Ամանորին հաշված օրեր են մնացել, իսկ Life.panorama.am-ը շարունակում է հետաքրքրվել, թե ինչպես են տոներն անցկացնելու շոու բիզնեսի ներկայացուցիչները, որոնց մեծ մասը տոնական գիշերը կանցկացնի աշխատավայրում: Բայց ի տարբերություն նրանց, ովքեր փոքր-ինչ տխրում են կեսգիշերին տանը չլինելու պատճառով, Ջուսը ուրախ է, ավելին՝ դա Նոր տարին դիմավորելու նրա ամենասիրելի տարբերակն է.
«Միշտ սիրում եմ Նոր տարին դիմավորել աշխատավայրում՝ հենց աշխատանքի մեջ: Դրանից ես մեծ հաճույք եմ ստանում՝ մարդկանց բարձր տրամադրությունը ինձ անասելի էներգիա է փոխանցում: Այս տարի էլ պետք է հասցնեմ Նոր տարվա գիշերը մասնակցել մի քանի միջոցառումների եւ իմ ելույթներով մարդկանց ուրախացնեմ»,- պատմեց երգչուհին:
Ջուսը արդեն հասցրել է զարդարել իր տան տոնածառը. «Քանի որ այս տարի կապիկի տարի է եւ ակտուալ են արծաթագույնի ու կարմիրի երանգները, ուստի տոնածառս էլ որոշեցի այդ գույների մեջ զարդարել. տանս տոնածառը արծաթագույն է՝ կարմիր զարդարանքներով: Պետք է ասեմ, որ ինձ իսկապես երջանկացնում են ամանորյա զարդարանքները, մի տեսակ հեքիաթային տրամադրություն է հաղորդում»,- հավելեց նա:
Անկախ ամանորյա հեքիաթային տրամադրությունից՝ Ջուսը հրաշքների հավատում է միշտ, իսկ Ամանորին հատկապես. «Հրաշքների միշտ եմ հավատում, ոչ միայն Նոր տարվա գիշերը, այլեւ ընդհանրապես: Դեռ մանկուց սովորություն ունեմ երազանք պահել 12 զանգերի հնչելու հետ մեկտեղ. այդ ավանդույթը երբեք չեմ խախտում՝ մեկ էլ տեսար կատարվեց»,- ծիծաղելով նկատեց Ջուսը:
Խոսելով 2016-ի նկատմամբ իր սպասելիքներից՝ Ջուսն անդրադարձավ ինչպես մասնագիտական, այնպես էլ անձնական կողմերին. «Գալիք տարում իմ հանդիսատեսին խոստանում եմ զարմացնել անսպասելի երաժշտական անակնկալներով՝ սպասվում է նոր տեսահոլովակներ եւ նոր Ջուս, իսկ այ ինքս ինձ համար 2016-ից կխնդրեմ ճիշտ եւ ուժեղ տղամարդ, ով ինձ անվերջ կսիրի ու կասի՝ «Դու վայելիր, դու ոչ մի խնդիր չունես», - ժպտալով ասաց Ջուսն ու հավելեց,- ասեք որ հեքիաթային երազանք է»:
Հետաքրքրվելով Ջուսի ամենահիշարժան Ամանորից, երգչուհին հիշեց. «2006թ-ն էր, ես այդ տարի Ամանորն անցկացնում էի Ժելեզնովոդսկ քաղաքում: Նոր տարվա գիշերը համերգային ծրագրում տեխնիակական խոտան եղավ այն ժամանակ, երբ պարուհին պարում էր, այդ ժամանակ հանկարծ երաժշտությունը սկսեց անջատվել-միանալ, իսկ պարուհին էլ, իրեն չկորցնելով,սկսկեց տարօրինակ շարժումներ անել, իբրեւ թե հենց այդպես էլ բեմադրված էր: Այդ ժամանակ մենք այնքան ծիծաղեցինք, որ այդ բարձր տրամադրությունը ինձ համար տպավորվեց որպես ամենաուրախ Նոր տարին»:
Իսկ վերջում երգչուհին մեր միջոցով ցանկացավ նախապես հղել իր շնորհավորանքը. «Բոլորին ուզում եմ նախապես շնորհավորել գալիք Ամանորի եւ Սուրբ Ծնունդի կապակցությամբ՝ ցանկանալով լինել համբերատար եւ ուժեղ, որպեսզի հասնեն իրենց նպատակին: Ինչպես նաեւ, ուզում եմ բոլորը լինեն առողջ եւ շրջապատված անսպասելի հաջողություններով»:
