Ինչո՞ւ է Ֆրեդերիկ Բորը ցանկություն հայտնել հուղարկավորվել չիպսերի փաթեթավորման տեսք ունեցող դագաղում․ «Փաստ»

«Փաստ» օրաթերթը գրում է

Pringles չիպսը ավելի շուտ կարտոֆիլի թեթև խառնուրդ է, քանի որ պարունակում է ընդամենը 40 % բնական կարտոֆիլ, իսկ մնացած մասը ցորենի ալ յուր և օսլա է՝ խառնված բուսական յուղի և էմուլգատորների հետ: Կարտոֆիլի բարակ կտորները խոր տապակվում են մինչև ոսկե-դարչնագույն դառնալը և ստեղծում են մի բան, որն ավելի շատ նման է կարտոֆիլի թխվածքաբլիթի, քան չիպսի: Այս տեխնոլոգիայի շնորհիվ արտադրողները Մեծ Բրիտանիայում երկար ժամանակ կարողացել են խուսափել չիպսերի համար բավականին բարձր հարկերից, բայց 1994 թվականից ի վեր օրենքում որոշ փոփոխություններ են կատարվել, և հարկային դրախտն ավարտվել է: Աշխարհահռչակ Pringles չիպսերը ստեղծվել են 1956 թվականին մասնագիտությամբ քիմիկոս Ալեքսանդր Լիեպի ջանքերով:

Նա Procter & Gamble ընկերության համար մշակել է կարտոֆիլային չիպսերի յուրօրինակ բաղադրատոմս, ապա մի քանի տարի աշխատել է դրա կատարելագործման վրա: Քրտնաջան աշխատանքն արդյունք է տվել, և 1968 թվականի հոկտեմբերին Pringles չիպսերը մտել են Հյուսիսային Ամերիկայի շուկա: Եթե խոսենք անվան մասին, ապա, ըստ պաշտոնական լեգենդի, այն ստեղծվել է ոչ թե ակտիվ մտահղացումների արդյունքում, այլ սովորական հեռախոսային գրքից: Ստեղծողները, հոգնելով անվան հաջող տարբերակի անպտուղ որոնումներից, պատահաբար բացել են հեռախոսագիրքը և կանգ առել Օհայո նահանգի Ցինցինատի քաղաքի Pringle Drive փողոցի անվան վրա: Հենց այդ անունն էլ ծառայել է որպես նոր արտադրանքի՝ Pringles Newfangled կարտոֆիլային չիպսերի անուն: Բայց կա մեկ այլ վարկած, ըստ որի, չիպսերն անվանակոչվել են Մարկ Պրինգլի անունով, որը 1937 թվականին հայտնաբերել է կարտոֆիլի վերամշակման նոր մեթոդ: Որակ, հաճելի համ և հարմար փաթեթավորում. սրանք են այն հատկանիշները, որոնք արտադրողները փորձել են ընդգծել իրենց արտադրանքի մեջ:

Pringles չիպսերը «կարելի է օգտագործել այլ սննդամթերքի և ըմպելիքների հետ միասին», և այս հատկությունը արտադրանքն իսկապես եզակի է դարձնում: Հաջող ապրանքանիշ ստեղծելու համար ընկերությունը գտել է այն, ինչը տարբերում է նրա արտադրանքը հարյուրավոր նմանատիպերից, և դա եզակի փաթեթավորումն է, որը իրենից ներկայացնում է գլանաձև մետաղական տարողություն: Այդ փաթեթավորումը հայտնվել է 1970 թվականին: Այն ստեղծել է Procter & Gamble- ի աշխատակից Ֆրեդերիկ Բորը: Նա այնքան հպարտ է իր գյուտով, որ նույնիսկ կտակել է թաղվել Pringles չիպսերի փաթեթավորման տեսք ունեցող դագաղում: Եվ դա այդքան էլ զարմանալի չէ, քանի որ այդ փաթեթավորումը շատ օգուտներ է բերել ընկերությանը: Նախ՝ դա էքսկլ յուզիվ է, երկրորդ՝ ընկերությունը կարողացել է նման կերպ ավելի շատ չիպսեր տեղավորել փոքր ծավալում: Մեկ այլ կարևոր առավելություն է այն, որ նման փաթեթավորման մեջ չիպսերը լավ են պահում իրենց ձևը և չեն կոտրվում, իսկ չիպսերը հանելիս ձեռքերը քիչ են կեղտոտվում:

Իմիջիայլոց, չիպսերի կլորացած եզակի ձևը հայտնվել է փաթեթավորման հետ միաժամանակ, երբ Ֆրեդերիկ Բորը առաջարկել է մի պարզ, բայց և միևնույն ժամանակ հնարամիտ միտք՝ չիպսերը հավասարապես դասավորել, այլ ոչ թե լցնել տարողության մեջ, ինչպես դա անում են մյուս արտադրողները: Շատերը չգիտեն, որ Պրինգլես չիպսերի լոգոտիպի վրա պատկերված կերպարը կոնկրետ մարդ է. դա մասնագիտությամբ խոհարար Ջուլիուս Պրինգլեսն է: Վերադառնալով պատմությանը՝ հարկ է նշել, որ Պրինգլ կարտոֆիլային չիպսերի լայնածավալ վաճառքը սկսվել է 1975 թվականի մայիսին: 2009 թվականին Worlds Food- ը Pringles-ը ճանաչել է որպես աշխարհում ամենատարածված կարտոֆիլի չիպսեր: Ներկայում Pringles չիպսերն առաքվում են աշխարհի ավելի քան 140 երկիր:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում