Զելենսկին և Բայդենը տարաձայնություններ ունեն Ռուսաստանի շուրջ

Ուկրաինայի նախագահ Վոլոդիմիր Զելենսկու և ԱՄՆ առաջնորդ Ջո Բայդենի վարչակազմի միջև լարվածությունն աճում է՝ կապված Ուկրաինայի վրա Ռուսաստանի հարձակման սպառնալիքի շուրջ կարծիքների տարբերության հետ, գրում է CNN-ը։

Զելենսկին հոգնել է ԱՄՆ-ի «չափազանց ուշադրությունից» ռուսական սպառնալիքի նկատմամբ, ինչը, ըստ Կիևի, միայն խուճապ է առաջացնում երկրի ներսում։ Միաժամանակ, Վաշինգտոնը հրաժարվում է կանխարգելիչ պատժամիջոցներ կիրառել Ռուսաստանի դեմ։ Բացի այդ՝ աղբյուրները նշում են, որ Կիևը վրդովված է ԱՄՆ-ի կողմից դիվանագետներին երկրից տարհանելու որոշումից։ Նախօրեին Զելենսկին սխալ էր անվանել Ուկրաինայից մի քանի երկրների դեսպանատների աշխատակիցների հեռանալը։ Նրա խոսքով՝ լարվածության աճի ֆոնին Կիևին անհրաժեշտ է դաշնակիցների ներկայությունը երկրում, ինչը «ավելի իմաստալից է և ավելի խոսուն, քան հազարավոր խոսքերը» աջակցության մասին։ Ուկրաինական իշխանությունները դժգոհ են նաև այն փաստից, որ Վաշինգտոնը Ռուսաստանի մոտալուտ ներխուժումն անխուսափելի է համարում, նշում է հեռուստաալիքը։

Բայդենը և նրա վարչակազմը, իրենց հերթին, զայրացած են, որ Զելենսկին նսեմացնում է ռուսական սպառնալիքը։ «Ինչո՞ւ եք վիճաբանություն սկսում ԱՄՆ-ի հետ։ Ինչո՞ւ եք տեղեկատվության արտահոսք և խեղաթյուրում տարածում, եթե Միացյալ Նահանգները գրեթե ձեր միակ իսկական ընկերն է: Իսկ ինչո՞ւ ավելի շատ զենք խնդրել, երբ ասում եք, որ սպառնալիքը չի փոխվել»,֊հռետորական հարց է հնչեցրել է CNN-ի զրուցակիցը։

Politico-ն, հղում անելով աղբյուրներին, գրում է, որ Ուկրաինայի նախագահի վերաբերմունքը փոխվել է Բայդենի վարչակազմի գործողությունների նկատմամբ աճող զայրույթի պատճառով և մտավախություն ունի, որ ԱՄՆ-ն ուռճացնում է ՌԴ նախագահ Վլադիմիր Պուտինից եկող սպառնալիքը, քանի որ դա հետագայում թույլ կտա համաձայնություն ձեռք բերել Կրեմլի հետ, այդ թվում՝ Դոնբասի շուրջ։ Ինքը՝ Վաշինգտոնը, ինչպես նշում է թերթը, հերքում է դա։

Զելենսկին արտասահմանյան լրատվամիջոցների լրագրողների հետ հանդիպման ժամանակ խնդրել է դադարել ասել, որ «վաղը պատերազմ կլինի»։ Ուկրաինացիներին ուղղված ուղերձում պետության ղեկավարը կոչ է արել խուճապի չմատնվել և պաշտպանել իրենց ուղեղները «անհեթեթությունից»։

Սպիտակ տանը, պատասխանելով ռուսական հնարավոր ագրեսիայի վերաբերյալ Ուկրաինայի կասկածներին, ասել են, որ ոչ ոք չի կարող իմանալ, թե ինչ կա Պուտինի գլխում։ «Մենք սահմանին ագրեսիվ գործողությունների և նախապատրաստական ​​աշխատանքների աճ ենք տեսնում», - ասել է Սպիտակ տան մամուլի քարտուղար Ջեն Փսակին՝ հավելելով, որ Մոսկվան պատրվակ է փնտրում էսկալացիայի համար։