Ովքեր են Բաքվում ձերբակալված «լրտեսները» 

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Ադրբեջանի Պետական անվտանգության ծառայությունը այսօր բացահայտել է հօգուտ Իրանի գործող լրտեսական խումբ։ Ըստ ադրբեջանական մամուլում տարածված պաշտոնական տեղեկատվության, ձերբակալված ենթադրյալ «լրտեսներից» մեկը Կասպից ծովի նավթային նավատորմի կապիտան Զաքիր Ասկերովն է։ Վերջինս կրոնական կրթություն ունի՝ ուսանել է Ղումի շիա-մահմեդականների կրոնական բարձրագույն ուսումնական հաստատությունում։ Ասկերովը, ըստ ներկայացված մեղադրանքի, հավաքել է տեղեկություններ Ադրբեջանում գործող օտարերկրյա ընկերությունների եւ այլ պետությունների ներկայացուցիչների մասին, ինչպես նաեւ տեղեկություններ Ադրբեջանի ռազմածովային ուժերի զորավարժությունների, նավթային պլատֆորմներ հասցված բեռների մասին եւ այդ հավաքագրված տեղեկությունները բջջային հեռախոսի միջոցով փոխանցել է իրանական կողմին։ 

Մյուս ձերբակալվածը Էլնուր Ռասուլովն է, ով «2018 թվականին գտնվելով Իրանում, գաղտնի համագործակցության մասին պայմանավորվել է իրանական հատուկ ծառայություններիւ հետ»։ Իր ազգականի հետ միասին Ռասուլովը լուսանկարել եւ WhatsАpp հավելվածի միջոցով իրանական կողմին է փոխանցել Բաքվի Ղարադաղի շրջանով անցնող նավթամուղներն ու գազամուղները, ինչպես նաեւ ադրբեջանական ՊՆ-ի եւ Սահմանապահ պետական ծառայության ԱԹՍ-ները, Բաքվի «Տեխնոֆեստ» ցուցահանդեսի համար նախատեսված զինտեխնիկայի պահման վայրերը, ԶՀՀ տեղակայման վայրերը, որոնք ռազմավարական նշանակություն ունեցող օբյեկտ են համարվում, ինչպես նաեւ ռադիոլոկացիոն վերահսկողության վայրերը Բաքվում, Սալյանի եւ Ֆիզուլիի շրջաններում։

Երրորդ մեղադրյալ Բախտիյար Աղազադեն էլ Իրանում կրոնական կրթություն ստացած անձ է, ով հատկապես ուշադրություն է դարձրել եւ տեղեկություններ հավաքագրել Ադրբեջանում ծավալվող հասարակական-քաղաքական պրոցեսների մասին, բացի ռազմական եւ դիվանագիտական նշանակության «թիրախների» մասին տեղեկությունների հավաքագրումը։ Մնացած մեղադրանքներն էլ այսպիսին են։ 

Առկա տեղեկատվությունից կարելի է եզրակացնել, որ ադրբեջանական հատուկ ծառայությունների թիրախում հայտնվել են այն անձինք, ովքեր կրոնական կրթություն են ստացել Ղումի շիա մահմեդական բարձրագույն աստվածաբանական համալսարանում, հաճախակի այցելում են Իրան կամ կապեր ունեն այդ երկրի հետ, կամ գտնվել են այդ երկրում ինչ որ ժամանակով։ Ներկայացված տեղեկատվության մեջ անհասկանալի դրվագներ կան։ Օրինակ՝ Բաքվի Ղարադաղի շրջանով անցնող նավթամուղների եւ գազամուղների լուսանկարահանումը որպես լրտեսություն ներկայացնելը այնքան էլ հասկանալի չէ, որովհետեւ կարծես թե գաղտնի օբյեկտի մասին չէ խոսքը եւ արբանյակային կապի միջոցով նման լուսանկարները Իրանի համար կարող են հասանելի լինել, կամ «Տեխնոֆեստի» ցուցադրության զինտեխնիկայի պահեստների լուսանկարումը։ Դրանք էլ կարծես թե գաղտնի օբյեկտներ չեն։

Այլ է հարցը, որ Բաքուն, ինչ-ինչ հարցերից ելնելով, փորձում է անընդհատ լարել Թեհրանի հետ հարաբերությունները եւ նույնիսկ ամենափոքր «խնդիրը» «լուն ուղտ դարձրած» է ներկայացնում։ Ամեն դեպքում նկատենք, որ հատկապես Ղումի շիա մահմեդականների բարձրագույն աստվածաբանական համալսարանի վրա սեւեռումը ուշագրավ է, քանի որ որքան հայտնի է, Ադրբեջանում գործող մահմեդական կրոնավորների մեծ մասն հենց այդ համալսարանում են ստացել իրենց բարձրագույն կրոնական կրթությունը։