Դերասա՞ն, թե մարզիկ. բացահայտում ենք կարատեիստ Գագիկ Օհանյանին

«Արմենիա» հեռուստաընկերության սիթքոմներից մեզ հայտնի Գագիկ Օհանյանը, պարզվում է, նաև տաղանդավոր է սպորտի բնագավառում: Չնայած փոքր տարիքին՝ նա արդեն հասցրել է բազմաթիվ հաջողություններ գրանցել կարատեի ասպարեզում:

2017 թվականին Գագիկը 6-7 տարեկանների մեջ դարձել է ֆուդոկան կարատեի աշխարհի չեմպիոն, այնուհետև 2018 թվականին՝ Եվրոպայի չեմպիոն, 2019 թվականին՝ կրկին աշխարհի չեմպիոն: 2020 թվականին, երբ դեռ կորոնավիրուսի համավարակը չէր սկսվել, Իտալիայում միջազգային մրցաշարում առաջին տեղ է զբաղացրել: 2021 թվականին Ուկրաինայում միջազգային ««Kharkiv  Open» մրցաշարում զբաղեցրել է երկրորդ տեղը:

««Kharkiv  Open»-ից հետո Գագիկը ոտքի տրավմա ստացավ, մոտ 6-7 ամիս չի պարապել և հիմա նոր-նոր վերադառնում է պարապմունքների: Ինչպես գիտեք, 2021 թվականից կարատեն օլիմպիական մարզաձև են դարձրել, և արդեն հաջորդ տարի, երբ տարիքն արդեն կհամապատասխանի, Գագիկը պարապմունքները կարատեի այլ ոճում կանցկացնի, որպեսզի կարողանա պայքարել օլիմպիական ուղեգրի համար»,- Past.am-ի հետ զրուցում նշեց Գագիկի հայրը՝ Արծրուն Օհանյանը, ով նաև նրա մարզիչն է:

Գագիկի խոսքով՝ սերիալները, նկարահումները դասերի հետ համատեղելը շատ դժվար է.

«Երբեմն այս հագեցած գրաֆիկը դասերիս խանգարում է, բայց իմ ուսուցիչներն ըմբռնումով են մոտենում այդ ամենին: Չեմ պատրաստվում առանցնացնել դերասանի աշխատանքն ու սպորտը, որովհեև դրանք շատ փոխկապակցված են, և ես կարողանում եմ համատեղել երկուսն էլ»:

Փոքրիկ դերասանը պարբերաբար առաջարկներ է ունենում կինոյից, բայց այս պահին նրան բեմն է ձգում. «Գոյ» թատրոնում մանկական ներկայացումներում է խաղում և իր ապագան ավելի շատ կապում է թատրոնի հետ:

Մարիամ Նալբանդյան