30 մրցանակակիրներից 5-ը Հայաստանի պատվիրակության գիտակներն են. «Փաստ»

«Փաստ» օրաթերթը գրում է

Հայ երիտասարդ գիտնականների պատվիրակությունը գերարդյունավետ մասնակցություն է ունեցել 2022 թվականի նոյեմբերի 1-ից նոյեմբերի 4-ը ՌԴ Նիժնի Նովգորոդ քաղաքում անցկացված՝ ԱՊՀ անդամ երկրների երիտասարդ գիտնականների ֆորումին, որը կրում էր «Գիտություն առանց սահմանների» խորագիրը։ Ֆորումը 2024 թվականին Ռուսաստանի գիտությունների ակադեմիայի 300-ամյակի տոնակատարությանը նվիրված միջոցառումների մեծ ծրագրի մի մասն է: Ֆորումի կազմակերպիչներն են Ռուսաստանի գիտությունների ակադեմիան, ԱՊՀ գործադիր կոմիտեն, ՌԴ գիտության և բարձրագույն կրթության նախարարությունը, Նիժնի Նովգորոդի մարզի կառավարությունը, Ն.Ի. Լոբաչևսկու անվան համալսարանը և «Սկոլկովո» հիմնադրամը:

Գիտական միջոցառմանը մասնակցել է 384 գիտնական ԱՊՀ անդամ երկրներից՝ Հայաստանից, Ռուսաստանից, Բելառուսից, Ղազախստանից, Ղրղզստանից, Թուրքմենստանից, Ուզբեկստանից, Տաջիկստանից, Ադրբեջանից, ինչպես նաև ԱՊՀ անդամ չհանդիսացող երկրներից՝ Իրանից, Հնդկաստանից, Չինաստանից, Չեռնոգորիայից, Լիվիայից։ Ընդհանուր առմամբ, ֆորումի ընթացքում ներկայացվել է 250 գիտական զեկույց 9 տարբեր թեմատիկ ուղղվածության սեկցիաներում՝ «Արհեստական ինտելեկտ», «Ապագայի տեխնոլոգիաներ», «Նոր նյութեր», «Հարմարավետ միջավայր», «Առողջ սերունդ», «Պարենային անվտանգություն», «Ժառանգության պահպանում», «Ստեղծագործող անհատականություն» և «Մոլեկուլային ճարտարագիտություն»: Հայաստանը ֆորումին ներկայացել էր 21 հոգանոց պատվիրակությամբ, որն ԱՊՀ անդամ երկրներից ներկայացած ամենամեծ պատվիրակություններից մեկն էր:

ՀՀ գիտությունների ազգային ակադեմիայի տարբեր ինստիտուտների աշխատակից երիտասարդ գիտնականներն իրենց զեկույցները ներկայացրեցին «Արհեստական ինտելեկտ», «Նոր նյութեր», «Հարմարավետ միջավայր», «Առողջ սերունդ», «Պարենային անվտանգություն», «Ժառանգության պահպանում» և «Մոլեկուլային ճարտարագիտություն» սեկցիաներում: Սեկցիաների աշխատանքի արդյունքների հիման վրա ֆորումի կազմկոմիտեն որոշել էր յուրաքանչյուր սեկցիայում առաջին, երկրորդ և երրորդ հորիզոնականների մրցանակակիրներին՝ թվով 30 երիտասարդի: 30 մրցանակակիրներից 5-ը հայկական պատվիրակության գիտակներն են, նրանցից 3-ն արժանացել են «Ժառանգության պահպանում», «Մոլեկուլային ճարտարագիտություն» և «Առողջ սերունդ» սեկցիաներում առաջին հորիզոնականին, իսկ 2-ը՝ «Նոր նյութեր» և «Առողջ սերունդ» սեկցիաներում՝ երրորդ հորիզոնականին:

Մանրամասները՝ «Փաստ» օրաթերթի այսօրվա համարում