Չալաբյանի կալանավորումը բացարձակ հիմնազուրկ է, դատախազությունն էլ հիմնավոր կասկածին չի անդրադարձել. դատական նիստը կշարունակվի վաղը

Այսօր ՀՀ վերաքննիչ քրեական դատարանում տեղի ունեցավ «Համախմբում» շարժման անդամ, հասարակական-քաղաքական գործիչ Ավետիք Չալաբյանի կալանավորման որոշման դեմ բերված վերաքննիչ բողոքի քննության դատական նիստը, որը, սակայն հետաձգվեց՝ պայմանավորված աշխատանքային օրվա ավարտով։  Նիստը կշարունակվի վաղը՝ մայիսի 31-ին, ժամը 13:30-ին:

Նիստի ավարտին Չալաբյանի փաստաբան Արթուր Հարությունյանը նշեց` պաշտպանական կողմը ներկայացրեց իր բողոքը, դիրքորոշումը, լրացուցիչ փաստաթղթեր, որոնք վերաբերում էին իրենց պաշտպանյալի անձը բնութագրող տվյալներին: «Դատախազի կողմից ներկայացվեցին դիրքորոշումներ, որոնք վերաբերելի էին այս քրգործով մեր կողմից ներկայացված բողոքին: Ըստ էության, որևէ հիմնավորում, փաստական տվյալ, որը կհակադրվեր մեր կողմից ներկայացված վերաքննիչ բողոքին, հիմնավորումներին` կալանքի և հիմնավոր կասկածի մասով, դատարան չներկայացրեցին: Դատախազի կողմից ներկայացվեցին մի քանի դիրքորոշումներ, պաշտպանական կողմի մոտ այնպիսի տպավորություն էր, որ պարզապես ներկայացվում է մի հանգամանք, որն, ըստ էության, չի արծարծվել առաջին ատյանի դատարանի որոշման մեջ, սակայն դատախազությունը, չներկայացնելով վերաքննիչ բողոք այդ մասերով, դատական նիստի ժամանակ բարձրաձայնում էր հանգամանքներ, որոնք չեն մտել որոշման մեջ և բողոքարկման առարկա չեն դարձել: Խոսքը հետևյալի մասին է. նիստի ժամանակ վարույթ իրականացնող մարմինը դատարան էր բերել և ցանկանում էր բողոքի նյութերին կցել այնպիսի նյութեր, որոնք կատարվել են ավելի ուշ, քան ներկայացվել էր բողոքը: Մեր կողմից բարձրացվել էր այդ հարցը, որ դա չի կարող մտնել սույն միջնորդության նյութերի մեջ և նաև չի կարող դրվել հետագայում կայացվելիք որոշման հիմքում, որը դատարանի կողմից արվել էր: Խոսքը հիմնավոր կասկածը հիմնավորող փաստական տվյալների մասին է, որոնք չէին ներառվել տվյալ նյութերի շրջանակներում և չէին արծարծվել որոշման մեջ: Այս մասին փաստական տվյալները կներկայացվեն մայիսի 31-ին»,-նշեց Արթուր Հարությունյանը: Տեղեկացրեց, որ Ավ. Չալաբյանը ևս ծավալուն ելույթով է հանդես եկել, մասնավորաբար` մեջբերեց նրա հետևյալ միտքը. «Ես մեր երկրի քաղաքացին եմ, շահառուն, սեփականատերը և եթե փորձեմ փախչել քննությունից, ապա փախչում եմ ինքս ինձանից»: Հավելում է` վարույթ իրականացնող մարմինն իր ներկայացրած կալանավորման միջնորդությամբ նշում է պարզապես հիմքեր, որ Չալաբյանը կփախչի, կխուսափի, կխոչընդոտի: «Սակայն սա հիմնավորող որևէ փաստական տվյալներ չեն ներկայացվել, սրանք եղել են քննիչի մտահոգությունները, նույնը տեղ է գտել դատարանի որոշման մեջ, նույն թեզը մեր բողոքի շրջանակներում փորձում է առաջ տանել նաև Դատախազությունը»,-եզրափակեց Հարությունյանը:

Պաշտպան Վարազդատ Հարությունյանն իր հերթին ընդգծեց` ցանկացած կալանավորման պայմանը հիմնավոր կասկածն է: «Այսինքն` կա հիմնավոր կասկած, որ անձն առնչություն ունի մեղսագրվող արարքին: Հիմնավոր կասկածի վերաբերյալ մանրամասն անդրադարձել ենք դատական ակտի հիմքում ընկած երեք ապացույցի տեսակներին, ապացուցել ենք, որ դրանից երկուսն ընդհանրապես տեղեկություն չեն պարունակում Չալաբյանի կողմից այդ արարքը կատարած լինելուն, իսկ երրորդն էլ հերքում է նրա առնչությունը մեղսագրվող արարքին: Դատախազին իր ելույթում բացարձակ չանդրադարձավ հիմնավոր կասկածին: Ասում ենք, որ հուլիսի մեկից Քրեական նոր օրենսգիրքն ուժի մեջ է մտնելու, որով այդ արարքը չի լինելու հանցագործություն: Դատախազն ասում է` իմ տեղեկություններով օրենսդրական նախաձեռնություն է իրականացվում, որ այդ արարքը նորից քրեականացվի»,-ընդգծեց Վ. Հարությունյանը` հավելելով, որ ահա այս պայմաններում է շարունակվելու դատական նիստը նաև մայիսի 31-ին:

Մինչ նիստի սկիզբը մեզ հետ զրույցում «Համախմբում» շարժման անդամ Մենուա Սողոմոնյանն էլ նշեց. «Փաստաբանները բազմիցս խոսել են, որ Ավ. Չալաբյանի կալանավորման որոշումը բացարձակ հիմնազուրկ է: Դատական նիստից առանձնապես մեծ հույսեր չկան, որովհետև գործն ամբողջությամբ պատվիրված է, սա քաղաքական հետապնդում ու հալածանք է և, ըստ էության, Նիկոլ Փաշինյանից իջեցված պատվեր: Մարդն իր քաղաքական համոզմունքները, Հայաստանի անվտանգային ապագայի վերաբերյալ իր թիրախային դիրքորոշումները հայտնելու, Հայաստանի գործող իշխանություններին թիրախային ձևով քննադատելու համար կալանավորվել է»:

Հիշեցնենք, որ օրեր առաջ Արցախի նախագահը, Արցախի ԱԺ նախագահը, մի քանի պատգամավորներ, ինչպես նաև Արցախի թեմի առաջնորդը կոչ էին արել չեղարկել Ավետիք Չալաբյանի կալանավորման որոշումը և արդար քննություն իրականացնել։ Չալաբյանին ազատ արձակելու համար երաշխավորագրեր էին ներկայացրել նաև ԱԺ պատգամավորներ Իշխան Սաղաթելյանը, Սեյրան Օհանյանը, Էլինար Վարդանյանը, Հայկ Մամիջանյանը, Տիգրան Աբրահամյանը, Վաչե Գաբրիելյանը և «Արար» հիմնադրամը։