Նոր սահմանափակումները ես օրինաչափ չեմ համարում

Հունվարի 22-ից հանրային վայրեր մուտքը թույլատրվում է միայն պատվաստման հավաստագիր կամ ՊՇՌ թեստի բացասական արդյունք ներկայացնելու դեպքում։ Որոշ դեպքերում այս գործընթացը չի վերահսկվում, իսկ որոշ տեղերում էլ սկանավորման տարբերակով է գործում։ Այս թեմայի մասին Past.am կայքը զրուցել է բժշկական գիտությունների դոկտոր, պրոֆեսոր Պետրոս Անանիկյանի հետ։

Հարցին, թե արդյո՞ք անհրաժեշտություն կար նման որոշման, և ի՞նչ արդյունք կունենա այս որոշումը պրոֆեսորն ասաց․ «Անկեղծ ասած ես դեռ չեմ լսել նման դեպք, որ մարդիկ հանրային վայրերում վարակվեն, եթե նույնիսկ կան՝ շատ քիչ են, իսկ հիմնական դեպքերը լինում են հանրային տրանսպորտներում, որտեղ շատ են վարակվում, սակայն տեսնում ենք, որ տրանսպորտները գործում են։ Ես չեմ կարծում, որ նման որոշման անհրաժեշտություն կար, և չեմ համարում, որ այդ որոշումը օրինաչափ է, բայց ունենք այն ինչ ունենք, կան բաներ, որոնց դեմ մենք արդեն չենք կարող պայքարել»։

Անդրադառնալով կորոնավիրուսով դեպքերի ավելացմանը և մահացածության թվի նվազմանը՝ պրոֆեսորն ասաց․ «Դա կապված է նոր օմիկրոն շտամով վարակման հետ։ Օմիկրոնը բավականին վարակիչ է և արագ տարածվող, բայց շատ ավելի թեթև է, թոքերին չի խփում, մահվան դեպքեր գրեթե չկան, միայն ֆորսմաժոր դեպքեր են մահվան, և տևում է ընդամենը 7 օր»։

Հարցին, թե արդյոք գարնան ամիսներին նոր ալիքներ սպասելի են Պետրոս Անանիկյանն ասաց․ «Չեմ կարող ասել, կանխատեսումներ չեմ անի, բայց ինձ մոտ տպավորություն է, որ աշխարհը հետ է վերադառնում և մինչև գարնան վերջ կարծում եմ, որ կավարտվի»։

Սոնա Գիշյան