«ԵՊՀ մշակույթի կենտրոնի առաջին նպատակը կրթելն է, հաջորդը` ճաշակ ձևավորելը». «Փաստ»

«Փաստ» օրաթերթը գրում է

ԵՊՀ-ի երգչախմբի մասին տեղեկացա նրանց ֆեյսբուքյան էջից: Արխիվային լուսանկարն առիթ դարձավ խոսելու ԵՊՀ մշակույթի կենտրոնի երգչախմբի գեղարվեստական ղեկավար Կարեն Սարգսյանի, ինչպես նաև մշակույթի կենտրոնի տնօրեն Կարինե Դավթյանի հետ: Տիկին Դավթյանը նշում է՝ աշխարհի բոլոր լավագույն համալսարաններն ունեն մշակույթի կենտրոններ: ԵՊՀ-ում մշակույթի կենտրոն ունենալու միտքն առաջացավ այն ժամանակ, երբ 2005 թ.-ին ստեղծվեց համալսարանական թատրոն-ստուդիան: «Ներկայացումների ժամանակ պետք էին լինում երաժշտական, պարային կտորներ: Թատրոնն արդեն մեկ տարի գործում էր, երբ ԵՊՀ ռեկտոր Արամ Սիմոնյանին առաջարկություն արվեց մշակութային կենտրոն ստեղծել:

Ծրագիրը գրվեց իմ կողմից, ի սկզբանե պատկերացնում էի, որ կենտրոնը պետք է ունենա երգչախումբ, պարային համույթ, թատրոն և իրականացնի այլ ծրագրեր ևս: Յուրաքանչյուր ուղղությամբ աշխատում են պրոֆեսիոնալներ: Երգչախումբը ղեկավարում է ՀՀ վաստակավոր արտիստ Կարեն Սարգսյանը, խմբավարն է Ռուբեն Կարասեֆերյանը, պարային համույթի ղեկավարը Անի Հարոյանն է, թատրոն-ստուդիան ղեկավարում եմ ես: Մեկ տարի առաջ էլ ստեղծեցինք «YSU BAND»-ը, որի գեղղեկավարն է Սարգիս Բաժբեուկ- Մելիքյանը: Մեր գործունեության 15 տարվա ընթացքում համալսարանական թատրոնը մասնակցել է «Հայֆեստ» և «Արտֆեստ» միջազգային թատերական փառատոններին, որտեղ, օրինակ՝ «Ռոմեո և Ջուլիետ» ներկայացման համար արժանացել ենք հատուկ մրցանակի»,-«Փաստի» հետ զրույցում ասում է տիկին Դավթյանը՝ շրջվելով և ձեռքով ցույց տալով արձանիկները:

Ի դեպ, սենյակի մի պատն ամբողջությամբ ծածկված է շնորհակալագրերով ու պատվոգրերով, իսկ մյուս պատից ողջունում են Վիլ յամ Սարոյանի և Խորեն Աբրահամյանի լուսանկարները: Երգչախումբը ևս մասնակցել է համապետական ու միջազգային մրցույթների, արժանացել Գրան պրիի, երգչախմբի մեներգիչմեներգչուհիները ևս արժանացել են առաջին մրցանակների, ոսկե մեդալների: «ԵՊՀ-ն Ֆրանկոֆոն համալսարանների ասոցիացիայի (AUF) անդամ է, որն անցած տարի տոնում էր իր 60-ամյակը: Այդ առիթով իրենց կազմում ընդգրկված համալսարանների շրջանում երգչախմբերի մրցույթ էին հայտարարել` օնլայն տարբերակով: Մեր երգչախմբի տեսանյութը ևս ուղարկեցինք: Արդյունքում ընտրել էին տասը երգչախումբ, մեր տարածաշրջանից միայն ԵՊՀ-ի երգչախումբն էր: Գովեստի խոսքեր հնչեցին, իսկ մրցույթն էլ հեռարձակվեց առաջատար ՀԸներով»,-որպես արված աշխատանքի արդյունք այս հաջողությունը ներկայացնում է մեր զրուցակիցը:

Ընդգծում է` այս ամենին զուգահեռ իրականացվում են մի շարք ծրագրեր ևս, օրինակ՝ «Մշակութային դաստիարակություն» ծրագիրը, որի շրջանակներում ուսանողներն այցելում են թանգարաններ, թատրոններ, դասական համերգներ: «Ինչու ենք ստեղծել այս կենտրոնը, քանի որ կարևորում ենք մշակույթի բարերար ազդեցությունը մատաղ սերնդի դաստիարակության, որպես մարդ ու քաղաքացի ձևավորման հարցում: Մեր նպատակը երիտասարդներին որակյալ արվեստին մոտեցնելն է: Մեզ հյուրընկալում են արվեստագետներ, բավականին հետաքրքիր քննարկումներ և հանդիպումներ են տեղի ունենում»,-ընդգծում է տիկին Դավթյանը: Ի դեպ, կատարվող աշխատանքներին մեծապես նպաստում է մշակույթի կենտրոնի՝ ուսանողներից կազմված «ՆԻԿԵ» կամավորական ջոկատը, որում ընդգրկված ուսանողներն աջակցում են Մշակույթի կենտրոնի ծրագրերի իրականացմանը: ԵՊՀ մշակույթի կենտրոնի երգչախմբի գեղղեկավար Կարեն Սարգսյանն ասում է՝ երգչախմբում հիմնականում աղջիկներ են, տղաներ ևս կան, հավելում է` ուսանողները, որոնք մասնակից են մշակութային կենտրոնի աշխատանքներին, պետք է պատասխանատու լինեն:

«Մեր նպատակը համալսարանի ուսանողներից պրոֆեսիոնալ երգիչներ պատրաստելը չէ, այլ առաջին հերթին նրանց կրթելը: Ուսանողական երգչախմբում հոսունությունը բավականին մեծ է, դա լրացուցիչ դժվարություններ է ստեղծում, բայց համբերատար անում ենք մեր աշխատանքը»,- «Փաստի» հետ զրույցում ասում է Սարգսյանը:

 

Շեշտում է` իրենց հարգող բոլոր համալսարաններն ունեցել են մշակութային խմբեր, կենտրոններ և հատկապես երգչախմբեր: «Դրանք կարևոր միավորումներ են: Համալսարան կա, որը մի քանի հարյուր տարվա պատմություն ունի, և նույնքան ժամանակ նաև նրա երգչախումբն է գործում, օրինակ` Գերմանիայի Հայդելբերգի համալսարանը: ԵՊՀ-ի դեպքում պատմությունն այսպիսին է: 1960-ական թթ., երբ Հովհաննես Չեքիջյանն արդեն մի քանի տարի ղեկավարում էր Հայաստանի ակադեմիական կապելլան, հրավեր է ստանում Համալսարանի ղեկավարությունից և ստեղծում է մոտ 80 հոգանոց երգչախումբ: 1976 թ.-ին համալսարանի երգչախմբի գեղղեկավարը Խորեն Մեյխանեջյանն էր, ինձ էլ հրավիրեցին մասնակից դառնալու երգչախմբի աշխատանքներին, այդ ժամանակ ավարտական կուրսում էի: Միասին վերականգնեցինք համալսարանական երգչախումբը: Ի դեպ, այս բոլոր փուլերում երգչախումբն ուղևորություններ է ունեցել դեպի տարբեր երկրներ»,-նշում է մեր զրուցակիցը, իսկ տիկին Դավթյանն էլ հավելում է` երբ 2006 թ.-ին Խորեն Պալ յանին հրավիրեց երգչախումբ «հավաքելու», վերջինս առողջական խնդիրների պատճառով չկարողացավ դա անել, բայց հենց նրա շնորհիվ Կարեն Սարգսյանը նորից եկավ ու վերակենդանացրեց ԵՊՀ-ի երգչախումբը: Որպես Մշակույթի կենտրոնի հաջողություն նշում են` Համալսարանի 100-ամյակի առիթով Սունդուկյանի անվան թատրոնում ներկայացրել են Տիգրան Չուխաջյանի «Կարինե» օպերետը:

«Երբ սկսեցինք աշխատանքները, ուսանողները զարմացած էին՝ ինչ ենք ստանալու: Տքնաջան աշխատանքի արդյունքում կարողացանք բեմադրել օպերետը, ընդ որում՝ «Կարինեն» նորովի մատուցեցինք»,-ասում է երգչախմբի գեղղեկավարը: Ընդգծում է` խմբերգային երաժշտությունը գանձ է, որը պետք է պահպանել ու զարգացնել: «Երգչախմբում երգելը տալիս է ներդաշնակության, մեկը մյուսին հարգելու զգացողություն, մտածողոթյուն է փոխում: Տպավորություն չստեղծվի նաև, թե երգչախմբի անդամն ուղղակի գալիս, երգում ու տուն է գնում: Նրան փոխանցում ենք մեր անձնական փորձը, ամեն փորձի ժամանակ հետաքրքիր պատմություններ ներկայացնում»,-հավելում է Սարգսյանը:

Զրուցակիցներս մշակույթի կենտրոնի աշխատանքների մեջ կարևորում են ուսանողների դաստիարակության խնդիրը: «18 -19 տարեկան ուսանողը, որն օպերային ներկայացում է երգել, հուզվել է, պատրաստի ունկնդիր է, նա հաճույքով նաև «Տրավիատա» կլսի, քանի որ պատկերացնում է, թե ինչ էր կատարվում կուլիսներում, ինչ աշխատանքի արդյունք է ներկայացվում բեմից: Նորից եկանք կրթության կարևորությանը: Մարդու դժբախտության հիմքում կրթության պակասն է: Մեր կենտրոնի առաջին նպատակը կրթելն է, հաջորդը` ճաշակ ձևավորելը»,-ասում է երգչախմբի գեղղեկավարը, իսկ կենտրոնի տնօրենն էլ հավելում է. «Բեմի վրա չի կարող անգրագետ մարդ լինել, նա հետաքրքիր չէ: Երբ մարդը բարձրանում է բեմ, նա պետք է արդեն ասելիք ունենա, հանդիսատեսը զգում է ամեն մանրուք, չիմացությունը` հատկապես»: Մշակույթի կենտրոնում վստահ են՝ իրենց ցանկացած նախաձեռնություն կյանքի կկոչվի, համալսարանը ստեղծել է կառույցը և հոգում է ամեն ինչի մասին:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում