«Արարատյան Ալյանսը» կհամախմբի հայերի և հայ ժողովրդի բարեկամների ներուժը երկրի անվտանգության ամրապնդման և տնտեսության մրցակցության բարելավման համար

«Արարատյան ալյանս» նորաստեղծ ինստիտուտն այսօր հանրությանը ներկայացրեց Հայաստանի առաջընթացի իր տեսլականը, գործունեության նպատակը և ոլորտները: Հանդիպմանը ներկա էին ճանաչված գիտնականներ, միջազգային կազմակերպությունների ներկայացուցիչներ, ՀՀ-ում հավատարմագրված դեսպաններ, հյուրեր արտերկրից: Ինստիտուտի աշխատանքները տարվում են հետևյալ հիմնական ուղղություններով` անվտանգություն, գիտություն և տեխնոլոգիաներ, տնտեսություն, ազգային արժեքներ, սփյուռք և արտաքին կապեր, երիտասարդություն: Ձգտելով ձևավորել համահայկական միավորման ժամանակակից հարթակ` գործարկվել է  նոր պլատֆորմ` «Հայաստանի և Արցախի ռազմավարական զարգացման «Արարատյան Ալյանս» ինստիտուտ անվանումով, որի նպատակն է համախմբել հայերի, ինչպես նաև հայ ժողովրդի բարեկամների ներուժը երկրի անվտանգության ամրապնդման, տնտեսության մրցակցության բարելավման, ազգային արժեքների պահպանման և զարգացման համար: Ինստիտուտի ղեկավար Արա Աբրահամյանը նշում է, որ նպատակն ուղեղային կենտրոնի ստեղծումն է: «Ինչպես է զարգանալու Հայաստանը, որն է մեր երկրի զարգացման ճանապարհային քարտեզը, ովքեր են մեր ընկերները: Սրանք են այն հարցերը, որոնց պետք է պատասխաններ տրվեն»,-նշեց Աբրահամյանը: Հանդիպման ընթացքում ոլորտային խմբի ղեկավարները` ՀՀ ԳԱԱ ակադեմիկոս քարտուղար Արթուր Իշխանյանը, ՀՀ ԳԱԱ ակադեմիկոս Ալեքսանդր Մանասյանը, պրոֆեսոր Թաթուլ Մանասերյանը, հայագետ Արթուր Արմինը և այլք խոսեցին թեմատիկ վեց ուղղությունների մասին` մատնանշելով մեր անելիքներն այս ուղղություններով: Հանդիպման մի կարևոր հատված նվիրված էր մեր երկրի անվտանգությանը, և, իհարկե, Արցախին, մասնավորաբար` Արցախի տարածքային ամբողջականության խնդրին, Արցախի կարգավիճակի` միջազգային ճանաչման հարցին և այլն: Արա Աբրահամյանը նշեց` 44-օրյա պատերազմում ոչ միայն հայ ժողովուրդն է պարտվել, այլ նաև մեր ժողովրդի բարեկամները, քաղաքակիրթ աշխարհը, որն արտարբեր էր կատարվող իրադարձությունների հանդեպ: «Սա պարզ է, նորություն չկա այս առումով:  Ռուսաստանի հայերի միությունը երկու գիրք է հրատարակել Ղարաբաղյան խնդրի վերաբերյալ: 67 երկրից իրավական փաստաթղթեր ենք հավաքագրել խնդրի վերաբերյալ: Դրանից հետո մի քանի անգամ միջազգային փորձագետների և իրավաբանների ենք հրավիրել, որոնք ներկայացրել են իրենց եզրակացությունները: Պատմության մեջ Ղարաբաղը երբևիցե չի եղել Ադրբեջանի կազմում, երբևէ իրենց չի պատկանել: Ցավոք, մեր ղեկավարներն այդ գրքերը չեն էլ փորձում կարդալ, այդ գրքերում ոչ միայն ներկայացված է պատմությունը, այլ նաև ճանապարհային քարտեզը, թե ինչ է պետք անել: Այսօր, կարծես թե,  «կորել է» միջազգային իրավունքը, չկա: Պետք է կարողանանք բարեկամ և ոչ բարեկամ երկրներին  ներկայացնել փաստաթղթերը,  պատմությունը, որ ունենք, եթե այդ  մարդիկ մեզ չեն օգնում, գոնե չեզոք լինեն։ Մշտապես Ադրբեջանի ասածներն ենք վերլուծում, բայց այս թեմայի վերաբերյալ մեր ասելիքը չենք ներկայացնում։ Պետք է կարողանանք պահպանել խաղաղությունը, մեր նպատակն է ունենալ ծրագիր, որով կառաջնորդվենք։ Չեմ պատկերացնում մի հայ, որ մոռանա Ղարաբաղյան խնդիրը և այլ կերպ պատկերացնի այս հարցի լուծումը»,- ասաց Արա Աբրահամյանը։

2022 թ.-ի սեպտեմբերին «Արարատյան Ալյանսը» պատրաստվում է գումարել իր առաջին համահայկական համաժողովը: Նախքան դա կլինեն քննարկումներ, կմեկտեղվեն փորձագետների կարծիքները, կձևավորվի թիմ, որը կզբաղվի խնդիրների լուծմամբ, կոնկրետ առաջակներ կներկայացնի: Արա Աբրահամյանը կոչ արեց բոլորին համախմբվել Ալյանսի շուրջ:

Լուսինե Առաքելյան