Մենք սատարում ենք Ռուսաստանի Դաշնությանը՝ ռազմավարական մեր միակ դաշնակցին. Էդուարդ Շարմազանով

 «Փաստ» օրաթերթն իր այսօրվա համարում գրել էր, որ ՌԴ քաղաքական վերնախավում բավականին տարակուսած ու վրդովված են այն հանգամանքից, որ հատկապես այս օրերին Հայաստանում առավել ակտիվացել են հակառուսական տրամադրություններ գեներացնող որոշ շրջանակներ, փոխարենը պրոռուսական ընդամենը 1-2 ակցիա է իրականացվել, այն էլ՝ բավականին սակավամարդ: 

Երևի այդ է պատճառը, որ Երևանի քաղաքապետարանի պաշտոնական էջում հայտարարություն է տեղադրվել այն մասին, որ «Երևանի քաղաքապետի լիազոր ներկայացուցչի 11.03.2022 թվականի որոշմամբ ի գիտություն է ընդունվել ՀՀ քաղաքացի Աշոտ Գալստյանի իրազեկումը ս.թ. մարտի 19-ին՝ ժամը 15.00-16.00-ը Ստ. Շահումյանի անվան հրապարակում հավաք և ժ.16.00-16.30 Ստ. Շահումյանի անվան հրապարակից՝ Բեյրութի փողոց Սուրբ Գրիգոր Լուսավորչի փողոց՝ մինչև ՀՀ-ում Ռուսաստանի Դաշնության դեսպանատան հարակից տարածք երթուղով երթ անցկացնելու վերաբերյալ»:

Past.am-ը թեմայի շուրջ զրուցել է ԱԺ նախկին նախագահ, քաղաքական գործիչ Էդուարդ Շարմազանովի հետ: Վերջինիս խոսքով՝ ակցիա իրականացնելը  քաղաքացիների իրավունքն է.

«Հայաստանը Ռուսաստանի դաշնակիցն է և պետք է սատարի Ռուսաստանի Դաշնությանը, հայ-ռուսական դաշնակցային հարաբերություններն այլընտրանք չունեն: Ռուսաստանի թուլացումը տարածաշրջանում կհանգեցնի թուրք-ադրբեջանական դաշինքի ուժեղացման և հայկական շահերի ամբողջական կլանման: Հետևաբար, Հայաստանի շահերից է բխում ուժեղ Ռուսաստանը, և Հայաստանի արտաքին և անվտանգային ապագան հայ ժողովուրդը պետք է զարգացնի Ռուսաստանի հետ խորը դաշնակցություն ապահովելու և զարգացնելու ուղղությամբ:

Հարցին, թե ինքն անձամբ մասնակցելու՞ է նախատեսվող ակցիային, Շարմազանովը պատասխանեց, որ, եթե կարիք լինում է, իրենց կուսակցությունն ինքն է նախաձեռնում ակցիաներ.

«Մենք մեր ռուս գործընկերների հետ կապի մեջ ենք, և մեր կարծիքը նրանց ասում ենք ուղիղ՝ առանց միջնորդների: Ե՛վ «Եդինայա Ռոսիա» կուսակցության, և՛ Հայաստանում Ռուսաստանի դեսպանատան մեր գործընկերների հետ մենք շատ նորմալ, առանց միջնորդների շփվում ենք: Հայաստանի Հանրապետական կուսակցությունը «Եդինայա Ռոսիա»-ի հետ ունի համագործակցության հուշագիր, համագործակցությունը շարունակական է, մենք էլ սատարում ենք Ռուսաստանի Դաշնությանը՝ ռազմավարական մեր միակ դաշնակցին:

Մարիամ Նալբանդյան