«Չպետք է մեկուսանանք, դա չէ զարգացման ճանապարհը». նպատակը հայկական ստարտափների համար փաթեթի մշակումն է
ՀԱՍԱՐԱԿՈՒԹՅՈՒՆԱռաջատար տեխնոլոգիաների ձեռնարկությունների միությունը (ԱՏՁՄ) օրերս կազմակերպել էր «Raising a Unicorn: Legal and Business Tools for Successful Entrepreneurs» թեմայով սեմինարը, որի ընթացքում ելույթ ունեցան Latham & Watkins իրավաբանական ընկերության ներկայացուցիչներ Ալեքս Վոքսմանը և Էդուարդ Գրիգորյանը: Նշենք, որ ընկերությունն ունի 3000-ից ավելի փաստաբան և 28 գրասենյակ ամբողջ աշխարհում։ Փաստաբաններ Էդուարդ Գրիգորյանը և Ալեքս Վոքսմանն ԱՄՆ-ում և միջազգային շուկայում ներկայացնում են մի շարք հաճախորդների, որոնց թվում են թե՛ ընկերություններ, թե՛ առաջատար վենչուրային հիմնադրամներ։ Նրանք աջակցում են ընկերություններին կորպորատիվ զարգացման բոլոր փուլերում:
Միջոցառման մեկնարկին ԱՏՁՄ գործադիր տնօրեն Հայկ Չոբանյանը ողջունեց ներկաներին` նշելով, որ այս սեմինարով շատ կարևոր միջոցառումների շարք են սկսում: «Հույս ունեմ, որ սրանք ուղղակի միջոցառումներ չեն լինի, այլ Հայաստանում տեղի ունեցող նոր գործընթացի մեկնարկ կտրվի: Պետք է առավելագույնս օգտագործենք առիթը, օգուտ բերենք մեր երկրին, մեր ոլորտին ու այստեղ գործունեություն ծավալող ընկերություններին»,-ասաց Հայկ Չոբանյանը: Այնուհետև Էդուարդ Գրիգորյանը և Ալեքս Վոքսմանը ներկայացրեցին յունիքորն ընկերության ստեղծման բիզնես և իրավական առանձնահատկությունները՝ ձևավորումից մինչև թողարկում։ Սեմինարին հաջորդեց հարց ու պատասխան բանախոսների հետ, որի միջոցով ներկաները ստացան իրենց հուզող հարցերի պատասխանները: Սեմինարի բանախոսների թվում էր նաև IntelinAir ընկերության համահիմնադիր Ալ Եսայանը։ Այս ընկերությունը մասնագիտացված է գյուղատնտեսության մեջ օդից արված լուսանկարների վերլուծության և օգտակար տեղեկատվության տրամադրման ոլորտում: Եսայանը նախ ներկաներին հակիրճ ներկայացրեց սեփական փորձը, նրանց հետ կիսվեց հաջողակ բիզնեսներ կառուցելու իր տարբերակներով և փորձով, բիզնես խորհուրդներ տվեց, խոսեց առաջնորդ լինելու առանձնահատկությունների մասին, առանձնացրեց սովորելու և սովորեցնելու կարևորության դերն աշխատանքում: Եսայանն ընդգծում է, որ ցանկացած նախաձեռնության մեջ կարևոր է ավելի հաճախ հետևել սրտի ձայնին, այն հաջողության գրավականներից է: «Պետք է հոգատար լինել, ազնիվ այն մարդկանց նկատմամբ, ում հետ աշխատում ես, պատրաստ լինել յուրաքանչյուրից սովորել ու սովորեցնել»,-նկատում է Եսայանը: Ասում է` կարող ենք մեր ապագան կառուցել, ունենք բոլոր հնարավորությունները: «Ուղղակի չպետք է մեկուսանանք, դա չէ զարգացման ճանապարհը: Շատ մարդիկ կան, որ հետաքրքրված են այս ոլորտով, նրանք սփռված են Հայաստանով մեկ: Չպետք է միայն ինքներս մեզ հետ խոսենք: Ալեքսի և Էդուարդի միջոցով փաստաբանական տարաբնույթ հարցերը կարող ենք էլ ավելի պրոֆեսիոնալ ձևով կարգավորել: Պետք է մեր ձեռներեցներին հնարավորություն տանք, որ նրանք կարողանան ավելի արագ ստարտափեր ստեղծեն և դրանք ճիշտ հիմքերի վրա դնեն: Էդուարդը կապ է պահում մեզ հետ, Ալեքսը, վստահաբար, կօժանդակի և հիմքերը ճիշտ կդրվեն, իսկ դա շատ կարևոր է»,-ընդգծում է Եսայանը` շնորհակալություն հայտնելով Ալեքս Վոքսմանին, ով ժամանել է Հայաստան մեր ձեռներեցների հետ սեփական փորձով կիսվելու, խորհուրդներ տալու համար:
Ինչպես ի սկզբանե նշեց Հայկ Չոբանյանը, ակնկալվում է, որ այս հանդիպում-սեմինարը երկարատև ու ծավալուն միջոցառումների մեկնարկն էր: Իրավաբանների վերջնական նպատակը պատրաստի փաթեթի մշակումն է հատուկ հայկական ստարտափների համար, որը կօգնի վերջիններիս գտնել ֆինանսավորման հեշտ և արագ ուղիներ՝ միաժամանակ արդյունավետ տնօրինելով ծախսերը։ Ի դեպ, Ալեքս Վոքսմանը պատասխանելով սեմինարի մասնակիցների հարցերին մշտապես նշում էր, որ մի շարք հարցեր պետք է քննարկել` հաշվի առնելով Հայաստանի փորձը ստարտափերի ոլորտում, այս պարագայում գուցե նպատակահարմար չլինի այլ երկրների փորձի կիրառումը: Ստացվում է, որ հատուկ հայկական ստարտափերի համար փաթեթի մշակումը լավագույն տարբերակն է: Ի դեպ, ամենահաջողակ տեխնոլոգիական ստարտափները հետևում են կոնկրետ ճանապարհային քարտեզի, որն ընդգրկում է կորպորատիվ կառուցվածքի մշակում, մտավոր սեփականության պաշտպանություն և աշխատակիցների, ներդրողների ու հաճախորդների հետ հարաբերությունների հաստատում ու կառավարում։
Լուսինե Առաքելյան