Հայկական բիզնես անկյուն՝ Կալիֆորնիայի սրտում․ 20 հայկական ընկերություններ և 16 ծառայություններ շուտով մուտք կգործեն ամերիկյան շուկա

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

20 հայկական ընկերություններ և 16 ծառայություններ շուտով հնարավորություն կունենան ներկայանալու ամերիկյան շուկայում։ Այս եզակի հնարավորոթյունը նրանց ընձեռում է «Հայկական բիզնես անկյուն» նախագիծը։ Սննդի, խմիչքների, հարդարանքի և պերճանքի պարագաների, չրերի և այլ արտադրատեսակներից մինչև ամենատարբեր ծառայություներ՝ մարկետինգային, ճարտարապետական և այլն, հունվարի 21-ից ներկայացված կլինեն «Հայկական բիզնես անկյուն» նախագծի տաղավարներում։

«Հայկական յուրաքանչյուր ընկերություն ունի ճիշտ ներկայացված լինելու իր ռազմավարությունը և փիլիսոփայությունը։ Շատ հաճախ մեկօրյա ցուցադրություն- վաճառքների միջոցով չի հաջողվում ընկերության ասելիքը հաղորդել հասցեատիրոջը, ուստի մենք որոշում կայացրեցինք վերցնել վեցամսյա փուլ և այդ ժամանակահատվածում ճիշտ ներկայացնել տվյալ ընկերությունը կամ ծառայությունը՝ ամերիկյան շուկային։ Ճիշտ ներկայացնելով դրանք՝ հիմք ենք տալիս մեր գործարար աշխարհին ներդրումներ այդ ընկերություններում»,- ասաց «Հայկական բիզնես անկյուն» նախագծի հիմնադիր Միքայել Հայրապետյանը։

«Հայկական բիզնես անկյուն»-ում ընդգրկվել են ամերիկյան շուկայում ներկայանալու պոտենցիալ, ներդրումներ ու ֆինանսավորումներ մարսելու հնարավորություն ունեցող 20 ընկերություններ, ովքեր թիրախավորելու են ԱՄՆ-ի՝ հենց ամերիկյան շուկան։ «Հայկական բիզնես անկյուն»-ը յուրօրինակ հայկական շունչ է լինելու Կալիֆորնիայի սրտում՝ Բըրբանկ քաղաքում, որտեղ գտնվում են այնպիսի հսկաներ, ինչպիսիք են «Disney»-ը, «Warner Bros»-ը և հոլիվուդյան մի շարք ստուդիաներ։

Միջազգային բիզնեսի ինտեգրացիայի առումով այս նախաձեռնութունը որոշիչ քայլ է լինելու հայկական ընկերությունների համար՝ իր նպաստը բերելով նաև Հայաստանի տնտեսությանը։

«Մենք արդեն իսկ բանակցել ենք ամերիկյան խոշոր ցանցերի հետ, որոնք պատրաստ են մեր ապրանքները ընդունել իրենց ցանցեր։ Հայաստանից դեպի ԱՄՆ ապրանքները հասցվում են սովորաբար ամիսների ընթացքում։ Մենք մեր ընկերություններին տալու ենք համապատասխան գործիքներ, որով իրենք կարողանալու են առանց կորուստների կարգավորել իրենց ֆինանսական հարցերը»,- ասաց «Հայկական բիզնես անկյուն» նախագծի ղեկավար Նազելի Հակոբյանը։

«Հայկական բիզնես անկյուն»-ը հարթակ է, որը լինելու է մեկօրյա ցուցահանդեսների և առևտրային ցանցերի բիզնես հիբրիդային տարբերակ, որը ամերիկյան շուկա մուտք գործելու հնարավորություն է տալիս նաև հայ արվեստագետներին՝ իրենց նկարներն ու քանդակները ամերիկյան շուկայում ներկայացնելու համար։

Նախագծի տաղավարում ամեն ինչ դետալ առ դետալ նախագծվել է այնպես, որպեսզի այցելուները զգան հայկական շունչը, հատակի հողը անգամ բերվել է հենց Հայաստանից։

Այսպիսով՝ հունվարի 21-ից ամերիկյան շուկան կընդունի հայկական ընկերություններին և ծառայություններին։