Արբանյակային լուսանկարներն ու փորձագետների վերլուծությունները վկայում են, որ Իրանը նախապատրաստվում է տիեզերական արձակման. AP

ՄԻՋԱԶԳԱՅԻՆ 13 Դեկտեմբեր, 2021 11:59

Իմամ Խոմենեիի անվան տիեզերակայանի արբանյակային լուսանկարները վկայում են տիեզերական արձակման հնարավոր նախապատրաստման մասին: Ինչպես տեղեկացնում է «Արմենպրես»-ը, դեկտեմբերի 12-ին այդ մասին հաղորդել է AP գործակալությունը:

Գործակալությունը նշում Է, որ արբանյակային լուսանկարները ստացել է Միացյալ Նահանգների Planet Labs ընկերությունից: Դրանք վերլուծել են Մոնտերեյի (Կալիֆոռնիայի նահանգ) Միդլբերիի Միջազգային հետազոտությունների ինստիտուտին կից Ջեյմս Մարտինի անվան Չտարածման խնդիրների ուսումնասիրման կենտրոնի մասնագետները: Նյութում կատարված գնահատման համաձայն՝ «Իրանը, կարծես, պատրաստվում է տիեզերական արձակման, մինչդեռ Վիեննայում շարունակվում են բանակցություններն աշխարհի տերությունների հետ ատոմի շուրջը գործաքի վերաբերյալ»:

Փորձագետների խոսքով՝ լուսանկարներում երևում է, որ մեկնահրապարակում տեղակայվել է արձակման ժամանակ կիրառվող սարքավորանք, բացի դրանից, ավտոմոբիլային կայանատեղում վերջին օրերին ավելի շատ են ավտոմեքենաները, քան նախկինում: AP-ի տվյալներով՝ նկատվել են նաև ակտիվացման աշխուժացման այլ նշաններ:

«Դա միանգամայն սովորական գործունեություն է արձակումից առաջ»,- նշել է Ջեյմս Մարտինի անվան Չտարածման խնդիրների ուսումնասիրման կենտրոնի աշխատակից Ջեֆրի Լյուիսը:

Հրապարակման մեջ չի ճշտվում, թե հատկապես ինչ սարք է իբր ծրագրվում արձակել: Գործակալությունը նշում է, որ ավելի վաղ Իրանի իշխանությունները հայտարարել են մի շարք արբանյակների՝ ուղեծիր դուրս բերելուն պատրաստ լինելու մասին: Իրանական միջուկային գործարքի և Թեհրանի դեմ Վաշինգտոնի պատժամիջոցների չեղակման շուրջը բանակցությունների յոթերորդ փուլը սկսվել է նոյեմբերի 29-ին Վիեննայում և դադարեցվել դեկտեմբերի 3-ին, երբ եվրոպացի մասնակիցները վերադարձել են իրենց երկրները երկխոսության շարունակումից առաջ լրացուցիչ խորհրդակցությունների համար:

Դեկտամբերի 9-ին Վիեննայում տեղի է ունեցել հերթական փուլը, որտեղ իսլամական հանրապետությունը կողմերին է ներկայացրել միջուկային գործաքի գործողության վերսկսման շուրջը համաձայնագրի նախագիծը երկու փաստաթղթերի տեսքով, որոնք նվիրված են ԱՄՆ-ի պատժամիջոցների չեղարկմանը և ատոմային ծրագրի հարցերին: