Տիգրան Ավինյանը քայլ առ քայլ խաղից դուրս է թողնում Հրաչյա Սարգսյանին

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Մրցակցության պաշտպանության հանձնաժողովը վարույթ է հարուցել Երևանի քաղաքապետարանի նկատմամբ 2021 և 2022 թվականների ընթացքում ավտոբուսների ձեռքբերման նպատակով կազմակերպված գնման ընթացակարգերում տնտեսական մրցակցության բնագավառում հնարավոր իրավախախտման առնչությամբ: Մրցակցության պաշտպանության հանձնաժողովի հաղորդագրության համաձայն՝ ուսումնասիրության արդյունքում պարզվել է, որ Երևանի քաղաքապետարանի կողմից հայտարարված գնման ընթացակարգերի հրավերների տեխնիկական բնութագրերով առերևույթ սահմանվել են այնպիսի պահանջներ, որոնց առկայությունը հանգեցրել է կամ կարող է հանգեցնել գնման ընթացակարգերի հնարավոր մասնակիցների համար անհավասար պայմանների ստեղծմանը և տնտեսական մրցակցության սահմանափակմանը: Միևնույն ժամանակ արձանագրվել է տեխնիկական բնութագրերով սահմանված չափորոշիչների միայն կոնկրետ մեկ սուբյեկտի կողմից արտադրվող փոխադրամիջոցների չափորոշիչներին համապատասխանելու հավանականությունը, ինչը կարող է վկայել այլ տնտեսավարող սուբյեկտների հետ համաձայնության ձեռքբերման հնարավորության մասին:

Այս տեղեկությունից հետո երկու հարց է առաջանում՝ ինչու այս չարաշահումը չի բացահայտել ՊՎԾ-ն և ինչու է նման վարույթ հարուցվում փաստացի նախընտրական շրջանում: Այս հարցերի պատասխանների փնտրտուքը ուշագրավ ենթադրությունների տեղիք է տալիս: Դիցուք՝ ՄՊՀ նախագահ Գեղամ Գևորգյանը մամուլում բազմիցս ներկայցվել է որպես արդեն իսկ փոխքաղաքապետի պաշտոնում ընտրված Տիգրան Ավինյանի մտերիմ: Թեև ինքը՝ Գևորգյանը, հերքել է այն տեղեկությունը, որ գյուղատնտեսության նախարար ժամանակին նշանակվել է հենց Ավինյանի առաջարկով, ամեն դեպքում նրանց երկուսի անունը փոխկապակցված էր հայտնի չրերի սկանդալում: Եվ այժմ ավելի քան ուշագրավ է այն, որ պաշտոնապես չմեկնարկած, միևնույն ժամանակ ողջ թափող ընթացող նախընտրական պայքարի այս ֆոնին Հրաչյա Սարգսյանին թիրախավորում է հենց ՄՊՀ-ն: Ինչո՞ւ Հրաչյա Սարգսյանին, որովհետև վերջինս մշտապես հպարտորեն հայտարարել է, որ նոր ավտոբուսների ձեռքբերման կուռացիան ինքն է անում և, ընդհանրապես, տրանսպորտային նոր ցանցի ներդրումը իր շնորքն է: Արդյո՞ք սա հարված չէ Սարգսյանի գլխավոր նոու-հաուին:

Շաբաթներ առաջ «Սուրմալու» առևտրի կենտրոն այցելած Տիգրան Ավինյանն արել էր ռեզոնանսային հայտարարություն առ այն, որ ՔՊ քաղաքապետի թեկնածուն ինքն է: Շատերի կարծիքով` այսպիսով Ավինյանը փորձում էր իրեն ապահովագրել Նիկոլ Փաշինյանի և ՔՊ-ի կողմից քցված լինելուց: Քանի որ, ըստ էության, չնայած այն հանգամանքին, որ պաշտոնապես հայտարարվել է քաղաքապետի թեկնածուի անունը, պարզից էլ պարզ է, որ ներթիմային պայքարը դեռևս ակտիվ փուլում է և շարունակվում է:

Այս ֆոնին ուշագրավ է գործող քաղաքապետ Հրաչյա Սարգսյանի ակտիվացումը: Վերջինս գրեթե ամեն օր նոր շինությունների, պռոյեկտների և այգիների պրեզենտացիայով է զբաղված, ինչը հասկանալի է, որ նախընտրական քարոզչության տարր է իր մեջ պարունակում: Ինչպես երևում է՝ Սարգսյանը որոշել է օգտվել այն հանգամանքից, որ Ավինյանի դիրքերն այնքան էլ ամուր չեն այս նախընտրական պայքարում և առաջ տանել իր գիծը և խաղալ սեփական խաղը: Պարզից էլ պարզ է, որ առանձնապես հպարտանալու առիթներ գործող քաղաքապետը չունի, նա ոչնչով ավելի հաջող չի եղել, քան իր նախորդները, սակայն այն, որ Սարգսյանը այսօր որոշել է ակտիվանալ և հանրության դատին ներկայացրել իր արած մի քանի գործերի ծաղկաքաղը, արդեն իսկ բավականին ուշագրավ է:

Եվ գուցե հենց այդ պատճառով էլ երևան եկավ երեկ հրապարակված տեղեկությունը, որի օբյեկտիվությունը կասկածի տակ չառնելով, միևնույն ժամանակ կարող ենք ենթադրել, որ այն ունի նաև քաղաքական աստառ և թիրախում չափից դուրս՝ Ավինյանի համար ռիսկեր առաջացնելու աստիճան ակտիվացած Հրաչյա Սարգսյանի թափը և ամբիցիաները կոտրելն է...