Ինչպե՞ս է անցել աշխարհահռչակ Էմիր Կուստուրիցայի երևանյան խենթ համերգը

Blognews.am-ը գրում է.

 

Աշխարհահռչակ սերբ ռեժիսոր, երաժիշտ Էմիր Կուստուրիցայի և «The No Smoking Orchestra»-իերևանյան համերգը հայ հանդիսատեսը երկար կհիշի։ Կարեն Դեմիրճյանի անվան մարզահամերգային համալիրը երեկ մարդաշատ էր. հայ երկրպագուները եկել էին վայելելու Էմիր Կուստուրիցայի և իր «The No Smoking Orchestra»-ի համերգը, որը մեկ բառով կարելի է բնութագրել խենթ։) BlogNews-ը ներկա է եղել համերգին և իր ընթերցողներին է ներկայացնում երեկոյի մանրամասները։

 

Երբ արտիստն արհեստավարժ է, իր ելույթների ժամանակ անպայման պահում է կապը հանդիսատեսի հետ։ Կուստուրիցան և իր «The No Smoking Orchestra»-ն հանդիսատեսին հրավիրեցին ուղիղ բեմ, որտեղ էլ երկրպագուները վայելեցին սիրելի արտիստի կատարումները, պարեցին նրա հետ։ Տեղում Կուստուրիցան կազմեց իր պարային խումբը և պար սովորեցրեց երկրպագուներին։ Երաժիշտներն իրենց էներգետիկան փոխանցեցին հանդիսատեսին, հանդիսատեսն էլ փոխհատուցեց իր ջերմությամբ։

 

«Ամեն անգամ բեմ դուրս գալուց առաջ կարծես խոհանոցում գտնվեմ, երաժշտությունը հենց տեղում է խմորվում», -մինչ համերգը խոսելով այն մասին, թե ինչ է սպասվում հանդիսատեսին, ասաց  Կուստուրիցան։

 

Կարելի է հստակ ասել, որ նրա «խոհանոցը» շատ դուր եկավ հանդիսատեսին, քանի որ համերգից հետո բոլորը ոգևորված էին։ Կուստուրիցային լսելու էին եկել նաև հայտնի մարդիկ՝ դերասաններ, հաղորդավարներ, երգիչներ և անգամ քաղաքական գործիչներ։

Սա Կուստուրիցայի երկրորդ համերգն էր Երևանում։