Իրանում հակակառավարական ցույցերի ավելի քան 1000 մասնակցի դեմ դատական վճիռներ են կայացվել

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Իրանում հակակառավարական ցույցերի ավելի քան 1000 մասնակցի դեմ դատական վճիռներ են կայացվել: Այս մասին հայտնում է Reuters-ը՝ Իրանի դատական համակարգի պաշտոնական ներկայացուցիչ Մասուդ Սեթայեշիին հղումով։

Իրանի դատարանները խստորեն կվարվեն ցանկացածի հետ, ով հակակառավարական ցույցերի շարունակվող ալիքի ընթացքում խափանումներ կառաջացնի կամ հանցագործություն կկատարի,ասել է Սեթայեշին, գրում է Reuters-ը:

Գործակալությունը նկատում է, որ 1979 թվականի Իսլամական հեղափոխությունից ի վեր Իրանի հոգևոր առաջնորդների համար ամենամեծ մարտահրավերներից մեկը՝ արդեն յոթ շաբաթ տևող ցույցերը, չեն դադարում:

Ընդդիմադիր HRANA լրատվական գործակալությունը հայտնել է, որ շաբաթ օրվա դրությամբ անկարգությունների ընթացքում զոհվել է 318 ցուցարար, այդ թվում՝ 49 անչափահաս։ Նշվում է, որ սպանվել է նաև անվտանգության ուժերի 38 աշխատակից:

Անցյալ ամիս պետական լրատվամիջոցները հայտնել էին, որ սպանվել է անվտանգության ուժերի ավելի քան 46 անդամ, այդ թվում՝ ոստիկաններ։

Իրանի առաջնորդները թշնամիներին, այդ թվում՝ Միացյալ Նահանգներին և Իսրայելին են մեղադրել անկարգություններ հրահրելու համար: Իրանցի օրենսդիրները կոչ են արել դատական համակարգին «վճռականորեն վարվել» հանցագործների հետ:

Իրանում բողոքի ցույցերը շարունակվում են շուրջ երկու ամիս։ Դրանք սկսվել են 22-ամյա Մահսա Ամինիի մահից հետո, որը ծեծի էր ենթարկվել ոստիկանության բաժանմունքում՝ հիջաբը սխալ կրելու համար։ Զոհերի ստույգ թիվը հայտնի չէ։

Նոյեմբերի 6-ին իրանցի 290 պատգամավորներ բանաձև են ընդունել՝ ցուցարարներին «Աստծո թշնամիներ» անվանելով։ Խորհրդարանականները կոչ են արել դատական համակարգին հնարավորինս արագ պատիժներ սահմանել ցուցարարների նկատմամբ։