Life.panorama.am-ը գրում է.
Ամանորյա նախապատրաստական աշխատանքները օր օրի ավելի են թեժանում, իսկ մեր շոու բիզնեսի ներկայացուցիչները ջանք չեն խնայում իրենց երկրպագուներին անակնկալներ մատուցելու համար: Վերջին օրերին Նարեկ Բավեյանն ու Օլգա Այվազյանը հետաքրքիր Սուրբ Ծննդյան ֆոտոշարքով ներկայացան, իսկ մանրամասներին ծանոթացել էLife.panorama.am-ը:
Մեզ հետ զրույցում երգչուհի Օլգա Այվազյանը տեղեկացրեց, որ Նարեկ Բավեյանի հետ համատեղ ֆոտոշարքով հանդես գալու առաջարկը անձամբ լուսանկարչին էր.
«Նման գեղեցիկ Սուրբ Ծննդյան ֆոտոշարքով ներկայանալու առաջարկը եղել է «Art Artur production»-ի կողմից, ես ու Նարեկն էլ, որպես հին ու լավ ընկերներ, սիրով համաձայնեցինք»,- նշեց երգչուհին:
Մեր այն նկատառմանը, թե այս ֆորոշարքը հնարավո՞ր է ապագայում նոր համատեղ աշխատանքի ակնարկ լինի, Օլգան պատասխանեց. «Շատ հնարավոր է, բայց դեռ նման ծրագրեր ու որոշումներ չկան, ամեն բան ապագան ցույց կտա»:
Ֆոտոշարքում Օլգա Այվազյանն ու Նարեկ Բավեյանն անձամբ են որոշել, թե ինչ կերպարներում հանդես գան, նկարահանման ընթացքի մասին էլ խոսելիս՝ Օլգան ծիծաղելով պատմեց. «Ես ու Նարեկը նախապես որոշեցինք եւ միասին համապատասխանեցրինք, թե ինչ կերպարներով հանդես պետք է գանք: Նշեմ, որ այդ օրը զավեշտալին այն էր, որ Նարեկը նկարահանումներից էր եկել ու շատ հոգնած էր, նա եկավ, նստեց գորգին ու հոգնածությունից չէր ուզում շարժվել, մենք էլ որոշեցինք հենց այդպես էլ իրականացնենք ֆոտոշարքը՝ մարմնավորելով զույգերի, ովքեր տոնական օրերից հետո նշում են Սուրբ Ծնունդը, բայց ամուսինը հոգնած է, իսկ կնոջ ակտիվությունը ամանորյա թոհուբոհից անգամ չի նվազել»:
Օլգա Այվազյանը հատուկ նշեց. «Կարծում եմ, մեր ազգային բնավորությանը համապատասխան, մարդիկ շուտով կսկեն քննարկել այս ֆոտոշարքը՝ իմ ու Նարեկի վերաբերյալ սխալ ենթադրություններ անելով, ուստի նախապես ասեմ, որ մենք պարզապես շատ լավ ընկերներ ենք, իսկ Նարեկի կնոջ հետ ես շատ մտերիմ եմ»:
Ամանորին եւ Սուրբ Ծնունդին ընդառաջ երգչուհին միացավ շնորհավորանքներին. «Նախապես շնորհավորում եմ բոլորիս գալիք տոների կապակցությամբ՝ մաղթելով ամենակարեւորը խաղաղություն: Մենք հիմա մի փոքր դժվար ժամանակաշրջանում ենք ապրում, ուստի կցանկանամ, որ խաղաղություն տիրի աշխարհում, երեխաներն էլ գեղեցիկ մանկություն տեսնեն, մնացած ամեն բան հաղթահարելի է: Թող մարդիկ միշտ ժպտան ու անհոգ լինեն»,- նշեց նա:
Օլգա Այվազյանը Ամանորը դիմավորելու մի անխախտ սկզբունք ունի. «Արդեն քանի տարի է ես Նոր տարին դիմավորում եմ տանը՝ ծնողներիս ու քույրիկիս հետ, հետո նոր միայն գնում եմ աշխատավայր ու շարունակում Ամանորը տոնել ընկերներիս հետ՝ ուրախացնելով մեր հանդիսատեսին»,- պատմեց երգչուհին:
Օլգա Այվազյանը 2016-ից սպասելիքներ ունի, բայց դրանց մասին խոսել չցանկացավ. «Միշտ էլ ցանկություններ ու սպասելիքներ եմ ունենում գալիք տարիներից, բայց դրանց մասին չեմ սիրում խոսել: Ես ավելի շատ սիրում եմ ինքս իմ մեջ երազել ու սպասել դրանց իրականացմանը, իսկ դրանք գրեթե միշտ իրականանում են. իմ կյանքում գուցե երբեմն դժվարությամբ, բայց երազանքներն իրականանում են»:
