Հանցագործները հարյուր միլիոն են գողացել բանկից

Ռուսաստանում ցանցահենները ջարդել են առեւտրական բանկի սերվերը, բանկի անունը չի հրապարակվում, եւ հաշիվներից  95 մլն ռուբլի են գողացել: Այդ մասին «Ինտերֆաքսին» հայտնել է աղբյուրը իրավապահ մարմիններում:  

Համակարգը ջարդվել էր դեկտեմբերի 31-ին`  7:00-ից 9:00-ի ընթացքում: Թալանված փողը 690 վճարմամբ փոխանցվել էր տարբեր առեւտրական բանկերում ֆիզիկական եւ իրավաբանական անձանց հաշիվների: Հունվարի 1-ից այդ փաստով դատական գործ է հարուցվել  «Առանձնապես խոշոր չափի խարդախություն հոդվածով»:

Միաժամանակ ամանորի գիշերը Մոսկվայի կենտրոնում հարձակում էր իրականացվել բանկի բաժանմունքի վրա: Ինչպես հայտնի է դարձել, Մոսկվայի ժամանակով  0:11-ին հունվարի 1-ի գիշերը չարամիտը կողպեքների բանալիով բացել է բանկի ծառայողական բաժանմունքի դուռը եւ տիրացել է խոշոր չափի կանխիկ գումարի: Հանցագործի գործողություններից վնասը կազմել  է 12 մլն ռուբլի: Քրեական գործ է հարուցվել  «Առանձնահատուկ խոշոր չափի գողություն» հոդվածով:

Դեկտեմբերի 28-ին դիմակներով անհայտ անձինք թալանել են մերձմոսկովյան «Լյուբերցախ» բանկը` գողանալով մոտ 6 մլն ռուբլի: Քրեական գործ է հարուցվել   «Կողոպուտ» հոդվածով: Դեկտեմբերի 27-ին հաղորդվել է Նովոսիբիրսկում բանկի թալանի մասին:  Ականատեսների խոսքով, գողը խնդրել է տագնապի կոճակը չսեղմել` իր արարքը փաստարկելով նրանով, որ երեխան հիվանդ է: Նա իր հետ առնվազն   12 մլն ռուբլի է տարել: