Շիրակի մարզպետը թերացող համայնքապետերին հորդորեց ավելի ակտիվ աշխատել

Շիրակի մարզի համայնքապետերը դեկտեմբերի 24-ին` մարզային խորհրդի այս տարվա վերջին նիստի ժամանակ, քննարկեցին 2015 թվականին կատարված ու թերի ծրագրերը:

Առաջինը վիճակագրությունը ներկայացնելու հնարավորություն ստացած մարզպետարանի աշխատակազմի ֆինանսական ու տնտեսական զարգացման վարչության պետ Լիպարիտ Մարտիրոսյանը նշեց, որ մարզի սեփական եկամուտների հավաքագրման վերջնական ցուցանիշներն ամփոփելու համար ժամանակ դեռ կա, սակայն այս պահի դրությամբ նախորդ տարվա նույն ժամանակամիջոցի համեմետ, նվազում  է արձանագրվել: Դեկտեմբերի 23-ի դրությամբ մարզի համայնքները բյուջեների սեփական եկամուտները կատարել են 90,8 տոկոսով, ինչը 5,4 տոկոսով պակաս է անցած տարվա ցուցանիշից: Ինչպես միշտ, այս անգամ ևս բարձր ցուցանիշ արձանագրում են մարզի քաղաքային համայնքները, իսկ թերացումը հիմնականում Ամասիայի տարածաշրջանի համայնքներինն է:

Մարզը  քաղաքաշինության ոլորտում անցած տարի ձեռքբերումներ է ունեցել. իրականացվել են ինչպես հրատապ, անօթևանների խնդրի լուծմանն ուղղված «Բնականարանի գնման վկայագիր» ծրագրերը, մշակութային, առողջապահական օբյեկտների վերանորոգման, փողոցաշինական, ջրագծերի կառուցման ու գազաֆիկացման աշխատանքներ: Կատարված աշխատանքների առյուծի բաժինն իրականացվել է պետական միջոցների հաշվին, սակայն ծրագրեր են իրականացվել նաև Սոցիալական ներդրումների հիմնադրամի և տարբեր բարեգործական կազմակերպությունների կողմից:

Հաջորդ՝ 2016 թվականին նախատեսված ծրագրերից մարզում ամենաառաջնայինը անօթևանության խնդրի լուծման «Բնակարանի գնման վկայագիր» ծրագրի երկրորդ փուլն է, ապա Ախուրյանի բնակելիների շինարարությունը և Գյումրիում հատկացրած 23 մլն եվրո գումարի շրջանակներում իրականացվելիք աշխատանքները: Կշարունակվեն նաև 2015 թվականին թերի մնացած քաղաքաշինական ծրագրերը:

Գյուղատնտեսության ոլորտում ևս դրական տեղաշարժ արձանագրվել է միայն 6 տոկոսով, ավելացել են ցանքատարածությունները, իսկ վերջին 4 տարիների ընթացքում հանրապետությունում իրականացվող սերմնարտադրության ու սերմնաբուծության ծրագրի շնորհիվ մարզում աճեցվող հացահատիկը որակական առումով աննախադեպ և, ինչպես նիստի ժամանակ նշեց մարզպետարանի գյուղատնտեսության վարչության պետ Մովսես Մանուկյանը,  մարզում արտադրվող բարձրորակ սերմնացուի շնորհիվ հանրապետության մյուս մարզերին ևս մատակարարվում է բարձրորակ սերմնացու:

Նիստի վերջում Շիրակի մարզպետը, անդրադառնալով 2015 թվականին կատարված աշխատանքներին և ընդհանարապես մարզի համայնքների թերացումներին, համայնքապետերին հորդորեց «նամուսով» աշխատել: «Ուզում եմ պարտավորեցնել՝ մի քիչ նամուսով ու լուրջ մոտենալ աշխատանքներին: Մարզում կան լավ աշխատող համայնքներ, որոնք, օրինակ, սեփական եկամուտների հավաքագրման 100 տոկոս ցուցանիշ են արձանագրել, բայց կան նաև այնպիսի համայնքներ, որոնք 26-30 տոկոս են կատարել իրենց աշխատանքը, այսինք`  ոչ մի բան չեն արել: Ժամանակ կա և կարելի է շտկել այս վիճակը: Եթե Գյումրիի հաշվի ն մարզում լավ ցուցանիշներ կարող ենք ունենալ, ապա, օրինակ, Ամասիայի տարածաշրջանի համայնքները ասես «ճահիճ» լինեն, ինչքն էլ ուզում ենք քաշել՝ ճահիճից դուրս չենք գալիս»,-նշեց Ֆելիս Ցոլակյանը՝ կարևորելով 2016 թվականի ծրագրերը: Դրանցից նա առանձնացրեց ՀՀ կառավարության կողմից Գյումրիին տրամադրած 23 մլն եվրոյի վարկի, Հյուսիս-հարավ ճանապարհի կառուցման և Վարդան Սերմաքեշի կողմից իրականացվող ծրագրերը, որոնք հեռանկարային են և իրենց դրական արդյունքը կունենան նաև մարզի սոցիալ-տնտեսական զարգացման վրա:

Մարզխորհրդի նիստի ավարտին «Բագրատունյաց ասպետ» հայրենասիրական հասարակական կազմակերպության նախագահ Սամվել Մարգարյանը կազմակերպության անունից Շիրակի մարզպետին շնորհեց «Բագրատունյաց ասպետ» մեդալ: