Ֆինլանդիայի ԱԳ նախարարը հայտարարել է՝ երբ է երկիրը ՆԱՏՕ-ին անդամակցության հայտ ներկայացնելու

Ֆինլանդիայի արտգործնախարար Պեկկա Հաավիստոն ճապոնական NHK հեռուստաալիքին տված հարցազրույցում ասել է, որ իր երկիրը ՆԱՏՕ-ին անդամակցելու հայտ կներկայացնի «եկող շաբաթվա կեսին»։

«Եթե լինի խորհրդարանի որոշումը, ապա մենք դա կանենք հաջորդ շաբաթվա կեսին։ Նույն ժամկետները դիտարկում է նաև Շվեդիան»,- ասել է նախարարը ՆԱՏՕ-ին անդամակցելու պաշտոնական դիմում ներկայացնելու ժամկետների մասին։

Նախօրեին ՆԱՏՕ-ի գլխավոր քարտուղար Ենս Ստոլտենբերգը հայտարարել էր, որ Ֆինլանդիան ջերմորեն կընդունվի ՆԱՏՕ-ում, եթե որոշի դիմել դաշինքին միանալու համար:

«Եթե Ֆինլանդիան որոշի դիմել, ապա նրան ջերմորեն կընդունեն ՆԱՏՕ-ում, և ընդունման գործընթացը հարթ և արագ կլինի», - մեջբերում է Reuters-ը նրա խոսքերը:

Ստոլտենբերգը նշել է, որ Ֆինլանդիան ՆԱՏՕ-ի ամենամոտ գործընկերներից է և կարևոր ներդրում ունի եվրատլանտյան անվտանգության ապահովման գործում։

Ֆինլանդիայի նախագահ Սաուլի Նիինիստոն և վարչապետ Սաննա Մարինը հինգշաբթի հրապարակված համատեղ հայտարարության մեջ ասել են, որ Ֆինլանդիան պետք է հնարավորինս շուտ դիմի ՆԱՏՕ-ին միանալու համար: Սպասվում է, որ պաշտոնական որոշումը կկայացվի կիրակի՝ մայիսի 15-ին։

Միևնույն ժամանակ, ՌԴ ԱԳՆ-ն այս առնչությամբ հայտարարել է, որ Ռուսաստանը ստիպված կլինի ռազմատեխնիկական բնույթի պատասխան քայլեր ձեռնարկել՝ դադարեցնելու իր ազգային անվտանգությանը սպառնացող վտանգները՝ ի պատասխան Ֆինլանդիայի հնարավոր անդամակցությանը ՆԱՏՕ-ին։

«Ռուսական կողմը բազմիցս նշել է, որ իր ազգային անվտանգության ապահովման ուղիների ընտրությունը Ֆինլանդիայի իշխանություններին ու ժողովրդինն է։ Սակայն Հելսինկին պետք է իրեն հաշիվ տա նման քայլի պատասխանատվության ու հետևանքների հարցում», - ընդգծվում է հայտարարության մեջ։