«Այս իշխանությունը ոչ թե քաղաքական թիմ է, այլ գործիքակազմ. սպասարկում են դրսի օրակարգը». «Փաստ»

«Փաստ» օրաթերթը գրում է

Պատմական գիտությունների դոկտոր, Ցեղասպանության թանգարան-ինստիտուտի նախկին ղեկավար Հայկ Դեմոյանն այսօր երկրի շուրջ ծառացած վտանգները երեք խմբի է բաժանում:

«Ներկա անձանցից բաղկացած իշխանությունը քաղաքական թիմ չէ, չունի գաղափարախոսություն ու որպես գործիքակազմ է հանդիսանում: Ամենագլխավոր վտանգն այս համատեքստում է: Իշխանություն կոչվածը ընտրովի հիմունքներով վերցված մարդկանց խումբ է, որն անցել է որոշակի նախապատարստական փուլ՝ դրսի օրակարգ սպասարկելու համար: Սա նշանակում է, որ իրենց բոլոր գործողությունները, որոշումները չեն բխում Հայաստանի անվտանգության շահերից, որքան էլ փորձեն հակառակը համոզելու ճիգեր գործադրել: Մարդիկ, որոնք նստած են կառավարությունում ու Ազգային ժողովում, դրսի օրակարգեր սպասարկելու համար նախօրոք մարզված ու որոշակի պատրաստվածություն անցած խումբ են: Նրանք այսօր չեն թաքցնում, որ հենց այդ նպատակով են եկել իշխանության»,-ասաց Հ. Դեմոյանը:

Հայկ Դեմոյանի խոսքով, դեռ 2018-ին նրանք չէին թաքցնում, թե ովքեր են: «Դրսի օրակարգը սպասարկելու նպատակի տրամաբանության ներքո, եթե անգամ որևէ ձևով ՀՀ շահերին վերաբերող հարց է լինում, ապա դրանք ստորադասվում են: Երկրորդ մարտահրավերն այն է, որ այս մարդիկ ցանկացած գնով ցանկացած քայլի կգնան: Այս ամենի վառ վկայությունը շինծու հեղափոխությունն է: Ամեն ինչ պարզ է, թե ինչպես է խաբվել մի ամբողջ ժողովուրդ. այդ օպերացիան սպասարկել են կոնկրետ մարդիկ: Իրենք հիմա չեն թաքցնում, որ պատրաստ են Արցախի հարցում գնալ ցանկացած զիջման, որովհետև իրենք արդեն կատարել են պլան-մաքսիմումը: Այսինքն, ժողովրդին ցավ պատճառելով՝ գնացել են պատերազմի միջոցով հարց լուծելու ճանապարհով: Ահաբեկել են պատերազմով: Հիմա ևս պատերազմ սկսելու մոտալուտ հեռանկարով, նորից պատերազմի ուրվականով մարդկանց փորձում են ահաբեկել՝ կարծելով, թե այդպես կարող են կրկին ցանկացած հարց անցկացնել»,ասաց նա:

Դեմոյանը շեշտեց՝ երրորդ վտանգի բաղադրիչը ևս կապված է վերոնշյալ իրողությունների հետ: «Սրանց պատրաստել են խաբեության միջոցով, զարտուղի իշխանության գալ, արդյունքում ՀՀ քաղաքացիները դուրս են մնացել գործընթացից: Այսինքն, խաբեությամբ են քվեն գողացել, որպեսզի իրենց ընտրեն ու իրենց սև գործն անեն: Այս ամենը հիմա անհետևանք չի կարող մնալ: Իսկ հետևանքի մեջ մի հարց պետք է ձևակերպել. հետայսու Հայաստանի Հանրապետությունը, որպես պետականություն, որպես պետական մարմին, հիվա՞նդ է, մահացա՞ծ, թե՞ կոմայի մեջ է: Ինչո՞ւ, որովհետև հաջորդ իշխանափոխություն կոչվածը, մեղմ ասած, արդեն վտանգված է: Եթե մենք այսպիսի մեծ խաբեության ճանապարհով իշխանափոխություն անելու ենք գնացել, ապա ինչպիսի՞ն պետք է լինի հետագա ընտրությունների ճակատագիրը, պետական մեխանիզմը, պետության գործառնությունը»,-ասաց մեր զրուցակիցը՝ նշելով, որ սրանք կարևոր հարցադրումներ են նաև այս փուլում:

«Այսօր մենք տեսնում ենք ոչ միայն ինքնությունից, այլև արժանապատվությունից զուրկ մարդկանց մի խումբ, որը Հայաստանի արդեն խաբված քաղաքացիներին փորձում է բացատրել, թե ինչու են իրականում խաբել: Արդեն չթաքցվող խաբեբայության հետ գործ ունենք: Ասում են՝ մենք ձեզ խաբել ենք, որովհետև մեզ բերել են այստեղ կոնկրետ օրակարգով՝ ցանկացած գնով խաղաղության հասնել Թուրքիայի ու Ադրբեջանի հետ: Պարզ ասում են, որ սպասարկում են դրսի օրակարգը, որը թեպետ կարող է ինչոր տեղ առնչվել Հայաստանի անվտանգությանը, բայց, որպես կանոն, իրենց գլխավոր լեյտմոտիվը դրսի շահը սպասարկելն է: Եվ հիմա իրենք ինչ-որ առումով կարող է և ագրեսիվ դառնան, եթե իրենց ծրագիրը չստացվի: Իսկ այդ ծրագիրը կարող է խափանել առաջին հերթին քաղաքացիական ընդվզումը: Ի՞նչ է նշանակում Արցախի կարգավիճակի նշաձողը պետք է իջեցնենք: Դուք ովքե՞ր եք: Արցախի կարգավիճակի վերաբերյալ նշաձողը կարող է իջեցնել և բարձրացնել Արցախի բնակչությունը, որն այսօր վտանգված է: Դուք ձեր վտանգավոր, հրահրիչ իրարամերժ հայտարարություններով մի հատ էլ ուզում եք նշաձող բարձրացնել, իջեցնե՞լ: Այդ նշաձողն այսօր արցախցու զենքն է»,-շեշտեց Հայկ Դեմոյանը:

Նա ընդգծեց՝ միշտ է այդպես եղել, ու պատմությունը ցիկլիկ է, որից պետք չէ դժգոհել. «Մինչդեռ մենք արդեն տապալել ենք եղած հնարավորությունը, իսկ հիմա արդեն պետք է հստակ նշենք, որ ՀՀ-ն իրավասու չէ որևէ փաստաթուղթ ստորագրել, որը վերաբերում է Արցախի կարգավիճակին: Իսկ ներկա իշխանությունները կանխորոշված ելքով պատերազմ հրահրող մարդիկ են, որոնք պետք է իրենց արժանի պատիժը ստանան»:

ԱՆՆԱ ԲԱԴԱԼՅԱՆ 

Մանրամասները՝ «Փաստ» օրաթերթի այսօրվա համարում