ԱԺ-ում գեներացված է շատ մեծ ծավալի ատելություն

ՄԱԿ-ի Արդարադատության միջազգային դատարանն արդեն հրապարակել է իր որոշումը՝ «Հայաստանն ընդդեմ Ադրբեջանի» գործով հրատապ միջոցներ սահմանելու Հայաստանի դիմումի վերաբերյալ։ Այս թեմայով Past.am կայքը զրուցել է փաստաբան Սերգեյ Ամիրխանյանի հետ։ Հարցին, թե ի՞նչ կարծիք ունի որոշման մասին փաստաբանն ասաց․ «Անկեղծ ասած` հրապարակած որոշմանը ծանոթ չեմ, միայն տեղյակ եմ, որ եղել է որոշում, բայց մանրամասներին զբաղվածության պատճառով չեմ հասցրել ծանոթանալ»։

Անդրադառնալով ռազմագերիների մասով կայացած որոշմանը՝ փաստաբանն ասաց․ «Ռազմագերիների մասին այդ որոշումը ինչ-որ տեղ ցույց է տալիս, որ մի քայլով առաջ գնացինք, բայց լավ չի այն, որ ռազմագերիներին վերադարձնելու պահանջը չի բավարարվել։ Այն պահանջը, որ գերիներին պետք է բարելավված պայմաններ ապահովել բավարարվել է, բայց եթե ես չեմ սխալվում մենք այսօր Եվրոպական դատարանում էլ ունենք մի շարք գործեր, որոնցով կիրառվել են որոշակի ապահովման միջոցներ, և այդ պայմանները արդեն իսկ որոշվել էր։ Եթե ՄԱԿ-ի դատարանի որոշումով պայմանները էլ ավելի լավը կդառնա լավ կլինի, բայց մեծ հաշվով դա խնդրի լուծում չի»։

Խոսելով ԱԺ-ում վերջին օրերի լարված միջադեպերի և Ալեն Սիմոնյանի հայտնի տեսանյութի մասին՝ Սերգեյ Ամիրխանյանն ասաց․ «Այն, ինչ կատարվեց վերջին մի քանի օրերին մեր ԱԺ-ում միանշանակ շատ վատ կարծիքի ենք, թե ինչի է վերածվել մեր ԱԺ-ն ընդհանուր մտքի առումով, քաղաքական առումով, իրավական առումով, քաղաքական մտքի գրեթե իսպառ բացակայության առումով։ ԱԺ-ում արդեն իսկ գեներացված է շատ մեծ ծավալի ատելություն, պատեհ, անպատեհ, ինչ-որ մեկի ցուցումով ժամանակ առ ժամանակ սրում են իրավիճակը, և առաջանում են նման խուլիգանական դրսևորումներ։ Եթե դիտարկենք հրապարակված տեսանյութերը, ապա կտեսնենք, որ գործ ունենք բազմաթիվ անձանց ներկայությամբ սեռական բնույթի հայհոյանքների, ծեծկռտուքի և միմյանց մարմնական վնասվածքներ հասցնելու դեպքերի հետ, և այս ամենը իրականում շատ վատ է։ Ես համոզված եմ, որ մեր բնակչությունը այս կառավարությանը չի ընտրել նման պահվածք դրսևորելու համար, և զարմանում եմ, թե այսքանից հետո ոնց են մարդիկ ընտրել ներկայիս կառավարությանը ինչպես նաև օրվա ընդդիմությանը։ Ինչ վերաբերում է Ալեն Սիմոնյանի հայտնի տեսագրությանը կարող եմ ասել, որ ԱԺ նախագահի կողմից նման կարծիք հնչեցնելը ես լավ չեմ գնահատում, անկախ նրանից, թե ես անձամբ ինչ կարծիք ունեմ գերիների մասով։ Իրականում գերի ընկնելը տարբեր հանգամանքներում կարող է դրսևորվել, բոլոր դեպքերում պետք է քննություն իրականացվի և հասկացվի, թե այս անձինք ինչ պայմաններում են գերի ընկել և արդյոք այդ անձանց մեղքը գերի ընկնելու մեջ եղե՞լ է, թե՞ ոչ։ Բոլոր դեպքերում իշխանության նման բարձր պաշտոն ունեցող անձինք նման հայտարարություն անելու իրավունք չունեն, եթե դեռևս հայտնի չեն գերի ընկնելու համապատասխան պատճառները, հանգամանքները, թե ինչ պայմաններում են գերի ընկել։ Եվ այդ պայմաններում այդ մարդկանց համարել դասալիքներ, պատասխանատվության ենթարկել, քրեական գործեր հարուցել կարծում եմ, որ դա ԱԺ նախագահի իրավասությանը չպատկանող հարց է։ Ինչ վերաբերում է գերի ընկնելու հանգամանքին, ապա բնականաբար անկախ ամեն ինչից կարծում եմ, որ մեծ նշանակություն ունի և մեծ դերակատարում պետք է ունենային նաև իշխանությունները, բանակի կառավարման համատեքստում, որպեսզի նման դեպքերը իսպառ բացառեին։ Այսինքն բանակում պետք է ստեղծվեր համապատասխանաբար և՛ բարոյահոգեբանական մթնոլորտ, և՛ համապատասխան դաստիարակություն, իհարկե, այստեղ խնդիրը ավելի գլոբալ է, և այդ դաստիարակություն ասվածը, իմ կարծիքով, սկսել է այլ ուղղությամբ գնալ, ինչպես իրենց տներում, այդպես և դպրոցներում, հետագայում նաև հասարակությունում, և երբ որ վերադարձած գերիներին համապատասխան գնահատական չի տրվում ինչպես իրավական այնպես էլ բարոյական, և նաև բոլորին հասարակության մեջ դիտարկում են, որպես հերոս, գուցե նրանց մի մասը իրականում հերոսություն են արել և հերոս են, բայց բոլոր դեպքերում, երբ որ առանց հանգամանքները պարզելու հերոսացնում են բոլոր այն հերոսների նման ովքեր իսկապես հերոսաբար զոհվել կամ մարտնչել են, այդ ամենը, ինչպես նաև բանակում ստեղծված բարոյահոգեբանական մթնոլորտը, ռազմական պատրաստվածությունը, ընտանիքում և հասարակության մեջ ստացած դաստիարակությունը հանգեցնում են այն ամենին ինչ ունենք այսօր»։

Սոնա Գիշյան