«Գործընթացը քնեցնելու տարբերակներից մեկն են ընտրել, բայց զոհվածների ծնողները հետամուտ են լինելու». «Փաստ»

 

«Փաստ» օրաթերթը գրում է

Ազգային ժողովում Նիկոլ Փաշինյանի հայտարարությունից հետո զոհված զինծառայողների ծնողները նրան որպես մեղադրյալ ներգրավելու միջնորդություն էին ներկայացրել, որը դատախազությունն ուղարկել էր Հակակոռուպցիոն կոմիտե՝ քննարկելու ՀՀ ԶՈւ ԳՇ նախկին պետ Մովսես Հակոբյանի հայտարարությունների հիման վրա հարուցված քրգործի շրջանակներում։ Նախօրեին հայտնի դարձավ, որ կոմիտեն հետաձգել է Փաշինյանին որպես մեղադրյալ ներգրավելու մասին միջնորդության լուծումը՝ «մինչև դրա վերաբերյալ որոշում ընդունելու համար էական հանգամանքների պարզումը»։

Հիշեցնենք՝ Փաշինյանը հայտարարել էր. «Կարող էինք կանխել պատերազմը, բայց կունենայինք այս վիճակը, իհարկե, առանց զոհերի»: Փաշինյանին որպես մեղադրյալ ներգրավելու պահանջին միացել էին նաև «Ցոր» զորամասի զոհված զինծառայողների ծնողները:

«Ցոր» զորամասի զոհված զինծառայողների իրավահաջորդների ներկայացուցիչ Լիպարիտ Սիմոնյանը, անդրադառնալով միջնորդության լուծումը հետաձգելու հայտարարությանը, «Փաստի» հետ զրույցում նշեց. «Քրեական դատավարության օրենսգրքում 102-րդ հոդվածով նախատեսված նորմ կա, ըստ որի՝ միջնորդության քննարկումը կարող է հետաձգվել մինչև էական հանգամանքների պարզումը: Այս դեպքում սա ավելի շատ գործընթացը քնեցնելու տարբերակներից մեկն է: Սա կարող է բավականին երկար ժամանակ տևել, եթե, իհարկե, չասենք անվերջ: Ներկա Քրեական դատավարության օրենսգրքով որևէ ժամկետային կարգավորում չկա: Կարծում եմ՝ հույսներն ավելի շատ դնում են նրա վրա, որ որոշ ժամանակ հետո ծնողները կհանդարտվեն, հետևողական չեն լինի»:

Լիպարիտ Սիմոնյանը շեշտեց՝ կոնկրետ «Ցոր» զորամասի զոհված զինծառայողների ծնողները դեռ ավելի քան մեկուկես տարի առաջ էին սկսել իրենց երեխաների զոհվելու հանգամանքների վերաբերյալ հետամուտ լինել. «Այդ ընթացքում հարուցվել է քրեական գործ, այժմ քննվում է Զինվորական քննչական վարչությունում, գործով կալանավորված անձ կա, գործն արդեն ուղարկվել է դատարան: Ծնողները հետամուտ են լինելու, որ գործի մյուս մասով, որտեղ շոշափվում է ՊԲ նախկին հրամանատար Ջալալ Հարությունյանի, հրետանու պետ Գենա Բաղդասարյանի անունները, ևս մեղադրանք առաջադրվեն: Նրանց մեղադրանքներ առաջադրելու բավարար ապացույցներ կան քրգործերում: Իսկ ապրիլի 13-ին, երբ ԱԺ-ում Նիկոլ Փաշինյանը իր նշված հայտարարությունն արեց, նաև այդ կապակցությամբ հանցագործության մասին հաղորդում ներկայացվեց: «Ցոր» զորամասի զոհված զինծառայողների ծնողներն արդեն տարիուկես է՝ այդ գործընթացի մեջ են, և որևէ վայրկյան չի եղել, որ ինչ-որ բանից հետ կանգնեն: Անկախ նրանից, թե ինչ իշխանություն կլինի, միևնույնն է, մինչև վերջ իրենց ճանապարհն անցնելու են»:

Ինչ վերաբերում է կոնկրետ Փաշինյանին որպես մեղադրյալ ներգրավելու հիմքերին, որոնք Լ. Սիմոնյանի գործընկերները ապրիլի 26-ին էին ներկայացրել դատախազությանը, փաստաբանը հավելեց. «Անձին մեղադրյալ ներգրավելու համար պետք է բավարար ապացույցների ամբողջություն լինի: Իմ գործընկերների ներկայացրած միջնորդություններում, որքանով ծանոթ եմ, բավարար ապացույցներ կան: «Ցոր» զորամասի զոհված զինծառայողների հաղորդման մասով ապացույցները ևս բավարար են: Մենք կարող ենք ընդամենը ԱԺ ելույթի փաստը մատնանշել. ըստ էության, ԱԺ-ում ինքնախոստովանություն եղավ»:

Նշենք, որ զոհված զինծառայողների ծնողները ՀՀ գլխավոր դատախազությունից պահանջում էին նաև քրեական գործով իրենց որպես տուժողների իրավահաջորդ ճանաչել, ինչը բավարարվել է։

Անդրադառնալով նշվածին ու բերելով կրկին «Ցոր» զորամասի զոհված զինծառայողների ծնողների օրինակը՝ նա նշեց. «Երբ իրենց որդիները դեռ անհայտ կորած էին, ու նրանց մասունքները դեռ չէին հայտնաբերվել, դիմումից հետո ծնողները տուժողի իրավահաջորդներ էին ճանաչվել: Հիմա հարց է, թե մյուս ծնողներն ինչու պետք է տարիուկես կամ երկու տարի հետո նոր տուժողի իրավահաջորդ ճանաչվեին: Վերջին հաշվով, սա պետության պարտավորությունն է, քանի որ հարուցվել է քրգործ նաև 384-րդ` պատերազմ սանձազերծելու հոդվածով: Ըստ այդմ, վիրավորված զինծառայողները, քաղաքացիական անձինք, նաև գերեվարված անձինք, զոհվածները ու նրանց ծնողները պետք է արդեն իսկ ճանաչվեին տուժող, տուժողի իրավահաջորդ: Ինչո՞ւ չեն կանչում ու չեն բացատրում զոհվածների ծնողներին, որ որպես տուժողի իրավահաջորդ ներգրավելու իրավունք ունեն: ԱԺ ելույթը լսելուց հետո, երբ ծնողները փողոց դուրս եկան, նոր որոշեցի՞ն տուժող ճանաչել: «Ադալժենի՞» են անում, թեպետ սա իրենց պարտավորությունն է»,-ասաց նա՝ շեշտելով, որ տուժողի կամ տուժողի իրավահաջորդի կարգավիճակը ծնողներին հնարավորություն է տալիս հետևել իրենց երեխաների գործի ընթացքին, դատավարության մասնակից դառնալ, միջնորդություններ անել, մասնակցել փորձաքննություններին, նաև բողոքարկել որոշումները:

Լիպարիտ Սիմոնյանի խոսքով, ընդհանուր առմամբ, ծնողները հետ չեն կանգնելու. «Իրավական գործընթացները պետք է անցնել: Երբ կա նպատակ, որ կոնկրետ «Ցոր» զորամասի զոհված զինծառայողների գործով բոլոր մեղավորները պետք է մեղադրվեն ու պատժվեն, ուրեմն՝ պետք է անցնել բոլոր ընթացակարգերով և չսպասել, թե քաղաքական դաշտում ինչ կկատարվի: Կմերժեն՝ բողոքարկման մեխանիզմներ կան, ընդհուպ մինչև Մարդու իրավունքների եվրոպական դատարան»: 

ԱՆՆԱ ԲԱԴԱԼՅԱՆ

Մանրամասները՝ «Փաստ» օրաթերթի այսօրվա համարում