«Մազերս հենց էնպես չեն սպիտակել». Փոքր Վեդի համայնքի վարչական ղեկավար
ՔԱՂԱՔԱԿԱՆԻնչպես արդեն տեղեկացրել էինք, Արարատի մարզի Վեդի խոշորացված համայնքում այսօր ավագանու ընտրություններ են:
Լրատվամիջոցների ներկայացուցիչները փորձեցին զրուցել Փոքր Վեդի համայնքի վարչական ղեկավար Կարեն Ստեփանյանի հետ: Փորձեցինք զրուցել` բառի ամենաուղիղ իմաստով:
Նախքան զրույցի մեկնարկը պարոն Ստեփանյանը նշեց, որ պրովակացիոն հարցերի չի պատասխանելու, քանի որ, իր իսկ խոսքերով, «իր մազերը հենց այնպես չեն սպիտակել», և կդադարեցնի զրույցը ցանկացած պահի: Նշեց նաև, որ չի պատասխանելու համայնքին, նրա խնդիրներին վերաբերող և որևէ հարցի, քանի որ դա այս պահին որպես քարոզչություն կդիտվի: Հնարավոր ընտրախախտումների կամ դրանց վերաբերյալ հարցերին արձագանքեց` եթե ընտրախախտումներ լինեն, օրինապահ մարմինները կզբաղվեն դրանցով:
«Որքան ես եմ տեղյակ, մինչ այս պահն ընտրախախտումներ չեն եղել: Եթե լինեն, արձանագրողները` հանձնաժողովի նախագահները և մյուսները, կարձանագրեն, կոֆեի բաժակով գուշակություն չեմ կարող անել: Իսկ արդյունքների մասին կխոսենք ընտրությունների ավարտից հետո: Իմ ակնկալիքն է, որ հաշտ-համերաշխ համագյուղացիները գնան ընտրության, և ամեն ոք իր քվեն տա իր խղճի կամոք` ում որ ցանկանում է»,-մեզ հետ զրույցում ասաց Ստեփանյանը:
Երբ տեսախցիկն ու ձայնագրիչն անջատված էին, ասաց, որ իրեն պրովակացիոն հարցեր էինք ուղղում, մինչդեռ նա պատրաստակամ էր պատասխանելու մեր բոլոր հարցերին` հակառակ դեպքում գյուղապետարանի դուռը կփակեր ու կգնար, և մենք ժամերով չէինք կարողանա իրեն գտնել: Իսկ վերջում` «եկել էիք ու համայնքի մասին ոչ մի հարց չտվեցիք», մինչդեռ ի սկզբանե նա կանխեց համայնքի վերաբերյալ մեր բոլոր հարցերը: