Պուտինը հայտարարել է, որ Ուկրաինայում օտարերկրյա վարձկաններ կան

Ուկրաինայում ռազմական գործողությունների ընթացքը ցույց է տալիս, որ Ռուսաստանը կռվում է հենց նեոնացիստների դեմ, հինգշաբթի ասել է ՌԴ նախագահ Վլադիմիր Պուտինը Ռուսաստանի Անվտանգության խորհրդի (ԱԽ) մշտական ​​անդամների հետ հանդիպման ժամանակ։

«Այն, որ մենք հատուկ պայքարում ենք նեոնացիստների դեմ, ցույց է տալիս հենց մարտական ​​գործողությունները։ Ազգայնական և նեոնացիստական ​​կազմավորումները, որոնց թվում կան օտարերկրյա վարձկաններ, այդ թվում՝ Մերձավոր Արևելքից,  թաքնվում են խաղաղ բնակիչների հետևում` որպես կենդանի վահան»,- ասել է ռուսական պետության ղեկավարը։

Նրա տվյալներով` Ուկրաինայում նեոնացիստները պատանդ են վերցնում օտարերկրյա քաղաքացիներին։ «Նրանք նաև պատանդներ են վերցրել՝ օտարերկրյա քաղաքացիների, այդ թվում՝ հազարավոր երիտասարդների, ուսանողների, ովքեր սովորում էին Ուկրաինայում»,- ասել է նա։

Ռուսական պետության ղեկավարը հիշեցրել է, թե ինչպես են ավելի քան 3000 Հնդկաստանի քաղաքացիների, հիմնականում ուսանողների, ավելի քան մեկ օր պահել Խարկովի երկաթուղային կայարանում, և նրանց մեծ մասը շարունակում է մնալ մինչ օրս, այդ թվում՝ ավելի քան 500 մարդ Սումի քաղաքում: «Նեոնացիստները կրակ են բացել նաեւ չինացի ուսանողների վրա, ովքեր փորձում էին լքել Խարկովը, նրանցից երկուսը վիրավորվել են»,- հավելել է Պուտինը։

Նրա խոսքով` օբյեկտիվ տվյալներ կան ազգայնականների և ավազակների կողմից Ուկրաինայում բնակելի շենքերի տարածքում ծանր տեխնիկա տեղակայելու մասին:

«Ես արդեն ասել եմ, որ կան բացարձակապես օբյեկտիվ տվյալներ, լուսանկարներ, թե ինչպես են նրանք (ազգայնականները,- նշում է ՏԱՍՍ-ը) ծանր զինտեխնիկա տեղակայում քաղաքների բնակելի թաղամասերում»,- նշել է նա։

ՌԴ նախագահի խոսքով`  «այդ տեխնիկան բնակելի տարածքներից, մանկապարտեզներից, հիվանդանոցներից հեռացնելու խոստումը կատարելու փոխարեն, ընդհակառակը, [ազգայնականները] լրացուցիչ տանկեր, հրետանի, ականանետեր են տեղափոխում այնտեղ»։

Նա Ուկրաինայում նեոնացիստների գործողությունները համեմատել է Հայրենական մեծ պատերազմի ժամանակ նացիստների գործողությունների հետ։