2022 թվականի ոչ աշխատանքային օրերի ժամանակացույցը

«Տոների և հիշատակի օրերի մասին» օրենքը սահմանում է Հայաստանի Հանրապետությունում նշվող բոլոր տոնական և հիշատակի օրերը:

Araratnews.am-ը ներկայացնում է 2022 թվականի ոչ աշխատանքային օրերը։ 

1․ 2021 թվականի հոկտեմբերի 27-ին ԱԺ-ը որոշում ընդունեց հունվարի 2-ը, 3-ը, 4-ը, 5-ը և 7-ը հանել տոնական օրերի ցանկից։ Այսպիսով Ամանորյա և Սուրբ ծննդյան տոն օրերն են դեկտեմբերի 31-ը, հունվարի 1-ը և 7-ը։ 

2․ Հունվար ամիսն ունի ևս մեկ տոնական և ոչ աշխատանքային օր։ Այն հունվարի 28-ն է՝ Հայոց բանակի կազմավորման օրը։ 1992 թ. հունվարի 28-ին Կառավարությունը ընդունեց «Հայաստանի Հանրապետության Պաշտպանության նախարարության մասին» պատմական որոշում` դրանով իսկ իրավականորեն ազդարարելով Հայոց ազգային բանակի ստեղծումը: 

3․ Մարտ ամսին տոնում են աշխատավոր կանանց միջազգային օրը։ «ՀՀ տոների եւ հիշատակի օրերի մասին» օրենքի համաձայն, մարտի 8-ը, որպես կանանց տոն, սահմանվել է ոչ աշխատանքային օր:

4․ Ոչ աշխատանքային է Հայոց ցեղասպանության զոհերի հիշատակի օրը՝ ապրիլի 24-ը։ Այդ օրը Օսմանյան կայսրության իշխանության ղեկին կանգնած երիտթուրքական «Իթթիհաթ վե թերաքի» կուսակցության կողմից կազմակերպվել է ցեղասպանություն, որի հետևանքով 1915-1923 թվականներին զանգվածային տեղահանության է ենթարկվել և բնաջնջվել Օսմանյան կայսրության նահանգների, այդ թվում՝ Արևմտյան Հայաստանի հայ բնակչությունը։ 

5․ Մայիսի 1-ն իր ժամանակակից ձևով առաջացել է 19-րդ դարի կեսերին աշխատանքային շարժման մեջ, որի առաջ քաշած հիմնական պահանջներից մեկը 8-ժամյա աշխատանքային օրվա անցումն էր։ Մայիսի 1-ը՝ որպես ազգային տոն, պաշտոնապես նշվում է շատ երկրներում, այդ թվում նաև Հայաստանում։ 

6․ Մայիսի 9-ին նշում են հաղթանակի և խաղաղության տոնը։ Հայաստանում և Արցախում մայիսի 9-ը եռատոն է` Հայրենական պատերազմի հաղթանակի, Շուշիի ազատագրման և Արցախի ՊԲ–ի կազմավորման օրը։

7․ 1918 թվականի մայիսի 28-ին տոնում են Հայաստանի առաջին հանրապետության անկախությունը խորհրդանշող ազգային օրը։ Մայիսի 28-ը Հայաստանում համարվում է ազգային տոն։

8․ Հուլիսի 5-ին նշվում է ՀՀ Սահմանադրության տոնը, նույն օրը նշվում է նաև պետական խորհրդանիշների օրը։ Հայաստանի Սահմանադրությունը Հայաստանի իրավական համակարգի հիմքն է՝ երկրի հիմնական օրենքը, որին պետք է համապատասխանեն մյուս բոլոր օրենքներն ու իրավական ակտերը։ Սահմանադրությունը նաև արժեքաբանական-գաղափարական փաստաթուղթ է, որը սահմանում է հասարակության կազմակերպման ամենահիմնական սկզբունքները, որոնց գործնական կիրառմանը և ամրապնդմանը պետք է ձգտի պետությունը։

9․ Անկախության տոնը Հայաստանի պետական և ազգային տոներից մեկն է։ Այն նշվում է ամեն տարի սեպտեմբերի 21-ին։ 1990 թվականի օգոստոսի 23-ին Հայաստանի գերագույն խորհուրդը ընդունել է Հայաստանի անկախության հռչակագիրը, որտեղ նշված էր, որ ՀԽՍՀ-ն կազմալուծվում է, և ձևավորվում է նոր պետություն՝ Հայաստանի Հանրապետությունը։ 1991 թվականի սեպտեմբերի 21-ին հայ ժողովուրդը անկախության հանրաքվեի ժամանակ կողմ է քվեարկել ԽՍՀՄ կազմից դուրս գալու օգտին։ Հայաստանը լիակատար անկախություն է ձեռք բերել 1991 թվականի դեկտեմբերի 26-ին։

Հիշեցնենք, որ Աշխատանքային օրենսգրքի համաձայն՝ աշխատանքային` տոնական և հիշատակի օրերի նախօրյակին աշխատանքային օրվա տևողությունը կրճատվում է մեկ ժամով, բացառությամբ կրճատ և ոչ լրիվ աշխատանքային ժամանակի պայմաններով աշխատող աշխատողների: