Տոնոյանի, Գալստյանի և մյուսների գործով դատական նիստը կանցկացվի դռնփակ. այն կշարունակվի վաղը

Երևան քաղաքի առաջին ատյանի ընդհանուր իրավասության դատարանի Ավանի նստավայրում այսօր հերթական, ինչպես նշեց փաստաբան Արմեն Հարությունյանը, անորակ հրթիռներին վերաբերող, ավելի հստակ՝ ՀՀ պաշտպանության նախկին նախարար Դավիթ Տոնոյանի, ՀՀ ԶՈՒ ԳՇ պետ Արտակ Դավթյանի, զենքի մատակարար ընկերության սեփականատեր Դավիթ Գալստյանի և մյուսների գործով դատական նիստն էր: Քրեական գործը մակագրվել է Երևան քաղաքի ընդհանուր իրավասության դատարանի դատավոր Մանվել Շահվերդյանին: «Այսօր առաջին դատական նիստն է, գործի նախաքննությունն ավարտվել է, մեղադրական եզրակացությունը հաստատվել է և ուղարկվել դատարան: Այս գործի անկյունաքարային՝ զինամթերքի որակի հարցը պետք է պարզվեր սահմանված կարգով նշանակված մասնագետների փորձաքննության արդյունքում, ինչը չի կատարվել: Մինչդեռ բազմաթիվ հարցեր կան, որ այդ հրթիռները պիտանելիության հետ կապված երբևէ որևէ խնդիր չեն ունեցել: Դրա վառ ապացույցը ՊՆ-ին ուղղված մեր հարցումների պատասխանն է, որով գերատեսչությունը հաստատել է՝ հրթիռների հետ որևէ խնդիր չկա: Կարծում եմ, որ մեղադրական կողմը խուսափում է այդ փորձաքննությունից՝ վստահ լինելով, որ այն դրական կլինի: Մյուս կողմից մեզ անհանգստացնում է այն փաստը, որ դատական գործերը շարունակում են ձեռքով մակագրվել:  Լուրջ մտավախություններ կան դատարանների օբյեկտիվության և անկախության առումով, այդ հարցը նույնպես այս գործով անհանգստացնում է»,-ասաց Դավիթ Գալստյանի փաստաբան Արմեն Հարությունյանը:

Գալստյանի փաստաբան Արմեն Անդրիկյանն էլ հիշեց Գլխավոր դատախազի տեղակալ Գևորգ Բաղդասարյանի լրագրողների հետ զրույցից մի հատված այն մասին, որ «նա չի բացառում, որ փորձաքննության արդյունքում կլինեն հրթիռներ, որ կպայթեն: Նախաքննության ողջ ընթացքում մեր նախաձեռնությունն այն էր, որ փորձաքննությունն անցկացվի, հիմա Դատախազությունն առանց փորձաքննության նախաքննությունն ավարտել է և մեղադրական եզրակացության գործն ուղարկել է դատարան, բայց դրան զոււգահեռ պարոն Բաղդասարյանը հայտարարում է, որ կլինեին հրթիռներ, որոնց որակի  հետ խնդիրներ չէին առաջանա: Սա ուղղակի զավեշտ է, պետք է լիներ փորձաքննություն, նոր հետո մեղադրական եզրակացությունն ուղարկվեր դատարան»,-նշեց փաստաբան Անդրիկյանն՝ ընդգծելով, որ իրենց ներկայացրած փաստաթղթերին գնահատական չի տրվել, իսկ միջնորդությունները մերժվել են: «Տպավորությունն է, թե խնդիր է դրված գործն ուղարկել դատարան, հասնել դռնփակ նիստի և արդյունքում մարդկանց պահել անազատության մեջ»,-եզրափակեց Անդրիկյանը:  

Դատական նիստի մեկնարկից մոտ ժամ անց լրագրողների հետ ճեպազրույցում նույն գործով կալանավորված Ավետիք Մուրադյանի պաշտպան Երեմ Սարգսյանը նշեց, որ միջնորդել էին, որպեսզի դռնբաց դատական նիստ անցկացվի: «Պաշտոնատար տարբեր անձինք պարբերաբար իրենց ցանկալի մեկնաբանություններով կոնտեքստից կտրված տվյալներ էին ներկայացնում: Այս ամենի արդյունքում հասարակության մեջ կարծիք է ձևավորվել, թե հրթիռները պիտանի չեն, մինչդեռ հակառակն է: Պաշտպանական կողմի նպատակն էր, որ նիստերը դռնբաց անցնեն, ցավոք, դատարանը մնաց իր դիրքորոշմանը: Որպես պատճառաբանություն նշվում է պետական գաղտնիքի փաստը: Այս գործում այն ամենն, ինչը կարող էր սպառնալիք լիներ պետական անվտանգությանը, պետական մարմիններն առաջին օրվանից սկսած հրապարակել են: Բոլոր ամբաստանյալները և պաշտպանները կողմ էին դռնբաց դատական նիստերի անցկացմանը, այդ դեպքում հանրությունը կտեսներ, թե իրականում ինչ է տեղի ունենում»,-ասաց Սարգսյանը:

ՀՀ պաշտպանության նախկին նախարար Դավիթ Տոնոյանի փաստաբան Սերգեյ Հովհաննիսյանի համար ևս տարակուսելի էր, թե ինչու հատկապես դատական այս նիստը անցկացվեց դռփակ, երբ պետք է քննարկվեին դատավորին ինքնաբացարկ հայտնելու, ինչպես նաև կալանավորված անձանց խափանման միջոցը փոխելու հարցերը: Նշեց՝ այս պարագայում պետական գաղտնիքի մասին խոսք լինել չի կարող:

Դատական նիստի ավարտին Երեմ Սարգսյանը տեղեկացրեց, որ նիստի ընթացում դատավորը հետաքրքրվել է՝ պաշտպանական կողմն ունի՞ ինքնաբացարկի միջնորդություն, թե՞ ոչ: «Խնդրեցինք մի շարք պարզաբանումներ՝ ի՞նչ կարգով է մակագրությունը կատարվել իրեն: Բնականաբար, համակարգչով չի արվել, այլ մակագրվել է դատարանի նախագահի կողմից: Հետո խնդրեցինք հայտնել տվյալ՝ արդյո՞ք ձեռքով մակագրությունը կատարվել է օրենքով սահմանված կարգով դատավորների ազգանվան բնական հերթականությամբ: Դատարանն ասեց, որ գործում նման տվյալ չկա, միջնորդեցինք, որպեսզի դատարանը նախագահից պարզի և փաստական տվյալ ներկայացնի՝ այդ կարգը պահպանվե՞լ է: Դատարանը որոշեց այդ միջնորդությունը բավարարել: Դատական նիստը հետաձգվեց: Այն կշարունակվի հունվարի 20-ին»,-հավելեց Սարգսյանը:

Լուսինե Առաքելյան