլարի փոխարեն (սա, ըստ էության, նոր ձեռք բերված պայմանավորվածություն է, քանի որ դրա հետ կապված որևէ պաշտոնական փաստաթուղթ չի ստորագրված), միջկառավարական նիստի ժամանակ պայմանավորվածություն է ձեռք բերվել, որ Ռուսաստանը 200 մլն դոլարի արտոնյալ վարկ կտրամադրի՝ ՀՀ ԶՈւ-ն ժամանակակից սպառազինությամբ ապահովելու համար, նախագահը տեղեկացրել է, որ ռուսական կողմը Հայաստանի քննչական կոմիտեին է փոխանցում Ավետիսյանների ընտանիքի ոճրագործության քննությունը, և չորրորդ՝ Սարգսյանը կարևորել է Հայկական ատոմակայանի արդիականացման և գործունեության ժամկետի երկարացման պայմանագիրը, որն իրականացվելու է ռուսական կողմի վարկով և տեխնիկական աջակցությամբ:

Այս չորս ձեռքբերումների մասին խոսելուց հետո նախագահ Սարգսյանն անդրադարձել է էլեկտրաէներգիայի սակագնի թանկացման դեմ ցույցերին՝ ասելով, որ թանկացումը ստիպված քայլ էր: Այս ուղղությամբ միակ նորությունն այն էր, որ նախագահը կոչ է արել, որ միջկառավարական հանձնաժողովի կողմից դիտարկվեր «Ինտեր ՌԱՕ ԵԷՍ» ընկերության դուստր ձեռնարկության՝ Հայաստանի բաշխիչ ցանցերի գործունեության մանրազնին աուդիտի անցկացման հնարավորությունը՝ չխոսելով սակագնի բարձրացման կասեցման պահանջի մասին:

Ի՞նչ է սա նշանակում. արդյո՞ք կարելի է համարել, որ ռուսները պատրաստ են Հայաստանին հանձնել Պերմյակովին, կամ բանակին 200 մլն սպառազինություն տրամադրել ու գազը հաշվարկել ավելի ցածր գնով՝ միայն այն պայմանով, որ Հայաստանը համակերպվի էլեկտրաէներգիայի թանկացմանը: Առաջին հայացքից թվում է, թե ռուսական կողմը պատրաստ չէ ՀԷՑ-ի հարցում զիջելու, բայց ՌԴ տրանսպորտի նախարարի խոսքից պետք է ենթադրել ճիշտ հակառակը՝ ռուսական կողմը պատրաստ է զիջման գնալ նաև այս հարցում: «Կա հստակ ծրագիր՝ այդ ձեռնարկությունը ճգնաժամային վիճակից դուրս բերելու համար որոշակի միջոցառումներով և դրանք իրականացնելու համար ժամանակացույցով, ահրաժեշտ միջոցներով»,- ասել է Մաքսիմ Սոկոլովը:

Սոկոլովի խոսքի մեջ ամենակարևոր ձևակերպումը «անհրաժեշտ միջոցներն» է, որովհետև մինչև այժմ հայկական կողմը և նույն Հանրային ծառայությունները կարգավորող հանձնաժողովի նախագահ Ռոբերտ Նազարյանը կրկնում էին միայն մի բան, որտեղից գտնել այն անհրաժեշտ 23 միլիարդը, որպեսզի վճարվի էլեկտրաէներգիա արտադրող ընկերությունների պարտքը: Նազարյանի և մյուսների այս հայտարարությունները նշանակում էին, որ ՀԷՑ-ի սեփականատերը ինքը պատրաստ չէր իր ընկերությունը փրկելու համար գումար ներդնել, և այդ բեռը ռուսները որոշել էին թողնել հայ սպառողների վզին:

Հայ հասարակության ընդվզումը և բողոքի ցույցերը ռուսներին համոզեցին, որ 23 մլրդ դրամի կամ որ նույնն է՝ 50 մլն դոլարի համար չաժե հակամարտության մեջ մտնել հայ հասարակության հետ, և հիմա Սոկոլովն ասում է, որ այդ միջոցները կտա ռուսական պետությունը, քանի որ «Ինտեր ՌԱՕ ԵԷՍ»-ը ռուսական պետական ընկերություն է:

Իսկ ինչու ռուսները հենց այդպես չեն հայտարարում, որ իրենք հրաժարվում են սակագնի բարձրացումից և ՀԷՑ-ը փրկելու ու առողջացնելու այլ ռազմավարություն են մշակել:

Խնդիրն այն է, որ Ռուսաստանն էլ սեփական դեմքը փրկելու ցանկություն ունի և չի կարող հայտարարել, թե՝ կներեք մեզ: Ավելին՝ ռուսները իրենց խոստումը կկատարեն, եթե տեսնեն, որ հայ հասարակությունը չի հանդարտվում և չի ցրվում, քանի դեռ իրենք առարկայորեն չեն հրաժարվել էլեկտրաէներգիան թանկացնելու իրենց հայտից: Պայմանագիրը հասարակության և ՀԷՑ-ի միջև պետք է լինի շատ հստակ. ՀԷՑ-ը պետք է հայտարարի, որ հրաժարվում է հայտից, իսկ հասարակությունը իր պահանջը կատարված համարելով՝ գնա իր ամենօրյա գործին: Քանի դեռ ՀԷՑ-ը չի հայտարարել էլեկտրաէներգիան թանկացնելու իր հայտից հրաժարվելու մասին, պայքարը պետք է շարունակել:

Աղբյուրը՝ 1in.am