Էլեկտրական մանղալ. երբ հնարավոր չէ դուրս գալ «մաքուր օդ». «Փաստ»

«Փաստ» օրաթերթը գրում է

Շշի՝ շամփուրի վրա հավասարաչափ խորոված ոսկեգույն կեղևով միսը սննդարար և համեղ ուտեստ է: Այնուամենայնիվ, միշտ չէ, որ հնարավոր է նման խորոված պատրաստելու և ճաշակելու համար «մաքուր օդ» դուրս գալ կամ սեփական բակում փայտ վառել: Խորովածի պատրաստման՝ էլեկտրականությամբ աշխատող մինի մանղալները (կամ՝ թոնիրները, ինչպես ցանկանաք) առաջին անգամ հայտնվել են մոտ 50 տարի առաջ:

Ընկերությունը, որը դարձել է նման խոհանոցային սարքի ստեղծողը, Ուկրաինայի «Տավրիա» գործարանն է: Մսով բեռնված ուղղահայց դիրքով շշերով էլեկտրամանղալը կարող է 40 րոպեում միանգամից մոտ 1,2 կգ թարմ միս խորովել: Առաջին էլեկտրական մանղալի առավելագույն հզորությունը կազմել է ժամում 1,25 կՎտ, իսկ ջերմաստիճանի ռեժիմը հնարավոր է եղել հասցնել մոտ 700 աստիճանի: Նման ցուցանիշով միսը խորովվում է հավասարաչափ, և էլեկտրականությամբ ստացված խորովածը արտաքինից պատվում է գեղեցիկ ոսկեդարչնագույն կեղևով:

Այդ սարքի մեջ խորոված բանջարեղենը ևս ստացվում է փխրուն և շատ ախորժելի: Էլեկտրամանղալի ներսում նման բարձր ջերմաստիճան ստացվում է կվարցային խողովակի շնորհիվ, որի մեջ շիկացման վոլֆրամի գալարաթել է: Ինչպես գիտեք, վոլֆրամը կարող է դիմանալ մինչև 1000 աստիճանի տաքացման: Սակայն վոլֆրամե մետաղագալարի արժեքը զգալի է, ուստի սարքի ջեռուցման տարրը փոխարինելը ժամանակին մեծ գումար է կազմել: Էլեկտրամանղալի ջեռուցման տարրի շուրջ կարող է միաժամանակ պտտվել 6 շիշ, որոնք տեղաշարժվում են էլեկտրական սարքի ներսում տեղադրված հատուկ շարժիչի շնորհիվ:

Խորովածը պատրաստ լինելու դեպքում հեշտությամբ հնարավոր է հանել շշերը, ապա և, անհրաժեշտության դեպքում նոր շշեր տեղադրել: Հին էլեկտրական մանղալները հագեցած են եղել նաև ջերմաստիճանի մեխանիկական կարգավորիչով, որը հնարավորություն էր տալիս խորովել ոչ միայն հյութալի և անուշաբույր միս, այլ նաև բանջարեղեն, սունկ և ջերմամշակման կարիք ունեցող այլ մթերք: Նման սարքում կարելի է պատրաստել քյաբաբ, ընդ որում՝ այն նույն համն է ունենում, ինչ ածուխների վրա պատրաստված ավանդական ուտեստը: Եղել են նաև էլեկտրամանղալների այնպիսի մոդելներ, որոնցում ներկառուցված է եղել շշերի լուսավորության համակարգ՝ խորովածի պատրաստվածության աստիճանը աչքով տեսնելու համար: Էլեկտրամանղալի ամենահետաքրքիր հատկությունն այն է, որ այդ սարքը ունի համեմատաբար փոքր չափսեր և քաշ: Այն հնարավոր է պահել անգամ պահարանում և միայն անհրաժեշտության դեպքում հանել:

Եթե խոսենք էլեկտրամանղալների թերությունների մասին, ապա առաջին հերթին պետք է նշել շիկացման գալարաթելի շուտ շարքից դուրս գալը։ Մշտական տաքացումից նման պարույրը՝ կոլբայի հետ միասին, պահանջում է փոխարինում, չկա նաև պաշտպանություն սարքավորումների էլեկտրոնային մաս գոլորշիների ներթափանցումից: Բացի դա, մանղալի կորպուսը պատրաստվում է չժանգոտվող պողպատից, ինչը լավ չի պահպանում ջերմությունը: Ուստի պատրաստի խորովածը անհրաժեշտ է անմիջապես մատուցել, որպեսզի կարողանաք ուտել դեռ տաք վիճակում: Ներկայումս ժամանակակից տեխնոլոգիաներն ու գյուտերը թույլ են տալիս ցանկացած պահի վայելել հյութալի խորոված, քանի որ ստեղծված նյութերը հիանալի կերպով պահում են ջերմաստիճանը նույն մակարդակի վրա:

Կերամիկա, հաստ պատերով պողպատ, ոչ կպչուն ծածկույթ. այս ամենը պարզեցրել և հեշտացրել է էլեկտրասարքերի օգտագործումը և տալիս է միայն դրական հույզեր: Ներկայումս նման էլեկտրասարքեր գնելը շատ թանկ հաճույք չի համարվում, այն թույլ է տալիս համեղ և հագեցած սնունդ պատրաստել ամբողջ ընտանիքի և հյուրերի համար: Հարկ է նշել, որ ժամանակակից էլեկտրական սարքերը խորոված են պատրաստում նախկինից երկու անգամ արագ, ինչն անվիճելի առավելություն է ցանկացած տնային տնտեսուհու համար: Բայց, ինչպես ասում են, փայտի կրակի վրա արված խորովածը... ուրիշ է:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում