Աշխատանքային տարի էր. Հերմինե Նաղդալյան

Անդրադառնալով անցնող տարվան՝ ԱԺ փոխխոսնակ Հերմինե Նաղդալյանը Past.am-ի հետ զրույցում ասաց, որ տարին աշխատանքային էր: «Չեմ սիրում օգտագործել «ծանրաբեռնված» բառը, որովհետև աշխատանքն ինձ համար ոչ թե բեռ է, այլ հաճույք, բայց աշխատանքը շատ էր: Կարող եմ առանձնացնել աշխատանքները՝ կապված Սահմանադրության նախագծի հետ, որը համարում եմ տարվա գլխավոր քաղաքական քայլը: Այն ողջունվեց միջազգային տարբեր քաղաքագետների, սահմանադրագետների ու այլ մասնագետների կողմից: Ուզում եմ նշել վերջերս ԵԽԽՎ մոնիթորինգի նիստը, որը տեղի ունեցավ հանրաքվեից հետո: Հանձնաժողովի նախագահն ընդգծեց այն կարևորությունը, որ Հայաստանն ունեցավ քաղաքական համարձակություն, որպեսզի անցում կատարի այն համակարգից, որի ժամանակ հաղթող իշխանությանը տրվում է ամեն ինչ, իսկ պարտվողին՝ ոչինչ, դեպի այն համակարգ, որում բոլորը ստանում են ըստ արժանիքների և աշխատանքի»,- նշեց Նաղդալյանը:

Հանրապետական պատգամավորն առանձնացրեց նաև Հայոց ցեղասպանության 100-ամյակը: Տիկին Նաղդալյանի խոսքով՝ միջոցառումները հնարավորություն տվեցին, որպեսզի մենք կարողանանք ձայն և դրոշ բարձրացնել՝ որպես մարդկության դեմ հանցագործությունների պայքարի առաջամարտիկներ և ջատագովներ: Ըստ մեր զրուցակցի՝ խնդիրն այն չէ, որ մենք առաջին ցեղասպանված ժողովուրդն ենք, այլ այն, որ կարողացել ենք ոտքի կանգնել՝ ի ցույց դնելով մեր կամքն ու ներուժը:

Խոսելով արտաքին քաղաքականության մասին՝ Նաղդալյանն անցնող տարվա գործընթացները ևս կարևոր համարեց: «Նախ՝ նշեմ Մինսկի խմբի խաղաղ բանակցությունների դերը: Իհարկե, դրանք ուղեկցվեցին զոհերով, նիրհող պատերազմով, բայց, այնուամենայնիվ, մեզ հետևողականորեն պիտի տանեն դեպի մեր ժողովրդի երազանքի՝ Լեռնային Ղարաբաղի միջազգային ճանաչման գործընթացին: Այն փոխադարձ ըմբռնումը, որն առկա է հայկական կողմի և Մինսկի խմբի միջև, և Ադրբեջանի այն խուճապը, որն իր անդրադարձն է ունենում սահմանային սադրանքներով, միջազգային հարթակներում տարբեր բաներ մոգոնելով, հստակորեն ցույց է տալիս, որ 2015-ին առաջ տանող քայլեր ենք արել»,- ընդգծեց փոխխոսնակը:

Նոր տարվա ակնկալիքների մասին խոսելով՝ Հերմինե Նաղդալյանը նշեց. «Իհարկե, յուրաքանչյուր մարդ Նոր տարին սկսում է հույսով, հավատով, որ գալիքը լինելու է ավելի լավ տարի, առաջադեմ տարի, նախկինում չլուծված խնդիրները լուծում են ստանալու: Օգտվելով առիթից՝ ձեր միջոցով ողջ հայ ժողովրդին ցանկանում եմ, որ մենք կարողանանք շնորհակալություն ասել անցնող տարվան , գալիք տարին դիմավորենք բաց սրտով, լավ տրամադրությամբ, հավատով, որ տարին մերն է լինելու, մեծ հաջողություններ և առաջընթաց է բերելու, երկիրն ավելի զորեղանալու է՝ լինելով ավելի ապահով և բարգավաճ»:

Լևոն Փանոսյան