Ադրբեջանի համար բարենպաստ պայմաններ են ստեղծվել

Աննախադեպ պատերազմ է, պատմություն է կերտվում, հրթիռակոծությունների և կրակոցների նման ինտենսիվություն երկրորդ համաշխարհային պատերազմից հետո չի եղել: «Փաստինֆո»-ի հետ զրույցում հայտարարեց ռազմական փորձագետ Վան Համբարձումյանը՝ անդրադառնալով ռուս-ուկրաինական այսօր սկսված պատերազմին:

Հիշեցնենք, որ ՌԴ նախագահ Վլադիմիր Պուտինն այսօր վաղ առավոտյան հայտարարել է հատուկ ռազմական գործողություն սկսելու մասին: Ուկրաինայի նախագահ Վլադիմիր Զելենսկին էլ Ուկրաինայի ողջ տարածքում ռազմական դրություն է մտցրել ու հայտարարել Ռուսաստանի հետ դիվանագիտական հարաբերությունները խզելու մասին։

Մեզ հետ զրույցում փորձագետ Վան Համբարձումյանը չբացառեց , որ ռուս-ուկրաինական հակամարտությունը հնարավոր է վերածվի շատ մեծ պատերազմի.

«Երբ Ռուսաստանը շատ խորանա պատերազմի մեջ ու շատ կորուստներ ունենալ, ապա վրացական կողմը նույնպես հարձակվելու է Աբխազիայի և Հարավային Օսեթիայի վրա, վրացիները նստած հաշվում են՝ եթե ռուսական բանակը շատ կորուստներ ունենա, կարելի է հանգիստ խփել Ռուսաստանին, Արևմուտքը դա էլ ուզում է, որ մաքսիմալ թուլացնի Ռուսաստանը»,-ասաց փորձագետը:

Վան Համբարձումյանը հայտարարեց, որ ստեղծված աշխարհաքաղաքական բարդ իրավիճակի ֆոնին Ադրբեջանի համար բարենպաստ պայմաններ են ստեղծվել Հայաստանի վրա հարձակվելու համար:

Ըստ նրա՝ քանի ողջ աշխարհի ուշադրության կենտրոնում ռուս-ուկրաինական պատերազմն է, իսկ Ռուսաստանի «գլուխը խառն է» Ադրբեջանը փորձելու է մաքսիմալ օգտվել առիթից և քայլեր է ձեռնարկելու նոր տարածքներ նվաճելու ուղղությամբ՝ հատկապես Սյունիքի հատվածում, ավելին՝ փորձագետը պնդեց, որ այժմ Սյունիքն, առավել քան երբևէ, վտանգված է.

«Այս ամենը բումերանգի նման գալու է խփի Հայաստանը: Երբ Ռուսաստանի «գլուխը խառն է» լինում, Ադրբեջանն ակտիվանում է: Ադրբեջանի համար բարենպաստ պայմաններ են ստեղծվել, նրանք օգտվելու են առիթից, իսկ Հայաստանը պատերազմից հետո չի զինվել, մեր ԶՈՒ-ն անմարտունակ է, չեն կարողանալու արժանի հակահարված տալ, Հայաստանում հասարակությունը պառակտված է, Ռուսաստանի գլուխն էլ խառն է, Ադրբեջանն այս բարենպաստ պայմաններն օգտագործելու է, որպեսզի ավելի շատ տարածքներ մեզանից վերցնի՝ խոսքը գնում է Սյունիքի մասին: Ադրբեջանն անհամբեր սպասում է՝ երբ է աշխարհն ավելի խառը լինելու, որպեսզի օգտվեն այդ խառը վիճակից, երբ Ուկրաինային և Ռուսաստան են պատերազմի մեջ, Արցախը կամ Սյունիքն էլ ոչ մեկի աչքին չեն գալիս »,-նշեց փորձագետը:

Իսկ թե ստեղծված իրավիճակում որո՞նք պետք է լինեն Հայաստանի քայլերը, փորձագետը նշեց՝ Հայաստանը պետք է զինված ուժերը բերի մարտական պատրաստվածության, պետական բոլոր մարմինները պետք է պատրաստել նրան, որ երկիրը կարող է ամեն պահի անցնել ռազմական դրության, զինված ուժերը պետք է մոբիլիզացնել, պետք է զինել սահմանամերձ բնակչությանը, ռազմական վարժություններ անցկացնել՝ հատկապես Սյունիքում, ինչպես նաև պետք է անհապաղ է Ուկրաինայից տարհանել հայերին: