Հայտնի են «Լավագույն գիտական աշխատանք» մրցույթի հաղթողները. Արա Աբրահամյանը հանձնեց մրցանակները

Նախքան հաղթողներին մրցանակներն ու դրամական պարգևները հանձնելը, ԳԱԱ նախագահ Աշոտ Սաղյանն ասաց` մրցույթն անցկացվել է բարերար, Ռուսաստանի հայերի միության նախագահ Արա Աբրահամյանի հովանու ներքո: ԳԱԱ նախագահը հիշեցնում է, որ այս տարին բավականին բարենպաստ է երիտասարդ գիտնականների համար` աշխատավարձերն են բարձրացել, ոլորտի ֆինանսավորումն է ավելացել: «Պետական ու ոչ պետական բազմաթիվ ծրագրեր կան, որոնց մեր երիտասարդ գիտնականները մեծ սիրով դիմում են: Դրանց բոլորի կողքին նաև պարոն Աբրահամյանի այս մտահաղացումն է` «Լավագույն գիտական աշխատանք» մրցույթը, ինչի համար շնորհակալ ենք»,-նշեց պարոն Սաղյանը:

Ակադեմիկոս Արթուր Իշխանյանն ասաց` այս մրցանակները  մեր երկրում առկա ծանր պայմաններում կարևոր, էական, անգամ մշակութաստեղծ երևույթներ են: «Գիտության ոլորտն ունի սատարման կարիք, այսօր նաև մեծ են հասարակության ակնկալիքները մեր ոլորտից: Պետք է գիտակցենք, որ 21-րդ դարը տեխնոլոգիաներինն է, ազգերի մրցակցությունն առավել արտահայտվել է այս դարում: Իսկ տեխնոլոգիաների հիմքում գիտությունն է: Մեր երկրի ապագան մեր երիտասարդ գիտնականների ձեռքում է: Պարոն Աբրահամյանի կողմից այս մրցանակների շնորհումը նպաստելու է ոլորտի աշխուժացմանը: Հույս ունեմ, որ մրցանակաբաշխությունը կլինի շարունակական և ավելին` հույս ունենանք, որ կավելանա ֆինանսավորման չափը և ուղղությունները»,-նշեց Իշխանյանը:

Ռուաստանի հայերի միության նախագահ, ՅՈՒՆԵՍԿՕ-ի բարի կամքի դեսպան և «Արարատյան Ալյանս» մտքի կենտրոն-ինստիտուտի հիմնադիր Արա Աբրահամյանը, ողջունելով ներկաներին, հիշեցրեց, որ տարիներ շարունակ Ռուսաստանի հայերի միությունը մշտապես եղել է ԳԱԱ-ի և, առհասարակ, ստեղծագործական բոլոր միությունների կողքին: «Մշտապես անցկացրել ենք մրցույթներ, սակայն վերջին 2-3 տարում չկարողացանք իրականություն դարձնել մեր միջոցառումները` քովիդն ու պատերազմը փոխեցին մեր պլանները: Պետք է վերականգնենք ավանդույթը և ամեն տարի պարտադիր սկզբունքով մրցանակաբաշխություններ անցկացնենք: Ինչ վերաբերում է մրցանակային ֆոնդին, այո, այն ևս պետք է վերանայենք: Գիտության ոլորտում որքան էլ ներդրում անենք, քիչ է: Գիտությունը շատ կարևոր նշանակություն ունի մեր երկրի համար, ուստի ոլորտին ուղղված ուշադրությունը, նաև ֆինանսական տեսանկյունից պետք է ավելանա»,-ասաց պարոն Աբրահամյանը:

Եվ վերջում` տարբեր անվանակարգերում հաղթողներին հանձնվեցին հավաստագրերը:

Ֆիզիկա, մեխանիկա, մաթեմատիկա, ինֆորմատիկա անվանակարգում 1-ին տեղը զբաղեցրել է Դավիթ Հայրապետյանը (Հայ-Ռուսական համալսարան), 2-րդ տեղը՝ Արմեն Սարգսյանը (ՀՀ ԳԱԱ Ֆիզիկական հետազոտությունների ինստիտուտ), 3-րդ տեղը զբաղեցրել են Տիգրան Պետրոսյանը (ԵՊՀ) և Վահրամ Ղազարյանը (ՀՀ ԳԱԱ Ֆիզիկայի կիրառական պրոբլեմների ինստիտուտ):

Քիմիա և Երկրի մասին գիտություններ անվանակարգում 1-ին տեղը զբաղեցրել է Ջոն Կարապետյանը (ՀՀ ԳԱԱ Ա. Նազարովի անվան երկրաֆիզիկայի և ինժեներային սեյսմաբանության ինստիտուտ), 2-րդ տեղը՝ Մարիետա Զաքարյանը (ՀՀ ԳԱԱ Ա. Նալբանդյանի անվան քիմիական ֆիզիկայի ինստիտուտ), Աստղիկ Շահխաթունին (ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոն): 3-րդ տեղը զբաղեցրել են Բալաբեկ Սարգսյանը (Ա. Ալիխանյանի անվան ազգային գիտական լաբորատորիա) և Անուշ Հովակիմյանը (ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոն):

Կյանքի մասին գիտություններ անվանակարգում 1-ին տեղը զբաղեցրել է Գոհար Ցականովան (ՀՀ ԳԱԱ Մոլեկուլային կենսաբանության ինստիտուտ), 2-րդ տեղը՝ Հեղինե Գևորգյանը (ԵՊՀ), 3-րդը՝ Վարդան Ասատրյանը (ՀՀ ԳԱԱ Կենդանաբանության և հիդրոէկոլոգիայի գիտական կենտրոն):

Հայագիտություն և հասարակական գիտություններ անվանակարգում 1-ին մրցանակին արժանացել են Լևոն Աղիկյանը (ՀՀ ԳԱԱ Հնագիտության և ազգագրության ինստիտուտ), Միքայել Մալխասյանը (ԵՊՀ), Վոլոդյա Մկրտչյանը (Արցախի Մեսրոպ Մաշտոց համալսարան): 2-րդ մրցանակին արժանացել են Մարտին Հարությունյանը (ՀՀ ԳԱԱ Արվեստի ինստիտուտ), Մերի Սարգսյանը (ՀՀ ԳԱԱ Գիտակրթական միջազգային կենտրոն), Արմեն Ավանեսյանը (ՀՀ ԳԱԱ Մ. Աբեղյանի անվան գրականության ինստիտուտ): 3-րդ մրցանակին արժանացել են Գոռ Մարգարյանը (ՀՀ ԳԱԱ Արևելագիտության ինստիտուտ), Ռուբեն Մելքոնյանը և Նաիրա Պողոսյանը (ԵՊՀ):

Լուսինե Առաքելյան