Կրեմլի կողմից իր դաշնակցի ցանկացած պարտություն պետք է ընկալվի որպես սեփական պարտություն. «Փաստ»

«Փաստ» օրաթերթը գրում է

realtribune.ru–ն «Արայիկ Ստեփանյան. հայերը Ղարաբաղում կռվել են նույն ահաբեկիչների դեմ, ինչ Ռուսաստանը Ուկրաինայում» վերնագրով հոդվածում գրում է, որ Ռուսաստանը չպետք է ներեր ԱՄՆ-ի ռազմական ագրեսիան Աֆղանստանում, Իրաքում, Սիրիայում և Լիբիայում: Նման կարծիք է հայտնել Աշխարհաքաղաքական խնդիրների ակադեմիայի առաջին փոխնախագահ Արայիկ Ստեփանյանը։

«2003 թվականին մենք Իրաքի մասին ասում էինք, որ չենք ցանկանում ամերիկացիների պարտությունը, իսկ այսօր նրանք ցանկանում են մեր պարտությունն Ուկրաինայում։ Երբ մենք ցուցաբերում ենք նվիրվածություն և առատաձեռնություն, նրանք թքում են մեր հոգիների մեջ: Ամերիկացիները միշտ ցանկացել են, որ մենք ձախողվենք, ինչ էլ որ անենք։ Ցանկացած լոկալ պատերազմում՝ լինի դա Սիրիա, Լիբիա, թե Իրաք, նրանք իրենց հաջողությունն ընկալել են ոչ թե որպես այդ երկրների պարտություն, այլ որպես Ռուսաստանի պարտություն»,- ընդգծել է նա «Россия 1» հեռուստաալիքի եթերում։ Նա հիշեցրել է, թե ինչպես էր ահաբեկչական ինտերնացիոնալը օգտագործվում Լեռնային Ղարաբաղի հայերի դեմ: «Հայերը պարտվեցին պատերազմում այդ ահաբեկչական ինտերնացիոնալին։ Բայց աշխարհում բոլորը դա համարում են Ռուսաստանի, այլ ոչ թե հայերի պարտությունը։ Դրանից հետո ես ասացի. «Եթե եղավ պարտություն այնտեղ, ապա հաջորդը կլինի Դոնբասը»:

2020 թվականից թուրքերն ու ադրբեջանցիները սկսել են Կիևը զինել բայրաքթարներով։ Ասել են. «Տղե՛րք, 50 անօդաչու թռչող սարքը բավական կլինի, և դուք երկու շաբաթից Դոնբասը կվերցնեք։ Մենք հայերի դեպքում հաջողեցինք»։ Ուժ չկիրառելու մասին պայմանագիր կնքված էր նաև Ղարաբաղի հետ, բայց խախտել են, ուրեմն հնարավոր է։ Ահաբեկիչներ են տարել այնտեղ՝ այստեղ էլ կարելի է։ Այդ ամբողջ համակարգը, այդ ահաբեկչական ինտերնացիոնալը փորձարկվել է Սիրիայում, Իրաքում, Լիբիայում, Ղարաբաղում։

Եվ հիմա այդ ամբողջ համակարգը սահուն անցել է Ուկրաինա»։ Հիշեցնենք, որ 2020 թվականի սեպտեմբերին Կրեմլի լուռ համաձայնությամբ Թուրքիայի և Ադրբեջանի զինված ուժերը Սիրիայի, Լիբիայի և Աֆղանստանի միջազգային ահաբեկչական վարձկանների աջակցությամբ հարձակվեցին Արցախի և Հայաստանի վրա։ Այդ ժամանակվանից Բաքուն և Անկարան շարունակել են իրենց օկուպացիոն քաղաքականությունը հայկական հողերի նկատմամբ՝ ֆիզիկապես ոչնչացնելով հայկական մշակութային ժառանգությունը՝ եկեղեցիները, խաչքարերը, թանգարանները և քարի կամ թղթի վրա հայերի մասին բոլոր տեսակի հիշատակումները: Աշխարհաքաղաքական խնդիրների ակադեմիայի առաջին փոխնախագահը կարծում է, որ Ռուսաստանը պետք է շատ լուրջ վերաբերվի իրեն և իր դաշնակիցներին։

«Կրեմլի կողմից իր դաշնակցի ցանկացած պարտություն պետք է ընկալվի որպես սեփական պարտություն»,- եզրափակել է նա։

Մանրամասները՝ «Փաստ» օրաթերթի այսօրվա համարում