17-ամյա Կարենի ձեռքի սպիները հիշեցնում են Ամանորի հրավառությունը

ՀԱՍԱՐԱԿՈՒԹՅՈՒՆ 3 Հունվար, 2016 12:48

News.am-ը գրում է .

Կարենն ամեն անգամ իր ձեռքի սպիներին նայելիս հիշում է տոնական հրավառությունն ու Նոր տարին: Մեկ տարի առաջ դեկտեմբերի 31-ի գիշերը տոնական հրավառության պայթելու հետեւանքով Կարենը ձեռքի լուրջ վնասվածք է ստանում, որի պատճառով նրա ձեռքը վիրահատում են, եւ ստիպված է լինում Նոր տարին անցկացնել հիվանդանոցում: Գառնի գյուղի 17-ամյա բնակիչն արդեն մեկ տարի է` զգուշանում է տոնական ճայթուկներից, փոքրիկներին եւ ընկերներին խորհուրդ է տալիս դրանք գնելիս անպայման իմանալ ծագման մանրամասներն ու զգուշորեն օգտագործել դրանք:

Կարենի ծնողները, որոնք 2015 թվականի տոնական օրերն անցկացրել են հիվանդանոցում` Կարենի կողքին, այսօր Աստծուն շնորհակալություն են հայտնում, որ իրենց որդին այլ լուրջ վնասվածքներ չի ստացել եւ արդեն ապաքինվել է:

«Դեկտեմբերի 31-ին, երբ 12-ը խփեց, Կարենը սալյուտը վառեց, սալյուտն արդեն վերջանում էր, մեկ էլ հանկարծ ձեռքի մեջ պայթեց: Տարանք Գառնիի հիվանդանոց, որտեղ առաջին օգնությունը ցույց տվեցին, հետո տարանք Երեւանի «Գրիգոր Լուսավորիչ» հիվանդանոց, որտեղ ասացին, որ վնասվածքը լուրջ է, եւ իրենք չեն կարող վիրահատել, պետք է տանել «Հերացու» անվան հիվանդանոց, այնտեղ էլ գնացինք, էդպիսի դեպքերն այնքան շատ էին, որ ստիպված մի քանի ժամ պետք է սպասեինք, վերջը գնացինք «Շենգավիթի» հիվանդանոց»,-հիշում է Կարենի հայրը` Դավիթ Ստեփանյանը:

17-ամյա մարզիկ երիտասարդը, որը զբաղվում է ազատ ոճի ըմբշամարտով, ձեռքի վնասվածքի պատճառով երկար ժամանակ չի կարողանում պարապմունքների գնալ, ինչն էլ բացասաբար է ազդել Կարենի կարիերայի վրա:

«Շատ հետ մնաց իր ընկերներից, դա այնպիսի ոլորտ է, որ պետք է միշտ զբաղվել: Իսկ ինքը ստիպված վերականգնողական մասաժների էր գնում: Հիմա արդեն վերականգնվել է, ամեն ինչ լավ է, բայց ինչ-որ ֆոբիաներ առաջացան մեր Կարենի մոտ»,-ասում է Դավիթ Ստեփանյանը:

Հայաստանում Նոր տարվա օրերին նման դեպքեր հիմնականում երեխաների հետ հաճախ են պատահում: «Սպառողների ազգային ասոցիացիայի» նախագահ Արմեն Պողոսյանը ճայթուկների եւ հրավառության սխալ օգտագործման հետեւանքով միջադեպերը կապում է Հայաստանում հրատեխնիկայի վաճառքի ոլորտում ստեղծված բարձիթողի վիճակի հետ. համապատասխան մարմինների կողմից հրատեխնիկայի վաճառքը չի վերահսկվում։

«Միջադեպերից խուսափելու համար ճայթուկների վրա պետք է գրված լինի, թե դրանք որ տարիքի երեխաների համար են նախատեսված, եւ օգտագործման կանոնները։ Մինչդեռ շատերը տան պայմաններում են պատրաստում ու վաճառում դրանք»,- ասում է Արմեն Պողոսյանը: