Այս Սահմանադրությունը միանշակ պետք է փոխվի

Հաստատվեց Սահմանադրական բարեփոխումների խորհրդի կազմը։ Նիկոլ Փաշինյանը հայտարարեց՝ «Այն, որ Սահմանադրական բարեփոխումների խորհուրդ է ձևավորվում, ամենևին փաստ չէ, որ Հայաստանում սամանադրական փոփոխություններ պետք է իրականացվեն»։

Այս թեմայի մասին զրուցել ենք իրավապաշտպան Արթուր Սաքունցի հետ։

Հարցին, թե ի՞նչ ակնկալիք կան այս գործընթացից` իրավապաշտպանն ասաց․ «Ես հայտը ներկայացրել եմ և գնում եմ խորհրդի աշխատանքներին մասնակցելու՝ սահմանադրական փոփոխությունների գործընթացին մասնակցելու համար»։

Հարցին, թե ի՞նչ փոփոխություններ պետք է լինեն` իրավապաշտպանն ասաց․ «Այս Սահմանադրությունը միանշակ պետք է փոխվի, որովհետև չի ապահովում իշխանությունների տարանջատման և փոխզսպման սկզբունքը։ Մենք բազմիցս տարբեր ժամանակներում՝ սկսած 2015 թվականից այդ մասին բարձրաձայնել ենք։ Եվ ժամանակն էլ ցույց տվեց, որ մեր մոտեցումները հիմնավոր էին, որ այս Սահմանադրությունը ժողովրդավարական կառավարման Սահմանադրություն չէ։ Արդեն նշեցի իշխանությունների տարանջատման ու փոխզսպման սկզբունքը, մարդու իրավունքների՝ հատկապես սոցիալական ու տնտեսական բլորկը չի երաշխավորում։ Չի երաշխավորում պառլամենտական արդյունավետ վերահսկողություն գործադիր իշխանության և դրա ենթակա կառույցների գործունեության նկատմամբ՝ քննչական մարմիններ, ԱԱԾ, ՊԵԿ։ Չի ապահովում դատական իշխանության անկախությունը։ Այսինքն, այս Սահմանադրության հիմքում միակուսակցական կառավարման կոնցեպտն է դրված՝ հանձինս քաղաքական մեծամասնության։ Չկա մի բնագավառ, որն այս Սահմանադրությամբ երաշխավորված կլինի ժողովրդավարական սկզբունքներով»։

Սոնա Գիշյան

www.1or.am